Read new_tumbuka_bible 2 Midauko 12 Bible Online

2 Midauko 12 - new_tumbuka_bible bible

2 Midauko 12

¹Para Rehobowamu wakati wakhozga ufumu wakhe na kuŵa wankhongono, iyo pamoza na ŵanthu wose ŵa charu cha Yuda ŵakareka kusungilira dango la FUMU.

²Mu chirimika cha chinkhonde cha kuwusa kwa Karonga Rehobowamu, Shishaki karonga wa charu cha Eguputo wakiza na nkhondo kuti ŵarwe nawo ŵa mu msumba wa Yerusalemu chifukwa ŵakareka kuŵa wakugomezgeka kwa FUMU.

³Karonga Shishaki wakiza na magareta 1,200 ndiposo na ŵanthu ŵakugara pa mahachi 60,000. Ŵasilikari awo ŵakiza nawo ŵakaŵa ŵanandi chomene ndipo ŵakufumira ku Eguputo, Libiya Sukimu na ku Etiyopiya.

⁴Wakapoka misumba ya malinga gha mu charu cha Yuda mpaka wakaya kafika ku Yerusalemu.

⁵Penepapo nchimi Shemaya wakiza kwa Rehobowamu na ku nduna zakhe za mu charu cha Yuda awo ŵakawungana mu Yerusalemu chifukwa cha Shishaki. Iyo wakaŵaphalira wakati, “FUMU yikuti, ‘Mwandireka ine. Ntheura ine nane ndamurekani na kumuperekani mu woko la Shishaki.’ ”

⁶Penepapo nduna za charu cha Yuda pamoza na karonga, ŵakajiyuyura pakuzomera kwananga ndipo wakati, “FUMU njirunji nadi.”

⁷Para FUMU yikawona kujiyuyura kwawo na kuzomera kwananga, mazgu gha FUMU ghakiza kwa nchimi Shemaya ghakuti, “Pakuti iwo ŵajiyuyura na kuzomera kuti ŵananga, ndiŵamare chara, kweni nditi ndiŵape nthowa yakuphokweramo, ndipo kuti nditi ndi pungulire ukari wane pa Yerusalemu chara, mwakuti Shishaki wareke kuŵamara.

⁸Ndipouli ŵaYuda aŵa ŵati ŵaŵenge ŵazga ŵa Shishaki mwakuti ŵamanye umo yiliri mphambano pakati pakuteŵetera ine na pakuteŵetera ŵakaronga ŵa mu vyaru.”

⁹Para Shishaki, karonga wa ku Eguputo wakiza na nkhondo ku Yerusalemu, wakayora vyuma ivyo vikaŵa mu Nyumba ya FUMU na vya mu nyumba ya ufumu. Wakatora kalikose pamoza na nguru za golide izo Solomoni wakapanga.

¹⁰Ntheura Karonga Rehobowamu wakapanga nguru zinyakhe za mkuŵa kuti ŵawezgerepo izo zikatoreka, ndipo wakaziŵika mu mawoko gha ŵarongozgi ŵa ŵalinda awo ŵakaŵa pa muryango wa nyumba ya ufumu.

¹¹Nyengo yose apo karonga wakarutanga ku Nyumba ya FUMU, ŵavikiriri ŵakarutanga nayo pamoza uku ŵayegha nguru zira ndipo pamanyuma ŵakaziwezgerangamoso mu nyumba yakuzisungiramo.

¹²Chifukwa chakuti Rehobowamu wakajiyuyura na kuzomera kwananga kwakhe, FUMU yikawerako ku ukari wakhe pa iyo ndipo yikaŵamalirathu chara. Penepapo vinthu vikamba kwenda makora mu charu cha Yuda.

¹³Ntheura Karonga Rehobowamu wakawusa na kuwukhozga ufumu wakhe kuŵa wankhongono chomene mu msumba wa Yerusalemu. Wakaŵa na virimika 41 apo wakambiranga kuwusa ndipo wakawusa virimika 17 mu Yerusalemu, msumba uwo FUMU yikasankha mu mafuko ghose gha Israele kuti zina lakhe lichindikikirengemo. Ŵanyina ŵa Rehobowamu ŵakaŵa Naama muAmoni.

¹⁴Kweni Rehobowamu wakachita viheni chifukwa wakareka kuŵikapo mtima wakhe pakuchita khumbo la FUMU.

¹⁵Milimo ya Rehobowamu kufuma pa kwamba mpaka ku umaliro yili kulembeka mu Buku la Midauko wa nchimi Shemaya, na wa muwoni Ido. Nkhondo yikachitikanga kaŵirikaŵiri pakati pa Rehobowamu na Yerobowamu.

¹⁶Rehobowamu wakafwa, ndipo wakasungika pamoza na ŵawiske mu msumba wa Davide. Ndipo Abiya mwana wakhe ndiyo wakamba kuwusa mu malo ghakhe.