Read new_tumbuka_bible 2 Midauko 16 Bible Online

2 Midauko 16 - new_tumbuka_bible bible

2 Midauko 16

¹Mu chirimika cha 36 cha kuwusa kwa Asa, Baasha, karonga wa charu cha Israele, wakaruta ku charu cha Yuda kuya karwa nkhondo na kuwuthereska. Iyo wakakhozga msumba wa Rama kuŵa wa linga mwakuti wajandizge waliyose uyo wakakhumbanga kunjira panji kufuma kwa Asa.

²Penepapo Asa wakatora ndarama za siliva na za golide izo zikaŵa mu nyumba yakusungiramo vyuma mu Nyumba ya FUMU na mu nyumba ya ufumu ndipo wakavitumizga kwa Beni Hadadi, karonga wa charu cha Siriya mweneuyo wakakharanga mu msumba wa Damaseko.

³Iyo wakaŵatuma na mazgu ghakuti, “Tiye tichite phangano la wenenawene pakati pa ine na iwe nga ndi umo ŵakachitira ŵadada na ŵawuso. Wona, nkhukutumira ndarama izo za siliva na za golide. Sono iwe urute ukamarizge phangano la wenenawene pakati pa iwe na Baasha karonga wa ku Israele mwakuti wawuskemo ŵasilikari ŵakhe mu charu chane.”

⁴Beni Hadadi wakazomerezga ivyo Karonga Asa wakayowoya. Iyo wakatuma ŵarongozgi ŵa ŵasilikari ŵakhe kuti ŵakarwe nkhondo na ŵanthu ŵa msumba ya charu cha Israele na kuŵathereska. Misumba iyo wakapoka ndi iyi: Iyoni, Dani, Abelu Mayimu na misumba yose iyo ŵakasungirangamo vyakurya ku charu cha Nafutali.

⁵Para Karonga Baasha wakapulika ichi, wakareka kuzenga linga la msumba wa Rama ndipo mlimo nawo wakawurekiska.

⁶Penepapo Karonga Asa wakiza na ŵasilikari ŵakhe wose ŵa charu cha Yuda na kutora mawe na mathabwa ghose, gheneagho Baasha wakazengeranga linga la msumba wa Rama. Na vyeneivi wakazengera malinga gha misumba ya Geba na Mizipa.

⁷Pa nyengo yeneiyo nchimi Hanani wakiza kwa Asa karonga wa charu cha Yuda ndipo wakati kwa iyo, “Chifukwa chakuti wagomezga pakuchita phangano la wenenawene na karonga wa charu cha Siriya na kureka FUMU, Chiuta wako, ŵasilikari ŵa karonga ŵa charu cha Siriya ŵakuchimbira.

⁸Asi ŵaEtiyopiya na ŵaLibiya ŵakaŵa na wumba ukuru wa ŵasilikari pamoza na magareta ghanandi chomene gha nkhondo ndiposo na ŵanthu ŵanandi ŵakugara pa mahachi? Kweni para ukagomezga mwa FUMU, FUMU yikaŵapereka mu mawoko ghako.

⁹Pakuti FUMU yikulaŵiska uku na uku mu charu chose cha pasi, kuti yipereke nkhongono ku ŵeneawo na mitima yawo yose wakujipereka kwa iyo. Iwe wachita chinthu cha kupusa chomene ndipo kufuma sono uti uŵenge pa nkhondo.”

¹⁰Chifukwa cha mazgu agho wakayowoya nchimi yira, Asa wakakaripa chomene mwakuti nchimi yira wakayikaka na magwede mu gadi. Nyengo yeneiyo Asa wakamba kuŵachitira nkhaza ŵanthu ŵanyakhe.

¹¹Milimo ya kuwusa kwa Karonga Asa kufuma pa kwamba mpaka ku umaliro, yili kulembeka mu Buku la ŵakaronga ŵa charu cha Yuda na cha Israele.

¹²Mu chirimika cha 39 cha kuwusa kwakhe, Asa wakakoreka na nthenda ya malundi ndipo nthenda iyi yikakura chomene. Ndipouli nanga ndi mu urwari wakhe uwu kuti wakazgokera kwa FUMU chara kuti wachizgike, kweni iyo wakenda mu zing'anga.

¹³Mu chirimika cha 41 cha kuwusa kwakhe, Asa wakafwa ndipo wakasungika pamoza na ŵawiske ŵakhe.

¹⁴Wakaŵikika mu dindi ilo wakajijimira yekha mu msumba wa Davide. Ŵakamuŵika pa bokosi ilo ŵakaŵikamo vyakununkhira vyakupambanapambana na mafuta gha sungu liweme ghanandi kuti thupi lireke kuvunda. Wakapembaso moto ukuru wakuti ŵamuchindikire pakumulira.