Read new_tumbuka_bible 2 Midauko 18 Bible Online

2 Midauko 18 - new_tumbuka_bible bible

2 Midauko 18

¹Karonga Yehoshafati wa charu cha Yuda wakaŵa musambazi na wakuchindikika chomene. Sono nyengo yimoza ŵakakorana kunozga nthengwa ya ŵanthu ŵanyakhe pakati pa mbumba yakhe na mbumba ya Ahabu, karonga wa Israele.

²Para vikati vya jumphapo virimika vinji, Yehoshafati wakaruta kuti wakachezgere Ahabu mu msumba wa Samariya. Ndipo Ahabu wakamukomera iyo na ŵanthu awo ŵakaŵa nawo mberere, mbuzi na ng'ombe zinandi kurongora kuti waŵapokerera makora. Wakamukopa Yehoshafati kuti warute nayo kuya karwa nkhondo na ŵanthu ŵa msumba wa Ramoti Gileyadi.

³Ahabu karonga wa charu cha Israele wakamufumba Yehoshafati karonga wa charu cha Yuda kuti, “Kasi uti urutenge nane kuya karwa nkhondo na ŵanthu ŵa msumba wa Ramoti Gileyadi.” Yehoshafati wakazgora wakati, “Ine ndili muchanya kale nga ndimwe. Ŵasilikari ŵane nawo mbakunozgeka nga ndi ŵinu. Titi tirutenge namwe ku nkhondo.”

⁴Kweni Yehoshafati wakatiso kwa Ahabu, karonga wa charu cha Israele, “Chakwamba mufumbe urongozgi kwa FUMU.”

⁵Penepapo karonga wa ku Israele wakawunganya pamoza nchimi zakukwana 400 ndipo wakazifumba wakati, “Kasi tingaruta kuya karwa nkhondo na ŵanthu ŵa msumba wa Ramoti Gileyadi panji chara?” Nchimi zira zikazgora zikati, “Rutani pakuti Chiuta wamkuŵapereka ŵanthu ŵa msumba ura mu mawoko gha imwe karonga.”

⁶Kweni Yehoshafati wakafumba wakati, “Kasi kuno kulije nchimi yinyakhe ya FUMU iyo tingaruta kuya kafumbako?”

⁷Karonga wa ku Israele wakamuzgora Yehoshafati wakati, “Yakharako nchimi yimoza yeneiyo tingaruta kuya kafumbako vya FUMU. Nchimi iyi ndi Mikaya, mwana wa Imila. Kweni ine nkhuyitinkha chifukwa yikuchima viweme vya ine chara, kweni viheni pera.” Yehoshafati wakazgora wakati, “Karonga, mureke kuyowoya ntheura.”

⁸Penepapo karonga wa ku Israele wakachema yumoza wa nduna zakhe ndipo wakati kwa iyo, “Ruta luŵiro ukamutore Mikaya mwana wa Imila.”

⁹Sono Ahabu karonga wa ku Israele na Yehoshafati karonga wa charu cha Yuda wakakhara pa vizumbe vyawo uku ŵavwara minjilira ya ufumu. Ŵakakhara pa luwugha pa muryango wa chipata cha msumba wa Samariya ndipo nchimi zose zikachimanga panthazi pawo.

¹⁰Zedekiya mwana wa Kenaana wakafura masengwe gha chisulo ndipo wakayowoya wakati, “FUMU yikuti, ‘Na masengwe gheneagha muti murwe nkhondo na ŵaSiriya mpaka ŵamare petu.’ ”

¹¹Nchimi zinyakhe zose zira zikachimanga ntheura pera kuti, “Rutani ku msumba wa Ramoti Gileyadi chifukwa mwamkuwuthereska, pakuti FUMU yawupereka mu mawoko gha imwe karonga.”

¹²Nchimi iyo yikaruta kuya kachema nchimi Mikaya yikati kwa iyo, “Wona nchimi zinyako zose zikuchima chinthu chimoza kuti karonga wamkutonda. Iwe nawe ukachime nga ndi umo ŵanyako ŵakuchimira. Ukachime vinthu viweme.”

¹³Kweni Mikaya wakati, “Nkhurapira mwa FUMU yamoyo kuti chose icho Chiuta wane wati wandiphalire, ndicho nditi ndiyowoye.”

¹⁴Para Mika wakafika, Karonga Ahabu wakamufumba wakati, “Iwe Mika, kasi ndingaruta kuya karwa nkhondo na ŵanthu ŵa msumba wa Ramoti Gileyadi panji chara?” Mika wakazgora wakati, “Rutani ndipo mwamkuwuthereska, pakuti ŵanthu ŵa mwenemura ŵamkuperekeka mu mawoko ghinu.”

¹⁵Kweni Karonga Ahabu wakafumba wakati, “Kasi ukukhumba kuti ndikurapizge kalinga mu zina la FUMU mwakuti ureke kundiphalira vyawakawaka kweni unenesko pera.”

¹⁶Mikaya wakazgora wakati, “Nkhawona ŵasilikari ŵa charu cha Israele ŵakumbininika mu mapiri nga ndi mberere zambula muliska ndipo FUMU yikati, ‘Ŵanthu aŵa ŵalije murongozgi. Musilikari yose wawerere ku kwakhe mu mutende.’ ”

¹⁷Karonga wa ku Israele wakati kwa Yehoshafati, “Asi ndangukuphalira kuti munthu uyu wakuchimira viweme vya ine chara, kweni viheni pera.”

