Read new_tumbuka_bible 2 Midauko 10 Bible Online

2 Midauko 10 - new_tumbuka_bible bible

2 Midauko 10

¹Rehobowamu wakaruta ku msumba wa Shekemu pakuti kwenekura ŵaIsraele wose ŵakaruta kuti ŵakamwimike iyo kuŵa karonga.

²Para Yerobowamu mwana wa Nebati wakapulika za cheneichi mu Eguputo, kweneuko wakaruta pakuchimbira Karonga Solomoni, wakawerako ku Eguputo.

³Ŵanthu ŵa mafuko gha ku mpoto ŵakatuma thumi kuti ŵakamucheme. Ntheura Yerobowamu pamoza na wumba wose wa ŵaIsraele ŵakiza kwa Rehobowamu ndipo ŵakati kwa iyo,

⁴“Ŵawiskemwe ŵakatinyekezganga na goliwoli lizitu chomene. Ntheura sono mupepuskeko milimo yinonono na uzitu uwo ŵakaŵika pa ise. Apo ndipo titi timuteŵeteraninge.”

⁵Rehobowamu wakaŵazgora wakati, “Muwerere danga ndipo mukizeso pamanyuma pa mazuŵa ghatatu.” Ntheura ŵanthu ŵara ŵakawerera.

⁶Ntheura Karonga Rehobowamu wakadumbiskana na ŵararaŵarara awo ŵakateŵeteranga ŵawiske Solomoni apo wakaŵa wachali wamoyo. Ndipo wakaŵafumba wakati, “Kasi mungandipa urongozgi uli uwo ndingamanya kuŵazgora nawo ŵanthu aŵa?”

⁷Ŵararaŵarara ŵara ŵakamuzgora Rehobowamu ŵakati, “Usange muti muŵenge na lusungu ku ŵanthu aŵa na kuŵakondweska, ndiposo na kuŵayowoyera mazgu ghaweme, iwo ŵati ŵamuteŵeteraninge kwa muyirayira.”

⁸Kweni urongozgi uwo ŵakamupa ŵararaŵarara ŵara, wakawukana ndipo wakaŵafumba ŵawukirano awo ŵakakulira pamoza nayo, ŵeneawo ŵakamuteŵeteranga.

⁹Iyo wakaŵafumba wakati, “Kasi mungandipa urongozgi uli uwo ndingamanya kuŵazgolera nawo awo ŵakuti, ‘Mupepuskeko uzitu uwo ŵawiskemwe ŵakaŵika pa ise’?”

¹⁰Ŵawukirano ŵara ŵakati kwa iyo, “Ŵanthu awo ŵakayowoya kwa imwe kuti, ‘Ŵawiskemwe ŵakatinyekezganga goliwoli lizitu chomene, kweni imwe mupepuskeko goliwoli lithu,’ imwe mukaŵazgore kuti, ‘Kamunwe kane kachoko aka nkhakomi kuruska chiuno cha ŵadada.’ ”

¹¹Ŵadada ŵakamunyekezganinge goliwoli lizitu, kweni ine nditi ndisazgireko ku uzitu ura. Ŵadada ŵakamulangiraninge na vikoti, kweni ine nditi ndimulangirani na ŵakalizga.

¹²Ntheura Yerobowamu pamoza na ŵaIsraele wose ŵakiza kwa Rehobowamu pa zuŵa la chitatu nga ndi umo karonga wakayowoyera kuti, “Mukizeso kwa ine pa zuŵa la chitatu.”

¹³Karonga Rehobowamu wakaŵazgora ŵanthu ŵara na ukari chomene, pakuti wakakana urongozgi uwo ŵakamupa ŵararaŵarara ŵara.

¹⁴Karonga Rehobowamu wakaŵazgora kwakuyana na urongozgi uwo ŵawukirano ŵanyakhe ŵara ŵakamurongozgera ndipo wakati, “Ŵadada ŵakamunyekezganinge goliwoli lizitu, kweni ine nditi ndisazgirengeko. Ŵadada ŵakamulangiraninge na vikoti, kweni ine nditi ndimulangirani ŵakalizga.”

¹⁵Ntheura karonga kuti wakaŵapulikira ŵararaŵarara ŵara chara, pakuti chinthu ichi chikafumira kwa Chiuta mwakuti ghafiskike mazgu gha FUMU agho yikayowoya kwa Yerobowamu mwana wa Nebati mwa nchimi Ahiya wa ku Shilo.

¹⁶Para ŵaIsraele wose ŵa ku mpoto ŵakamanya kuti Karonga Rehobowamu wakana kuŵapulika, ŵakamuzgora ŵakati, “Kasi tili na phande uli mwa Davide? Tilije nanga nchiharo mu mwana wa Yese. Imwe ŵaIsraele, munthu yose warute ku hema lakhe. Iwe nawe Davide, sono ujiwonere wekha vya mu nyumba yako.” Penepapo ŵaIsraele wose ŵakawera ku vikaya vyawo.

¹⁷Kweni ŵaIsraele awo ŵakakharanga misumba ya mu charu cha Yuda, Rehobowamu ndiyo wakaŵawusanga.

¹⁸Para Karonga Rehobowamu wakatuma Hadoramu[2] mweneuyo wakaŵa murara pa nchito ya kuchichizga kuti warute ku ŵaIsraele, ŵaIsraele ŵakamudinya na mawe ndipo ŵakafwa. Ndipouli Karonga Rehobowamu nkhongono zikawereramo luŵiro wakakwera pa gareta lakhe na kuchimbilira ku Yerusalemu.

¹⁹Ntheura ŵaIsraele mbakugarukira mbumba ya Davide mpaka sono.