Read new_tumbuka_bible 2 Midauko 11 Bible Online

2 Midauko 11 - new_tumbuka_bible bible

2 Midauko 11

¹Para Rehobowamu wakafika ku Yerusalemu wakawunganya vigwe vya ŵasilikari 180,000 vya fuko la Yuda na la Benjamini kuti vikarwe nkhondo na ŵaIsraele ŵa ku chigaŵa cha ku mpoto awo ŵakamugarukira mwakuti viwerezgereso ufumu kwa Rehobowamu yura.

²Kweni mazgu gha FUMU ghakiza kwa nchimi Shemaya ghakati,

³“Umuphalire Karonga Rehobowamu mwana wa Solomoni pamoza na ŵaIsraele wose ŵa charu cha Yuda na cha Benjamini kuti,

⁴‘FUMU yikuti, “Mureke kuruta kuya karwa nkhondo na ŵabali ŵinu. Munthu yose wawerere ku chikaya chakhe pakuti chinthu ichi chafumira kwa ine.” ’ ” Ntheura ŵakapulikira mazgu gha FUMU na kuwerera ku vikaya vyawo ndipo kuti ŵakarwaso nkhondo na Yerobowamu chara.

⁵Rehobowamu wakakharanga mu msumba wa Yerusalemu ndipo wakazenga malinga mu mizi ya charu cha Yuda kuti wajivikirire ku ŵarwani ŵakhe.

⁶Wakazenga muzi wa Betelehemu, wa Etamu, wa Tekowa,

⁷wa Betizuru, wa Soko, wa Adulamu,

⁸wa Gati, wa Maresha, wa Zifu,

⁹wa Adorayimu, wa Lakishi, wa Azeka,

¹⁰wa Zora, wa Ayaloni na wa Heburoni. Misumba yakuzingirizgika na malinga iyi yikaŵa mu charu cha Yuda na cha Benjamini.

¹¹Mizi iyi wakayikhozga chomene pakuŵikamo ŵarongozgi ŵa ŵasilikari, na nthamba za vyakurya, mafuta na vinyo.

¹²Ndiposo wakaŵikamo nguru na mikondo mu misumba yose iyi na kuyikhozga chomene. Ntheura Rehobowamu wakawusa charu cha Yuda na cha Benjamini.

¹³Ŵasofi ndiposo na ŵaLevi awo ŵakakharanga mu charu chose cha Israele ŵakiza kwa Rehobowamu kuti ŵaŵe nayo pamoza.

¹⁴Nanga ŵangaŵa ŵaLevi nawo ŵakareka maluhari ghawo ndiposo na mphango zawo na kwiza mu charu cha Yuda na mu Yerusalemu chifukwa Yerobowamu na ŵana ŵakhe ŵakaŵakanizga kuti ŵateŵetere FUMU nga mbasofi.

¹⁵Yerobowamu wakajimikira ŵasofi ŵakhe kuti ŵateŵetenge mu malo gha pachanya ghakusoperako kuti ŵasopenge mizimu yiheni na vikozgo vya mbuzi na vya kankhambako, ivyo wakapanga.

¹⁶Ndipo ŵaIsraele wose awo ŵakajipereka kuteŵetera FUMU, Chiuta wa Israele kufumira ku mafuko gha ku chigaŵa cha ku mpoto, ŵakarondezganga ŵasofi na ŵaLevi ŵara ku Yerusalemu kuya kapereka sembe kwa FUMU, Chiuta wa ŵawiskewokuru.

¹⁷Mwa ntheura ŵakakhozga ufumu wa charu cha Yuda, ndipo pa virimika vitatu ŵakapulikana na Rehobowamu mwana wa Solomoni ndipo ŵakachitanga viweme nga ndi ivyo ŵakachitanga mu muwuso wa Karonga Davide na wa mwana wakhe Karonga Solomoni.

¹⁸Rehobowamu wakatora Mahalati kuŵa muwoli wakhe mweneuyo wakaŵa mwana wa Yerimoti mwana wa Davide ndipo nyina wakaŵa Abihayili mwana wa Eliyabu muzukuru wa Yese.

¹⁹Ndipo wakamubabira ŵana aŵa: Yeushi, Shemariya na Zahamu.

²⁰Pamanyuma wakatora Maaka mwana mwanakazi wa Abisalomu kuŵa muwoli wakhe ndipo wakamubabira Abiya, Atayi, Ziza na Shelomoti.

²¹Rehobowamu wakamutemwa Maaka mwana wa Abisalomu kuruska ŵawoli ŵakhe wose pamoza na ŵawoli ŵakhe ŵachoko. Rehobowamu wakatora ŵanakazi 18, ŵa mu udesi wakaŵa 60 ndipo wakaŵa na ŵana ŵanarume 28 na ŵanakazi 60.

²²Wakamwimika Abiya mwana wa muwoli wakhe Maaka kuŵa murara pachanya pa ŵana ŵanyakhe wose mwakuti wamuŵika kuŵa karonga.

²³Rehobowamu wakaŵa wa mahara mu kachitiro kakhe, pakuti wakaŵaŵika ŵana ŵakhe mu mizi yose ya mu charu cha Yuda na Benjamini ndiposo na mu misumba yose ya malinga. Wakaŵapanga vyakurya vinandi na kuŵatorera ŵanakazi ŵanandi.