Read new_tumbuka_bible 2 Midauko 2 Bible Online

2 Midauko 2 - new_tumbuka_bible bible

2 Midauko 2

¹Sono Karonga Solomoni wakakhumba kuti wazenge Nyumba ya Chiuta yakuchindikiramo zina la FUMU ndipo na kuzengaso nyumba yakhe ya ufumu.

²Solomoni wakalemba ŵanthu ŵakuyegha katundu ŵakukwana 70,000, ŵakucheka mawe ku mapiri ŵakukwana 80,000 ndipo ŵakulaŵirira nchito ŵakukwana 3,600.

³Solomoni wakatuma mazgu kwa Huramu, karonga wa charu cha Ture, ghakuti, “Unditumizgire makuni gha milanje nga ndi umo ukatumizgiranga kwa Davide, ŵadada, para ŵakakhumba kuzengera nyumba yawo yakukharamo.

⁴Ine sono nkhukhumba kuzenga nyumba yakuchindikiramo zina la FUMU, Chiuta wane. Nditi ndiyipatuliskire kwa iyo kuŵa nyumba yakocheramo vyakununkhira vya sungu liweme panthazi pakhe, yakuperekeramo chingwa chakurongora uŵapo wakhe zuŵa na zuŵa, yakuperekeramo sembe zakocha na mulenje na na mise, mu maSabata ghose, pa chiphikiro cha kuthwasa kwa mwezi uliwose, ndipo na pa viphikiro vyakwimikika vya FUMU, Chiuta withu, nga ndi umo chili kwimikikira mu charu cha Israele kwa muyirayira.

⁵Nyumba ya Chiuta iyo nkhukhumba kuzenga yiti yiŵenge yikuru pakuti Chiuta withu ndi mukuru kuruska ŵachiuta ŵanyakhe wose.

⁶Kweni kasi ndi njani wangamanya kuzengera Chiuta nyumba yakhe apo charu cha kuchanya, inya nanga ndi charu cha kuchanya nkhanira kuti vikumukwana chara? Kasi ine ndine njani kuti ndimuzengere nyumba ya ntheura, kweni kuŵa kanyumba kakocheramo vyakununkhira pera panthazi pakhe?

⁷Ntheura sono unditumizgire munthu uyo ndi nkhwantha pa mlimo wa golide, wa siliva, wa mkuŵa na wa visulo. Waŵeso nkhwantha pakupanga salu yichesamu, yiswesi na wa bululu nga ndi mtambo ndiposo na pakuzonga mawe. Munthu uyo wize kuti wizakateŵetere mu charu cha Yuda na mu msumba wa Yerusalemu pamoza na nkhwantha za kuno ŵeneawo ŵadada Davide ŵakandirekera.

⁸Unditumizgireso mathabwa gha makuni gha milanje na gha mulombwa ndiposo na gha muŵanga kufuma mu nkhorongo ya Lebanoni. Pakuti nkhumanya kuti ŵateŵeti ŵako ndi nkhwantha pakucheka mathabwa mu Lebanoni ndipo ŵateŵeti ŵane ŵati ŵaŵenge pamoza na ŵateŵeti ŵako.

⁹Iwo ŵati ŵacheke mathabwa ghanandi chifukwa Nyumba ya Chiuta iyo nkhukhumba kuzenga yiŵenge yikuru na yakuzukumiska.

¹⁰Ŵateŵeti ŵako awo ŵati ŵacheke mathabwa ndizamkuŵapa tirigu wakupwantha wakukwana matani 20,000, nyauti wakukwana matani 2,000, vinyo wakukwana malita 440,000 ndiposo na mafuta gha maolive ghakukwana malita 440,000.”

¹¹Ntheura Huramu, karonga wa ku Ture wakamuzgora Solomoni pakumulembera karata iyo wakalembamo kuti, “Pakuti FUMU yikuŵatemwa ŵanthu ŵakhe ndicho chifukwa yili kukwimika iwe kuŵa karonga wawo.”

¹²Karonga Huramu wakalembaso, “Yichindikike FUMU, Chiuta wa Israele mweneuyo wakalenga kuchanya na pasi. Iyo wakamupa Karonga Davide mwana wa mahara, wakuzura na vinjeru na umanyi mweneuyo wati wazengerenge FUMU nyumba yakhe ndiposo na nyumba yakhe ya ufumu.

¹³Ntheura sono ndakutumira Huramu, nkhwantha yakuchenjera na yakumanya vinthu.

¹⁴Iyo ŵanyina ŵakufumira ku fuko la Dani ndipo ŵawiske ŵakufumira ku charu cha Ture. Munthu uyu ndi nkhwantha pa mlimo wa golide, wa siliva, wa mkuŵa na visulo, wa mawe, na wa mathabwa. Wakumanyaso kupanga salu zichesamu, za bululu, ziswesi na za bafuta muweme. Wakumanya kuzonga tunthu twa kupambanapambana ndipo wakuchitaso kalikose ako munthu wangamuphalira kuti wachite. Munthu uyu wati ŵateŵetenge pamoza na nkhwantha zako na za sekuru wane Davide, ŵawuso ŵako.

¹⁵Ntheura sono sekuru wane, vinthu ivyo mwavizunura, tirigu, nyauti, mafuta, ndiposo na vinyo mutumizgire ŵateŵeti ŵinu.

¹⁶Ndiposo ise titi titume mathabwa agho tichekenge kufuma mu Lebanoni gheneagho mukughakhumba. Ise titi tighatume mu mizigho pakughayenjamiska pa nyanja kwiza kafika ku msumba wa Yopa ndipo imwe mughatorere ku msumba wa Yerusalemu.”

¹⁷Ntheura Solomoni wakapenda ŵalendo wose awo ŵakaŵa mu charu cha Israele nga ndi umo Davide, ŵawiske ŵakachitira ndipo wakasanga ŵalendo 153,600.

¹⁸Wakapatulapo pa iwo ŵalendo 70,000 kuŵa ŵakuyegha katundu ndipo 80,000 kuŵa ŵakuŵaja mawe mu mapiri ndipo ŵanthu 3,600 kuŵa ŵakulaŵirira ŵanchito ŵara.