Read new_tumbuka_bible 2 Midauko 17 Bible Online

2 Midauko 17 - new_tumbuka_bible bible

2 Midauko 17

¹Yehoshafati mwana wa Asa ndiyo wakamba kuwusa mu malo mwakhe, ndipo wakaŵa wankhongono kuti walimbane na ŵaIsraele.

²Wakaŵika ŵasilikari mu misumba yose ya malinga gha mu charu cha Yuda na kwimika malo ghanyakhe uko wakakhazikiska ŵasilikari mu charu cha Yuda na mu mizi ya mu charu cha Efurayimu iyo wiske Asa wakapoka.

³FUMU yikamutumbika Yehoshafati chifukwa mu umoyo wakhe wakwambilira wakachitanga viweme ivyo wiskekuru wakhe Davide wakachitanga. Yehoshafati kuti wakalambirako chiuta Baala chara.

⁴Iyo wakateŵetera Chiuta wa wiskekuru Davide na kusunga marango ghakhe, ndipo kuti wakachita ivyo ŵakaronga ŵa charu cha Israele ŵakachitanga chara.

⁵Kwa chifukwa ichi FUMU yikakhozga ufumu wa charu cha Yuda pa nyengo iyo Yehoshafati wakawusiranga. Ŵanthu wose ŵa charu cha Yuda ŵakizanga na vyawanangwa kwa iyo. Ntheura Yehoshafati wakaŵa musambazi na wakuchindikika chomene.

⁶Wakajipereka kukuchita khumbo la FUMU ndiposo wakawuskapo malo ghose gha pachanya ghakusoperako na mizati ghakusoperako Ashera mu charu cha Yuda.

⁷Mu chirimika cha chitatu cha kuwusa kwakhe, wakimika nduna zakhe izi: Beni Hayili, Obadiya, Zakariya, Netanele na Mikaya kuŵa ŵasambizgi mu misumba ya charu cha Yuda.

⁸Nduna zira zikaruta pamoza na ŵaLevi ŵankhonde na ŵanayi ndipo na ŵasofi ŵaŵiri. ŴaLevi ŵakaŵa aŵa: Shemaya, Netaniya, Zebadiya, Asahele, Shemiramoti, Yehonatani, Adoniya, Tobiya na Tobu Adoniya. Ŵasofi ŵakaŵa aŵa: Elishama na Yehoramu.

⁹Ŵanthu aŵa ŵakatora Buku la Marango gha FUMU ndipo ŵakenda kusambizga ŵanthu mu misumba yose ya charu cha Yuda.

¹⁰Chofyo cha FUMU chikawira pa maufumu ghose gha vyaru ivyo vikazingirizga charu cha Yuda. Ntheura Yehoshafati kuti ŵakarwa nayo nkhondo chara.

¹¹ŴaFilisiti ŵanji ŵakiza na vyawanangwa vya ndarama za siliva kwa Yehoshafati kuŵa msonkho. ŴaArabu nawo ŵakiza na vyawanangwa vya mberere zanarume zakukwana 7,700 na ŵapepe ŵakukwana 7,700.

¹²Ntheura nkhongono za Yehoshafati zikakulirangakuliranga. Wakazenga malinga na misumba yakusungiramo mahomwa mu charu cha Yuda.

¹³Ntheura wakaŵa na mahomwa ghanandi gha nkhondo mu misumba ya charu cha Yuda. Wakaŵaso na ŵasilikari awo ŵakaŵa vinkhara vya nkhondo mu msumba wa Yerusalemu.

¹⁴Ŵasilikari awo ŵakalembeka kwakuyana na mbumba za ŵawiskewokuru zikaŵa ntheura: Mu mbumba ya Yuda, mukafuma ŵarongozgi ŵa nkhondo ŵa ŵasilikari 1,000. Adina ŵakaŵa murongozgi wa ŵasilikari 300,000.

¹⁵Wa chiŵiri kwa Adina wakaŵa Yehohanani murongozgi wa ŵasilikari 280,000.

¹⁶Wa chitatu kwa Adina wakaŵa Amasiya mwana wa Zikiri mweneuyo wakajipereka kuteŵetera FUMU ndipo wakaŵa na ŵasilikari 200,000.

¹⁷Mu mbumba ya Benjamini mukafuma Eliyada, musilikari wankhongono uyo wakaŵa murongozgi wa ŵasilikari 200,000 awo ŵakaŵa na mauta na zinguru.

¹⁸Wa chiŵiri kwa Eliyada wakaŵa Yehozabadi uyo wakaŵa murongozgi wa ŵasilikari 180,000 ŵeneawo ŵakaŵa wakunozgekera nkhondo.

¹⁹Aŵa ndiwo ŵakateŵeteranga karonga pa dera pa awo wakaŵakhazika mu misumba ya malinga mu charu chose cha Yuda.