Read new_tumbuka_bible 2 Midauko 23 Bible Online

2 Midauko 23 - new_tumbuka_bible bible

2 Midauko 23

¹Mu chirimika cha chinkhonde na chiŵiri, musofi Yehoyada wakarongora chikanga. Iyo wakapangana na ŵarongozgi ŵa nkhondo ŵakurongozga ŵasilikari 100 aŵa: Azariya mwana wa Yerohamu, Ishimaele mwana wa Yehohanani, Azariya mwana wa Obedi, Maaseya mwana wa Adaya na Elishafati mwana wa Zikiri.

²Iwo ŵakendera charu chose cha Yuda ndipo ŵakachema ŵaLevi na ŵararaŵarara ŵa zimbumba za wiskewokuru kufuma mu misumba yose mu charu cha Israele na kwiza nawo mu Yerusalemu.

³Ŵanthu ŵara wose ŵakawungana mu Nyumba ya Chiuta mwenemumo ŵakachita phangano na Yowashi mwana wa karonga. Yehoyada wakaŵaphalira wakati, “Uyu ndi mwana wa karonga. Iyo ndiyo wawusenge nga ndi umo FUMU yikayowoyera kuti ŵana ŵa Davide ndiwo ŵawusenge.

⁴Icho mukwenera kuchita ndi ichi: Imwe mwa ŵaLevi na imwe ŵasofi, mwaŵeneimwe mwizamuteŵetera pa Sabata mwizakagaŵikane patatu. Gulu linyakhe la imwe mwizamkuvikirira pa vipata vya Nyumba ya Chiuta.

⁵Gulu la chiŵiri lizakavikirire ku Nyumba ya ufumu ndipo gulu la chitatu lizakavikirire pa chipata cha lufura. Ŵasilikari ŵanji ŵa imwe ŵizakaŵe mu mabaraza gha Nyumba ya FUMU.

⁶Paŵavye munthu wakunjira mu Nyumba ya Chiuta, kweni ŵasofi na ŵaLevi awo ŵali pa mlimo pera ndiwo, pakuti mbakupatulika. Kweni ŵanthu ŵanyakhe wose ŵakawerera kusunga languro la FUMU pakureka kunjira.

⁷ŴaLevi ŵati ŵazingirizge karonga, ndipo waliyose wakorere mahomwa mu woko lakhe. Munthu yose uyo wati wanjirenge mu Nyumba ya Chiuta, wakwenera kukomeka. ŴaLevi ŵakhare pafupi na karonga kulikose uko wakuruta.”

⁸ŴaLevi na ŵanthu wose ŵa mu charu cha Yuda ŵakachita nga ndi umo musofi Yehoyada wakalangulira. MuLevi waliyose wakiza nawo ŵanthu ŵakhe ŵeneawo ŵakizanga ku mlimo wawo pa zuŵa lira la Sabata pamoza na awo ŵakapumulanga, pakuti musofi Yehoyada kuti wakayiwezga mipingo chara.

⁹Penepapo musofi Yehoyada wakaŵapa mikondo na nguru zikuru na zichoko ŵarongozgi ŵa ŵasilikari 100 ŵara izo zikaŵa za Karonga Davide zeneizo zikasungikanga mu Nyumba ya Chiuta.

¹⁰Ntheura ŵanthu ŵara wakandandika kuti ŵavikirirenge karonga uku waliyose wakorera homwa ku woko lakhe. Wakimilira kufuma ku dera la ku mwera kwa Nyumba ya Chiuta mpaka ku mpoto kwa nyumba kuzingirira karonga uyo wakaŵa pafupi na jochero na Nyumba ya Chiuta.

¹¹Penepapo musofi Yehoyada wakamufumya Yowashi mwana wa karonga na kumuvwarika mphumphu ya ufumu ku mutu wakhe. Wakamupa Buku la Marango ghakwendeskera ufumu ndipo wakamwimika kuti waŵe karonga. Yehoyada pamoza na ŵana ŵakhe ŵanarume wakamuphakazga mafuta ndipo ŵakati, “Muŵe na umoyo utali imwe karonga!”

¹²Para Fumukazi Ataliya yikati yapulika chiwawa cha ŵanthu uku ŵakuchimbira na kurumba karonga, wakaruta ku ŵanthu ku Nyumba ya FUMU.

¹³Ndipo wakati walaŵiska, wakawona karonga wimilira pafupi na mzati wa pa muryango, nduna na awo ŵakimbanga mbata ŵali pafupi na karonga. Ŵanthu wose ŵakasekereranga na kulizga mbata mwakukondwa ndipo ŵimbi na vyakwimbira vyawo ndiwo vikarongozganga chiphikiro. Penepapo Ataliya wakaparura malaya ghakhe, ndipo wakachemerezga wakati, “Wakundigarukira! Wakundigarukira!”

¹⁴Penepapo musofi Yehoyada wakaŵatuma ŵarongozgi ŵa ŵasilikari ŵara ndipo wakati kwa iwo, “Mufumiskani mwanakazi uyo mukati mu mizere iyo mwandanda. Munthu yose uyo wati wakusenderera kufupi kuti wamuthaske mumukome na lupanga.” Wakayowoya ichi chifukwa musofi wakayowoya kuti, “Mureke kumukomera pa Nyumba ya FUMU chara.”

¹⁵Ntheura ŵakamukora Ataliya yura ndipo ŵakenda nayo pakati pa muryango apo mahachi ghakanjira ku nyumba ya ufumu. Penepapa ndipo ŵakamukomera.

¹⁶Penepapo musofi Yehoyada wakachita phangano pakati pa iyo na ŵanthu ndiposo na Karonga Yowashi lakuti wose ŵati ŵaŵenge ŵanthu ŵa FUMU.

¹⁷Ŵanthu wose ŵakaruta ku nyumba ya chiuta Baala na kuyibwangandulira pasi. Majochero na vikozgo vyakhe wakaviteketa tuchokotuchoko ndipo musofi Matani wa chiuta Baala wakamukomera panthazi pa jochero.

¹⁸Penepapo Yehoyada wakaŵika mlimo wakupwererera Nyumba ya Chiuta mu mawoko gha ŵasofi awo ŵakaŵa ŵaLevi. Ŵanthu aŵa ndiwo Davide wakaŵapatula kuti ŵateŵetenge mu Nyumba ya Chiuta pakupereka sembe zakocha kwa FUMU nga ndi umo vili kulembekera mu Dango la Mozesi. Ndiwoso ŵakarongozganga pakwimba sumu zakurongora kukondwa nga ndi umo wakalangulira Davide.

¹⁹Yehoyada wakimikaso ŵanthu ŵanyakhe kuti ŵaŵe ŵalinda ŵa pa vipata vya Nyumba ya FUMU mwakuti paŵavye munthu waliyose uyo ngwa kukazuzgika wanjire mu Nyumba ya Chiuta.

²⁰Ndipo wakatora ŵarongozgi ŵa ŵasilikari 100 ŵara, nduna, ŵa kazembe ŵa vyaru ndiposo na ŵanthu wose ŵa mu charu na kwiza nayo karonga kufuma mu Nyumba ya FUMU. Wakaruta na karonga ku nyumba ya Ufumu pa kwendera ku chipata cha kunena na kumukhazika karonga pa chizumbe chakhe.

²¹Ntheura ŵanthu wose ŵa mu charu ŵakasekerera, ndipo mu msumba mukaŵa bata chifukwa Ataliya wakakomeka.