Read new_tumbuka_bible 2 Midauko 20 Bible Online

2 Midauko 20 - new_tumbuka_bible bible

2 Midauko 20

¹Pamanyuma pa ichi, ŵasilikari ŵa charu cha ŵaMowabu na ŵaAmoni pamoza na ŵanji mu ŵaMeyuni ŵakiza kuti ŵarwe nkhondo na Yehoshafati.

²Ŵanthu ŵanyakhe ŵakiza kwa Karonga Yehoshafati ndipo ŵakati kwa iyo, “Wumba ukuru wa ŵasilikari ukwiza kuti urwe namwe nkhondo. Ŵeneaŵa ŵafuma ku charu cha Aramu, sirya lira la Nyanja ya Muchere ndipo msumba wa Hazazoni Tamara ŵawupoka kale. Msumba wa Hazazoni Tamara ndi zina lakhe linyakhe la msumba wa Engedi.”

³Penepapo Yehoshafati wakopa ndipo wakaghanaghana kuti wafumbe kwa FUMU ndipo wakapharazga mu charu chose cha Yuda kuti ŵanthu ŵaziŵizge kurya.

⁴Ŵanthu ŵa mu charu chose cha Yuda ŵakawungana mu msumba wa Yerusalemu kuti ŵarombe wovwiri kwa FUMU. Ndipo nadi ŵanthu ŵakiza kufumira mu misumba ya mu charu cha Yuda kuti ŵasange urongozgi wa Chiuta.

⁵Penepapo Yehoshafati wakimilira mukati mu wumba wa ŵanthu mu Yerusalemu mu Nyumba ya FUMU panthazi pa baraza liphya.

⁶Iyo wakaromba wakati, “Mwe FUMU, Chiuta wa ŵasekuru ŵithu, asi imwe ndimwe Chiuta uyo wali kuchanya? Imwe ndimwe mukuwusa maufumu ghose gha ŵamitundu. Nkhongono na mazaza vili mu woko linu ndipo palije na yumoza uyo wangimikana namwe.

⁷Mwe Chiuta withu, asi ndimwe mukachimbizgamo ŵanthu ŵa mu charu ichi panthazi pa ŵanthu ŵinu ŵaIsraele na kuchipereka kwa muyirayira ku ŵa mphapu ya Abrahamu wakutemweka winu?”

⁸Iwo ŵakakhara mwenemumo ndipo ŵali kumuzengerani Nyumba yinu Yakupatulika kuti ŵachindikirengemo zina linu. Iwo ŵakayowoya kuti,

⁹“Usange visuzgo vyatiwira nga nchilango, manyi ndi nkhondo, panji chilengo, panji njara, tamkwiza na kwimilira panthazi pa nyumba yinu iyo yikumanyikwa na zina linu. Ise tizamkulirira kwa imwe visuzgo vyithu na kuti imwe mwizamkutipulika na kutiponoska.”

¹⁰“Kweni sono wonani ŵasilikari aŵa awo ŵafuma ku charu cha ŵaAmoni, ŵaMowabu, na ŵa ku Phiri la Edomu awo ŵiza kuti ŵarwe nase. Para ŵasekuru ŵithu ŵakafuma mu charu cha Eguputo, imwe kuti mukaŵazomerezga chara kuti ŵanjire mu vyaru vyawo. Ntheura ŵasekuru ŵithu wakaŵareka ndipo kuti wakaŵakoma chara.

¹¹Sono wonani umo ŵakukhumbira kuwezgera nduzga kwa ise pakwiza katichimbizgamo mu charu icho mukatipa kuŵa chiharo chithu.

¹²Imwe Chiuta withu, kasi muti muyeruzgenge chara? Pakuti nkhongono tilije zakuti timikirane na chiwuru chikuru cha ŵasilikari aŵa, awo ŵakukhumba kurwa nase. Tikumanya chara icho tingachita, kweni ise tikulaŵiska kwa imwe kuti mutovwire.”

