Read new_tumbuka_bible 2 Midauko 14 Bible Online

2 Midauko 14 - new_tumbuka_bible bible

2 Midauko 14

¹Karonga Abiya wakafwa ndipo wakasungika pamoza na ŵawiskekuru mu msumba wa Davide. Mwana wakhe Asa ndiyo wakamba kuwusa mu malo ghakhe. Ndipo mu mazuŵa ghakhe charu chikaŵa mu mutende pa virimika khumi.

²Asa wakachita icho chikaŵa chiweme na chakunyoroka panthazi pa FUMU, Chiuta wakhe.

³Wakawuskako majochero gha ŵachiuta ŵa chilendo na malo gha pachanya ghakusoperako ndipo wakabwangandulira pasi mizati ya mawe agho ŵakasoperangamo na kuwiskira pasi Ashera.

⁴Karonga Asa wakaŵalangula ŵaYuda kuti wakwenera kuchita khumbo la FUMU, Chiuta wa ŵawiskewokuru pakusunga marango na malangulo ghakhe.

⁵Mu misumba yose ya mu charu cha Yuda, wakawuskamo malo gha pachanya ghakusoperako na kubwangandulira pasi majochero ghakochera vyakununkhira. Ntheura ufumu wa mu charu chakhe ukaŵa mu mutende.

⁶Wakazenga misumba ya malinga mu charu cha Yuda pakuti charu chikaŵa mu chimango. Mu virimika vira charu chikaŵavye nkhondo pakuti FUMU yikamupa mutende.

⁷Ndipo Asa wakaŵaphalira ŵa mu charu cha Yuda wakati, “Tiyeni tizenge misumba iyi. Tiyizingirizge na malinga na vigongwe ndipo yiŵe na vipata vyakuti tijarenge na mphingirizgo. Charu ichi chichali mu mawoko ghithu chifukwa tachita khumbo la FUMU, Chiuta withu. Tachita khumbo lakhe ndipo iyo nayo watipa mutende kosekose.” Ntheura ŵakazenga ndipo vinthu vikaŵayendera makora.

⁸Asa wakaŵa na ŵasilikari 300,000 ŵakufumira ku fuko la Yuda awo ŵakayegha nguru zikuruzikuru ndiposo na mikondo. Wakaŵaso na ŵasilikari 280,000 ŵakufumira ku fuko la Benjamini awo ŵakayegha nguru zichokozichoko na mauta. Wose ŵeneaŵa wakaŵa vinkhara vya nkhondo pera.

⁹Zera wa charu cha Etiyopiya wakiza na nkhondo kuti warwe na ŵaYuda. Iyo wakaŵa na ŵasilikari 1,000,000 na magareta 300 ndipo wakiza kafika mpaka ku msumba wa Maresha.

¹⁰Asa wakafuma kuti wakakumane nayo ndipo ŵakandanda kuti ŵarwe mu dambo la Zefata pafupi na msumba wa Maresha.

¹¹Penepapo Karonga Asa wakaromba kwa FUMU, Chiuta wakhe wakati, “Mwe FUMU, palije na yumoza wakuyana na imwe uyo wakovwira ŵanthu ŵambula nkhongono kulimbana na ŵankhongono. Tovwirani ise mwe FUMU, Chiuta withu, pakuti tikweghamira kwa imwe ndipo mu zina linu tiza kuti tirwe nkhondo na chiwuru ichi. Mwe FUMU imwe ndimwe Chiuta withu, munthu wareke kumutondani.”

¹²Ntheura FUMU yikaŵathereska ŵasilikari ŵa mu charu cha Etiyopiya panthazi pa Asa na ŵaYuda ndipo ŵasilikari ŵa charu cha Etiyopiya ŵakachimbira.

¹³Asa pamoza na ŵasilikari ŵakhe ŵakaŵachimbizga ŵasilikari ŵa charu cha Etiyopiya mpaka wakafika ku msumba wa Gerara. Ntheura ŵasilikari ŵa ku Etiyopiya ŵakamara petu, kukaŵavye na yumoza uyo wakakharapo wamoyo. Wose ŵakamara panthazi pa FUMU na panthazi pa ŵasilikari ŵakhe. Penepapo ŵasilikari ŵa charu cha Yuda ŵakatora vyakuskogha vinandi.

¹⁴Ŵakakomaso ŵanthu ŵanandi awo ŵakaŵa mu mizi yakuzingirizga msumba wa Gerara pakuti ŵakopanga FUMU. Iwo ŵakaskogha mu mizi yose iyi pakuti vyakuskogha vikaŵa vinandi chomene.

¹⁵Ŵakarwaso nkhondo na ŵaliska ŵa viŵeto awo ŵakaŵa mu misasa yawo ndipo namo ŵakatora mberere na mbuzi zinandi, ndiposo na ngamila. Pamanyuma ŵakawerera ku Yerusalemu.