Read new_tumbuka_bible 2 Midauko 22 Bible Online

2 Midauko 22 - new_tumbuka_bible bible

2 Midauko 22

¹Ŵanthu awo ŵakakharanga mu msumba wa Yerusalemu ŵakamwimika Ahaziya nkhwangu ya Karonga Yehoramu kuŵa karonga wawo mu malo gha wiske. Ŵakachita ntheura chifukwa ŵanthu ŵanyakhe awo ŵakiza na nkhondo ku misasa ya ŵaYuda pamoza na ŵaArabu, ŵakakoma ŵana ŵarara wose ŵaYehoramu. Ntheura Ahaziya ndiyo wakamba kuwusa charu cha Yuda.

²Ahaziya wakaŵa na virimika 22 para wakambanga kuwusa. Iyo wakawusa chirimika chimoza pera mu Yerusalemu. Nyina wakaŵa Ataliya muzukuru wa Karonga Omuri wa charu cha Israele.

³Ahaziya nayo wakenda nthowa ziheni nga ndi izo ŵakachitanga ŵa mbumba ya Ahabu pakuti nyina ndiyo wakamukhuŵirizganga kuchita vinthu viheni.

⁴Iyo wakachita uheni panthazi pa FUMU nga ndi umo ŵakachitira ŵa mbumba ya Ahabu chifukwa wakati wafwa wiske, ŵa mbumba ya Ahabu ndiwo ŵakamurongozganga kuti wachitenge viheni.

⁵Iyo wakarondezgaso urongozgi wawo ndipo wakaruta na Yehoramu mwana wa Ahabu karonga wa charu cha Israele kuya kakarwa nkhondo na Hazayele, karonga wa charu cha Siriya ku chigaŵa cha Ramoti Gileyadi. Ku nkhondo yeneiyi ŵaSiriya ŵakamupweteka Yoramu.

⁶Ntheura Yoramu wakawerako ku nkhondo kwiza ku msumba wa Yezireyele kuti wakachizgike ku vilonda vyakhe ivyo wakapwetekeka ku Ramoti Gileyadi apo wakarwanga na Hazayele karonga wa charu cha Siriya. Ndipo Ahaziya mwana wa Yehoramu karonga wa charu cha Yuda wakaruta ku msumba wa Yezireyele kuti wakamuwone Yoramu mwana wa Ahabu chifukwa wakaŵa murwari.

⁷Chikapimika na Chiuta kuti kuchezga kwa Ahaziya kwa Yehoramu yiŵe nthowa yakufwira kwa Ahaziya. Para wakati wafika Ahaziya, wakaruta na Yoramu kuti ŵakarwe nkhondo na Yehu mwana Nimishi mweneuyo FUMU yikamwimika kuti wamarizge mbumba ya Ahabu.

⁸Apo Yehu wakeruzgiranga ufumu wa mbumba ya Ahabu, wakawona nduna za mu charu cha Yuda na ŵazukuru ŵa Ahaziya ŵeneawo ŵakamuteŵeteranga ndipo ŵakiza na Ahaziya yura kwiza kachezga. Penepapo Yehu wakaŵakoma ŵanthu ŵara.

⁹Yehu wakamba kumupenja Ahaziya ndipo ŵateŵeti ŵakhe ŵakamusanga apo wakabisama mu msumba wa Samariya na kumukora. Ŵakiza nayo kwa Yehu ndipo wakamukoma. Ŵakamusunga mu dindi pakuti ŵakayowoya kuti, “Ndi muzukuru wa Yehoshafati uyo wakachita ivyo FUMU yikakhumbanga na mtima wakhe wose.” Ntheura pakaŵavye na yumoza mu mbumba ya Ahaziya uyo wakaŵa na nkhongono zakuti wawusire charu.

¹⁰Para Ataliya nyina wa Ahaziya wakapulika kuti mwana wakhe wafwa, wakalangula kuti wose ŵa mbumba ya ufumu mu charu cha Yuda wakomeke.

¹¹Ahaziya wakaŵa na mudumbu wakhe zina lakhe Yehosheba mweneuyo wakatengwa kwa musofi Yehoyada. Yehosheba wakamuthaska Yowashi, yumoza wa ŵana ŵa Ahaziya kuti wareke kukomeka na Ataliya. Iyo wakamutora mwana yura mwakumwiba kufuma mu ŵana ŵanyakhe ŵanarume awo ŵakati ŵakomeke ndipo wakaruta nayo ku chipinda cha kugonamo mu Nyumba ya Chiuta na kumubisa ndipo wakamureka mwenemumo pamoza na mulezi wakumupwererera. Ntheura ndimo Yehoshabeya, mwana mwanakazi wa Karonga Yehoramu muwoli wa musofi Yehoyada wakamuthaskira Yowashi kwa Ataliya.

¹²Mwana yura wakakhara nawo uku ŵamubisa mu Nyumba ya Chiuta pa virimika vinkhonde na chimoza apo Ataliya wakawusanga charu.