Read new_tumbuka_bible 2 Midauko 19 Bible Online

2 Midauko 19 - new_tumbuka_bible bible

2 Midauko 19

¹Yehoshafati karonga wa charu cha Yuda wakawerako ku nkhondo mu mutende ndipo wakiza ku nyumba yakhe ku Yerusalemu.

²Kweni muwoni Yehu mwana wa Hanani wakaruta kuti wakakumane na Karonga Yehoshafati ndipo wakati kwa iyo, “Kasi nkhuweme kovwira ŵanthu ŵaheni na kutemwa awo ŵakutinkha FUMU? Pa chifukwa ichi FUMU yakwiya chomene pa icho wachita.

³Ndipouli, uweme uchalimo mwa iwe pakuti wawuskamo mu charu mizati yose yakusoperapo Ashera ndipo waŵika mtima wako pakuchita khumbo la Chiuta.”

⁴Yehoshafati wakakharanga ku msumba wa Yerusalemu. Ndipouli wakaŵayenderanga ŵanthu kaŵirikaŵiri kufuma ku msumba wa Beyeresheba mpaka ku charu cha mapiri gha Efurayimu kuti waŵawezgere ŵanthu kwa FUMU, Chiuta wa ŵawiskewokuru.

⁵Wakimika ŵeruzgi mu msumba wa linga uliwose mu charu cha Yuda.

⁶Iyo wakaŵaphalira ŵeruzgi kuti, “Muchenjere na umo mukweruzgira, pakuti para mukweruzga kuti mukweruzgira munthu chara, kweni FUMU mweneuyo wakuŵa namwe nyengo yose para mukweruzga mirandu.

⁷Ntheura mopenge FUMU. Muchenjere na umo mukweruzgira pakuti FUMU, Chiuta withu kuti wakuzomerezga chara weruzgi wakubendera panji sankho nesi vimbundi.”

⁸Mu Yerusalemu, Yehoshafati namo wakimika ŵaLevi ŵanji, ŵasofi na ŵarara ŵa mu nyumba za ŵawiskewokuru kuti ndiwo ŵeruzgenge mu zina la FUMU na kudumula mirandu ya ŵanthu. Iwo ŵakakharanga mu Yerusalemu.

⁹Yehoshafati wakaŵalangula kuti, “Mukwenera kuteŵetera FUMU mwakugomezgeka pakumopa iyo na mtima winu wose.

¹⁰Pa mrandu uliwose uwo uti wizenge kufuma ku ŵabali ŵinu awo ŵakukhara mu msumba uliwose, manyi ungaŵa mrandu wakukoma panji wakwanangira marango panji malangulo panji vilayizgo spanji maluso, imwe mukwenera kuŵachenjezga mwakuti ŵareke kunangira FUMU mzire ukari wakhe wize pa imwe na pa ŵabali ŵinu. Muchitenge ntheura mwakuti mureke kuŵa na mrandu.

¹¹Amariya musofi mukuru ndiyo waŵenge murongozgi winu pa chilichose cha kukhwaskana na FUMU ndipo Zebadiya mwana wa Ishimaele mweneuyo ndi murongozgi wa fuko la Yuda ndiyo waŵenge murongozgi pa chilichose cha kukhwaskana na karonga. ŴaLevi ŵati ŵaŵenge ŵararaŵarara ŵinu. Ntheura muŵe na chikanga ndipo FUMU yiŵe na awo ŵakuchita uweme.”