¹⁸Mikaya wakarutilira kuyowoya kwa Ahabu kuti, “Sono pulikani mazgu gha FUMU: Nkhawona FUMU yakhara pa chizumbe chakhe pamoza na ŵangelo ŵakhe wose ŵimilira ku woko lakhe la maryero na la mazere.”

¹⁹Ndipo FUMU yikayowoya yikati, “Kasi wangaŵa njani uyo wangaruta kuya kapusika Ahabu karonga wa charu cha Israele kuti warute kuya karwa nkhondo na msumba wa Ramoti Gileyadi mwakuti wakafwire kwenekura?” Munyakhe wakayowoyanga ichi ndipo yunji nayo wakayowoyanga chinyakhe.

²⁰Pamanyuma mzimu ukiza panthazi ndipo ukati kwa FUMU, “Ine ndingaruta kuti nkhamupusike” FUMU yikawufumba yikati, “Kasi uti umupusike na vichi?”

²¹Mzimu ura wakati, “Nditi ndirute kuti nkhaŵe mzimu wa utesi mu milomo ya nchimi zakhe zose.” FUMU yikati, “Mwa ntheura uti umupusikenge nadi. Ruta ukachite ntheura.”

²²Ntheura Mikaya wakamarizga kuyowoya kuti, “Ichi ndicho chachitika. FUMU yaŵika mzimu wa utesi mu nchimi zako izi kuti zikupusike. Kweni FUMU iyo yekha yayowoya kuti iwe wamkukumana na soka.”

²³Penepapo nchimi Zedekiya mwana wa Kenaana wakasenderera kufupi wakamutimba Mikaya pa thama ndipo wakamufumba kuti, “Kasi Mzimu wa FUMU wenda nthowa nji kufuma kwa ine kwiza kayowoya kwa iwe?”

²⁴Mikaya wakamuzgora wakati, “Uti umanyenge ichi pa zuŵa ilo wizamkuchimbilira mu kachipinda kamukati mwa nyumba kuti ukabisamemo.”

²⁵Ndipo Ahabu karonga wa ku Israele wakalangula kuti, “Mukorani Mikaya ndipo mumuwezgere kwa Amoni nduna ya msumba na kwa Yowashi mwana wa karonga.”

²⁶Ŵanthu awo mukaŵaphalire mukati, “Karonga wakati, ‘Munthu uyu mumuŵike mu gadi, mumupenge chakurya chichoko chomene na maji ndisuke nkhawereko mu mutende.’ ”

²⁷Mikaya wakati, “Usange nadi wamkuwera mu mutende, ipo FUMU yilije kuyowoya mwa ine.” Ndipo wakayowoyaso wakati, “Mwa ŵanthu mose pulikani ku icho nkhumuphalirani!”

²⁸Ntheura Ahabu karonga wa charu cha Israele na Yehoshafati karonga wa charu cha Yuda ŵakaruta kuti ŵakarwe nkhondo na ŵanthu ŵa msumba wa Ramoti Gileyadi.

²⁹Karonga Ahabu wa charu cha Israele wakati kwa Yehoshafati, “Ine nditi ndijizgore chisko chane pakuruta ku nkhondo, kweni iwe uvware malaya ghako gha ufumu.” Ntheura karonga wa charu cha Israele wakajizgora chisko chakhe na kuŵa nga ndi munthu munyakhe ndipo wakaruta ku nkhondo.

³⁰Karonga wa charu cha Siriya wakaŵalangula ŵarongozgi ŵakhe ŵa nkhondo ŵakwendeska magareta kuti, “Mureke kuya karwa nkhondo na musilikari waliyose chara manyi ndi murara panji muchoko, kweni mukarwe na karonga wa charu cha Israele pera.”

³¹Para ŵarongozgi ŵa magareta ŵara ŵakati ŵawona Yehoshafati, wakaghanaghana kuti ndi karonga wa charu cha Israele. Ntheura ŵakawerera kuti ŵarwe nayo, kweni Yehoshafati wakachemerezga ndipo FUMU Chiuta yikamovwira, na kuŵawezgera kunyuma ŵasilikari ŵa magareta ŵara.

³²Pakuti ŵasilikari ŵa magareta ŵara ŵakati ŵawona kuti ndi karonga wa charu cha Israele chara, ŵakareka kumurondezga.

³³Kweni musilikari wa charu cha Siriya wakaponya muvwi chiponyeponye ndipo kwambula kumanya wakalasa Ahabu, karonga wa charu cha Israele, pakati pa ngunya ya pa chifuŵa na malaya ghakhe gha chisulo. Penepapo Ahabu wakati kwa musilikari uyo wakendeskanga gareta lakhe, “Wezga gareta lako ndipo tifumeko kuno ku nkhondo pakuti ndalasika chomene.”

³⁴Zuŵa lose lira nkhondo yikakura chomene ndipo Ahabu karonga wa charu cha Israele wakafyenyeka pa gareta lakhe na kulaŵiska sirya ŵasilikari ŵaSiriya mpaka ku na mise. Para dazi likanjiranga Ahabu wakafwa.