Read new_tumbuka_bible 2 Midauko 21 Bible Online

2 Midauko 21 - new_tumbuka_bible bible

2 Midauko 21

¹Yehoshafati wakafwa ndipo wakasungika ku mararo gha ufumu mu msumba wa Davide. Ndipo mwana wakhe Yehoramu ndiyo wakamba kuwusa mu malo mwakhe.

²Karonga Yehoshafati wakaŵa na ŵana ŵanyakhe ŵanarume pa dera pa Yehoramu. Ŵana awo ndi aŵa: Azariya, Yehiyele, Zakariya, Azariyahu, Mikayele na Shefatiya.

³Wiskewo wakaŵapa vyawanangwa vinandi vya siliva, vya golide na vinthu vinyakhe vya kuzirwa. Wakaŵapaso misumba ya malinga gha mu charu cha Yuda, kweni ufumu wakapereka kwa Yehoramu pakuti ndiyo wakaŵa mwana wa uŵere.

⁴Para Yehoramu wakakhara pa chizumbe cha ufumu cha ŵawiske ŵakhe na kuwukhozga ufumu ura, wakakoma ŵana ŵanyakhe wose ŵara na lupanga ndiposo na nduna zinyakhe za charu cha Yuda.

⁵Yehoramu wakaŵa na virimika 32 apo wakambiranga kuwusa charu cha Yuda ndipo wakaŵa karonga pa virimika vinkhonde na vitatu mu Yerusalemu.

⁶Yehoramu wakachita viheni panthazi pa Fumu ivyo ŵakaronga ŵa charu cha Israele ŵakachitanga, pakuti wakatora mwana wa Ahabu muwoli wakhe. Ŵa mu mbumba ya Ahabu ŵakachitanga viheni vyeneivi.

⁷Ndipouli, chifukwa cha phangano ilo FUMU yikachita na Davide, kuti yikakhumba kuŵamara ŵa mu nyumba ya Davide chara. FUMU yikapangana kuti mbumba ya Davide ndiyo yiti yiŵenge nga ndi nyali yakuwusa kwa muyirayira.

⁸Pa nyengo ya kuwusa kwa Yehoramu, ŵaEdomu ŵakagarukira ufumu wa charu cha Yuda ndipo wakajimikira karonga wawo na wawo.

⁹Sono Yehoramu wakaruta pamoza na ŵarongozgi ŵakhe ŵa nkhondo na magareta ghakhe ghose. Kwenekura ŵaEdomu ŵakamuzingirizga Yehoramu pamoza na ŵarongozgi ŵa magareta, kweni iyo pamoza na ŵarongozgi ŵa magareta ŵara ŵakawuka na usiku na kurwa nawo nkhondo, ndipo wakati wathereskeka, wakachimbira.

¹⁰Ntheura ŵaEdomu mbakugarukira charu cha Yuda mpaka sono. Ŵanthu wa msumba wa Libina nawo ŵakamugarukira Yehoramu pa nyengo yeneiyo, chifukwa wakayireka FUMU, Chiuta wa ŵawiskemwekuru.

¹¹Ndipo wakazengaso malo gha pachanya ghakusoperako mu charu cha Yuda, na kuchitiska kuti ŵanthu ŵa mu Yerusalemu ŵareke kugomezgeka kwa FUMU. Ntheura wakaŵapuruska ŵaYuda.

¹²Yehoramu wakapokera karata kufuma kwa nchimi Eliya ndipo karata yira yikalemba kuti, “FUMU, Chiuta wa ŵawuso Davide wakuti, ‘Iwe wareka kurondezga vyakuchita vya ŵawuso Yehoshafati panji vya Asa ŵakaronga wa charu cha Yuda.

¹³Kweni ŵarondezga vyakuchita vya ŵakaronga ŵa charu cha Israele ndipo waŵapuruska ŵa mu charu cha Yuda na ŵa mu msumba wa Yerusalemu kuti ŵareke kugomezgeka kwa Chiuta nga ndi umo Ahabu wakaŵapuruskira ŵaIsraele. Ndiposo wakakomaso ŵana ŵanyako ŵa mu nyumba ya ŵawuso ŵeneawo ŵakaŵa ŵaweme kuruska iwe.

¹⁴Pa chifukwa ichi FUMU yiti yiŵalenge ŵanthu ŵako, ŵana ŵako, ŵawoli ŵako na vyose ivyo uli navyo na nthenda yakofya chomene.

¹⁵Ndipo iwe wamwene uti usuzgikenge na nthenda ya mu matumbo ya kupweteka chomene iyo yikulirengekulirenge zuŵa na zuŵa.’ ”

¹⁶Penepapo FUMU yikakhuŵirizga ŵaFilisiti na ŵaArabu awo ŵakakharanga pafupi na ŵaEtiyopiya kuti ŵarwe nkhondo na Yehoramu.

¹⁷Ŵanthu aŵa ŵakiza na nkhondo mu charu cha Yuda ndipo wakatora vyose ivyo vikaŵa mu nyumba ya ufumu pamoza na ŵana ŵakhe na ŵawoli ŵakhe. Ŵana wose ŵakatoreka, kweni nkhwangu pera Yehowahazi[3] ndiyo ŵakarekeka.

¹⁸Pamanyuma pa ichi FUMU yikapereka kwa Yehoramu nthenda yakofya ya mu matumbo yambula kuchizgika.

¹⁹Pakati pajumphaso nyengo pakumara kwa virimika viŵiri, matumbo gha Yehoramu ghakamba kuwira pasi chifukwa cha nthenda yeneyira ndipo wakafwa mu urwirwi ukuru chomene. Ŵanthu ŵakhe kuti ŵakapemba moto kuti ŵamuchindike nawo chara nga ndi umo ŵakachitira pa ŵawiskekuru.

²⁰Yehoramu wakaŵa na virimika 32 apo wakambanga kuwusa ndipo wakaŵa karonga mu Yerusalemu virimika vinkhonde na vitatu. Wakafwa ndipo pakaŵavye uyo wakamulira. Wakasungika mu msumba wa Davide, kweni kuti ku madindi gha ŵakaronga chara.