¹³Pa nyengo iyi ŵanthu wose ŵa mu charu cha Yuda ŵakimilira panthazi pa FUMU pamoza na ŵawoli ŵawo, ŵana ŵawo na twa bonda twawo.

¹⁴Penepapo Mzimu wa FUMU wakiza pa muLevi yumoza uyo wakaŵapo pa ungano ura. MuLevi yura wakaŵa Yahaziyele mwana wa Zakariya, mwana wa Benaya, mwana wa Yeyiyele, mwana wa Mataniya. Iyo wakaŵa wa mbumba ya Asafu.

¹⁵Yahaziyele wakati, “Pulikani imwe Karonga Yehoshafati na mwa ŵanthu mose ŵa mu charu cha Yuda ndiposo imwe mukukhara mu Yerusalemu. FUMU yikuti, ‘Mungopanga nanga nkhuthika lusoko chifukwa cha chiwuru chikuru ichi, pakuti nkhondo njinu chara, kweni nja FUMU.

¹⁶Na machero murute waka kuti mukarwe nawo. Wonani iwo wamkwizira pa chikwera cha Zizi ndipo mwamkuŵasanga pa umaliro wa dambo, ku mafumiro gha dazi kwa mapopa gha ku Yeruwele.

¹⁷Imwe ŵaYuda na imwe mukukhara mu Yerusalemu, mu nkhondo iyi mwamkukhumbikwa chara kuti mukarwenge. Imwe mukaŵe mu malo ghinu na kwimilira waka chete. Mwamkuwona umo FUMU yamkuthereskera ŵarwani ŵinu ŵara mu malo mwinu. Ntheura mungopanga nanga nkhuthika lusoko. Na machero murute waka kuti mukarwe nawo ndipo FUMU yamkuŵa namwe.’ ”

¹⁸Penepapo Yehoshafati wakasindamira pasi, ndipo ŵanthu wose ŵa charu cha Yuda pamoza na awo ŵakakharanga mu Yerusalemu nawo ŵakajikama na kulambira FUMU.

¹⁹Penepapo ŵaLevi ŵanji ŵa mbumba ya Kohati na Kora ŵakimilira ndipo ŵakarumba FUMU, Chiuta wa Israele na mphomo yikuru chomene.

²⁰Na machero ghakhe na mulenje chomene ŵakaruta ku mapopa gha ku msumba wa Tekowa. Para ŵakarutanga Yehoshafati wakimilira, ndipo wakati kwa iwo, “Mundipulike imwe mwa ŵaYuda na imwe mukukhara mu Yerusalemu! Gomezgani mwa FUMU, Chiuta winu ndipo muti mukhozgekenge. Gomezgani ivyo nchimi zikuyowoya kwa imwe ndipo muti muchite makora.”

²¹Yehoshafati wakati wayowoyeskana na ŵanthu, wakimika ŵanthu ŵanji kuti ŵimbirenge FUMU na kuyirumba mu utozi wa utuŵa wakhe. Uku ŵakwenda panthazi pa ŵasilikari, ŵakimbanga ntheura: “Wongani FUMU, pakuti chisungusungu chakhe, chikukhalirira kwa muyirayira.”

²²Para ŵanthu ŵakambanga kwimba na kurumba, FUMU yikaŵika ŵasilikari ŵakukhazga kuti ŵarwe na ŵasilikari ŵa charu cha ŵaAmoni, ŵaMowabu ndiposo na ŵa ku Phiri la Edomu ŵeneawo ŵakizanga na nkhondo mu charu cha Yuda ndipo wose ŵakaŵathereska.

²³Ŵasilikari ŵa ŵaAmoni na ŵa ŵaMowabu ŵakawukira ŵasilikari ŵa ku Phiri la Edomu na kuŵamara petu. Ndipo ŵakati ŵaŵamara ŵasilikari ŵa ku Phiri la Edomu, ŵa Amoni na ŵaMowabu ŵakamba kukomana ŵekhaŵekha.

²⁴Para ŵasilikari ŵa charu cha Yuda ŵakafika pa chigongwe cha ŵalinda mu mapopa, ŵakawona vitanda vyagonerana ndipo pakaŵavye na yumoza uyo wakachimbirapo.

²⁵Ntheura Yehoshafati pamoza na ŵasilikari ŵakhe ŵakiza ndipo ŵakaskogha katundu wawo. Ŵakasanga ng'ombe zinandi, vyuma, vyakuvwara na vinthu vyakuzirwa vyeneivyo ŵakajitorera waka, ŵakasuka ŵakatondeka kusazgirapo kuyegha vinyakhe. Pakuti vyakuskogha vikaŵa vinandi chomene. Ŵakatora mazuŵa ghatatu.

²⁶Ndiposo pa zuŵa la chinayi ŵakawungana pa Dambo la Beraka pakuti kwenekura ŵakayitumbika FUMU. Ichi ndicho chifukwa malo ghara ghakuchemeka Dambo la Beraka mpaka na sono.

²⁷Uku ŵakurongozgeka na Yehoshafati, ŵasilikari ŵakhe wose ŵa mu charu cha Yuda na awo ŵakakharanga mu Yerusalemu ŵakawerera ku msumba wa Yerusalemu. Ndipo ŵakaŵa na chimwemwe chikuru chifukwa FUMU yikaŵakondweska pakuŵathereska ŵarwani ŵawo.

²⁸Ŵakafika mu Yerusalemu na kuya kanjira mu Nyumba ya FUMU uku wakwimba ŵabango, ŵafyoliro na zimbata.

²⁹Wofi ukawira maufumu gha mu vyaru para ŵakapulika umo FUMU yikathereskera ŵarwani ŵa Israele.

³⁰Ntheura ufumu wa Karonga Yehoshafati ukaŵa pa mutende pakuti Chiuta wakhe wakamupumuzga ku ŵarwani ŵakhe wose.

³¹Ntheura Yehoshafati wakawusa charu cha Yuda ndipo apo wakambiranga kuwusa, wakaŵa na virimika 35. Wakawusira Yerusalemu pa virimika 25. Nyina wakaŵa Azuba mwana wa Shili.

³²Yehoshafati wakarondezga machitiro gha wiske Asa ndipo kuti wakapatukako chara. Wakachita icho chikaŵa chiweme panthazi pa FUMU.

³³Ndipouli visopo ivyo vikachitikanga pa malo gha pachanya ghakusoperako kuti wakavikanizga chara. Ŵanthu ŵakaŵa ŵachali ŵandaŵikepo mtima pa Chiuta wa ŵawiskewokuru.

³⁴Milimo yinyakhe ya Yehoshafati iyo wakachita kufuma pakwamba mpaka pa umaliro, yili kulembeka mu mudauko wa Yehu mwana wa Hanani mweneuyo wali kulemba mu Buku la ŵakaronga ŵa charu cha Israele.

³⁵Pamanyuma pa ichi Yehoshafati, karonga wa charu cha Yuda wakaŵa pa wenenawene na Ahaziya, karonga wa charu cha Israele mweneuyo wakachitanga viheni vinandi.

³⁶Wakaŵa pamoza pakupanga ngaraŵa kuti zirutenge ku charu cha Tarishishi pakuchita malonda ghawo. Ngaraŵa izi ŵakazipangira ku dowoko la Eziyoni Gebere.

³⁷Kweni Eliyezere mwana wa Dodavahu wa ku msumba wa Maresha wakachima zakumususka Yehoshafati kuti, “Chifukwa chakuti waŵa pa wenenawene na Ahaziya, FUMU yiti yipankhure icho mwapanga.” Ngaraŵa zira zikasweka nadi kuti zikarutako ku charu cha Tarishishi kukachita malonda chara.