Read new_tumbuka_bible 2 Midauko 24 Bible Online

2 Midauko 24 - new_tumbuka_bible bible

2 Midauko 24

¹Yowashi wakaŵa na virimika vinkhonde na viŵiri para wakambanga kuwusa ndipo wakaŵa karonga mu msumba wa Yerusalemu pa virimika 40. Zina la nyina likaŵa Zibiya wakufumira ku msumba wa Beyeresheba.

²Yowashi wakachita ivyo vikaŵa viweme panthazi pa FUMU mu mazuŵa ghose gha musofi Yehoyada.

³Ndipo Yehoyada wakamutorera Yowashi ŵanakazi ŵaŵiri mu ŵeneawo wakababamo ŵana ŵanarume na ŵanakazi.

⁴Pamanyuma pa ichi Yowashi wakaghanaghana za kunozgaso Nyumba ya FUMU.

⁵Wakawunganya ŵasofi na ŵaLevi ndipo wakati kwa iwo, “Rutani ku ŵanthu ŵa mu misumba ya charu cha Yuda mukasangule ndarama ku ŵaIsraele wose kuti munozgerenge Nyumba ya Chiuta winu chirimika na chirimika. Muchite ichi luŵiroluŵiro. Kweni ŵaLevi kuti ŵakachita luŵiro mlimo ura chara.”

⁶Ntheura Karonga Yowashi wakachema Yehoyada musofi mukuru ndipo wakamufumba wakati, “Kasi nchifukwa uli wareka kuŵakhuŵirizga ŵaLevi kuti ŵasangure ndarama kufuma mu charu cha Yuda na mu msumba wa Yerusalemu zeneizo Mozesi muteŵeti wa FUMU wakalangula mpingo wa Israele kuti wizenge nazo ku Chihema cha Ukaboni?”

⁷Pakuti ŵanthu awo ŵakamurondezganga Ataliya, mwanakazi muheni yura wakaswa Nyumba ya FUMU na kunjira ndipo wakatora vinthu vyose vyakupatulika na kuviteŵeteska ku chisopo cha chiuta Baala.

⁸Penepapo karonga wakalangula kuti ŵakhome bokosi ndipo ŵaliŵike pawaro pa muryango wa Nyumba ya FUMU.

⁹Ndipo wakapharazga mu charu chose cha Yuda na mu msumba wa Yerusalemu kuti ŵanthu ŵizenge nawo muthulo kwa FUMU uwo Mozesi, muteŵeti wa Chiuta, wakalangula mu mapopa kuti ŵanthu ŵizenge nawo.

¹⁰Nduna zose pamoza na ŵanthu wose ŵakakondwa na cheneichi ndipo ŵakiza nazo ndarama mpaka bokosi lira likazura.

¹¹Ndipo nyengo zose ŵaLevi ŵakizanga nalo bokosi lira kwa nduna za karonga para ŵawona kuti lazura na ndarama. Mulembi wa karonga pamoza na muteŵeti wa musofi mukuru ŵakakhuturanga ndarama zira na kuliwezgera bokosi lira pa malo ghakhe. Ŵakachita ntheura zuŵa na zuŵa mwakuti ŵakaŵa na ndarama zinandi chomene.

¹²Penepapo karonga na musofi Yehoyada wakaperekanga ndarama zira kwa ŵarongozgi ŵakunozgaso Nyumba ya FUMU. Iwo nawo ŵakalembangaso nkhwantha pakuzengera mawe na ŵakupara mathabwa kuti ŵanozgeso Nyumba ya FUMU. Ŵakalembaso nkhwantha pakufura chisulo na mkuŵa kuti ŵanozgeso Nyumba ya FUMU.

¹³Ŵanthu awo ŵakalembeka nchito ŵakateŵeta mlimo mwa nkhongono ndipo ŵakanozgaso Nyumba ya Chiuta nga ndi umo yikaŵira pakudanga na kuyikhozga.

¹⁴Ndipo ndarama izo zikakharapo ŵakati ŵamara kunozgesa Nyumba ya FUMU, ŵakiza nazo kwa karonga na kwa Yehoyada. Ndipo na ndarama zenezira ŵakapangira viteŵetero vyose vya mu Nyumba ya FUMU. Viteŵetero ivi vikaŵa vya mlimo wa sembe zakocha, ŵabakule ŵa vyakununkhira, ndipo na viteŵetero vinyakhe vya golide na vya siliva. Mu umoyo wose wa musofi Yehoyada sembe zakocha zikaperekekanga kaŵirikaŵiri mu Nyumba ya Chiuta.

¹⁵Pa nyengo iyi Yehoyada wakachekura, wakaŵa na virimika vinandi chomene ndipo wakafwa wali na virimika 130.

¹⁶Ŵakamusunga ku mararo gha ŵakaronga mu msumba wa Davide chifukwa cha viweme ivyo wakachitira ŵaIsraele na ivyo wakachitira Chiuta ndiposo na ivyo wakachita mu Nyumba ya Chiuta.

¹⁷Kweni wakati wafwa Yehoyada, nduna za charu cha Yuda zikiza kwa Karonga Yowashi ndipo zikamulambira na kumuromba kuti wazipulike.

¹⁸Ntheura ŵanthu ŵakareka kusopa FUMU, Chiuta wa ŵawiskewokuru mu Nyumba ya Chiuta ndipo wakamba kusopa vikozgo na mizati ya chiuta Ashera. Ntheura Chiuta wakakwiya chifukwa cha kwananga kwa ŵaYuda na awo ŵakakharanga mu Yerusalemu.

¹⁹Ndipouli FUMU yikaŵatumira nchimi kuŵachenjezga ŵanthu ŵara za kwananga kwawo mwakuti ŵawerere kwa FUMU, kweni kuti ŵakazipulikira chara.

²⁰Penepapo Mzimu wa Chiuta ukanjira mwa Zakariya mwana wa musofi Yehoyada. Zakariya wakimilira apo ŵanthu ŵangamuwona ndipo ŵakachemerezga wakati, “Chiuta wakuti, ‘Kasi nchifukwa uli mukunangira marango gha FUMU, mwakuti vinthu vikumwenderani makora chara? Ntheura chifukwa chakuti mwayireka FUMU, nayo yamurekani.’ ”

²¹Kweni ŵanthu ŵakachitira chiŵembu ndipo na languro la karonga ŵakamudinya na mawe na kufwira mu baraza la Nyumba ya FUMU.

²²Ntheura Karonga Yowashi kuti wakakumbukaso chara kugomezgeka uko Yehoyada wiske wa Zakariya wakamuchitira, kweni wakakoma mwana wakhe. Ndipo para Zakariya wakafwanga wakati, “FUMU yichiwone ichi na kuwezgera nduzga.”

²³Pa umaliro wa chirimika chenechira ŵasilikari ŵa charu cha Siriya ŵakiza na kurwa nkhondo na Yowashi. Iwo ŵakafika mu charu cha Yuda na mu Yerusalemu ndipo ŵakakoma nduna zose. Vyose ivyo ŵakatoramo ŵakatumizga kwa karonga mu msumba wa Damaseko.

²⁴Nangauli ŵasilikari wa charu cha Siriya ŵakaŵa ŵachoko waka, ndipouli FUMU yikazomerezga kuti ŵathereske wumba ukuru wa ŵasilikari wa Yowashi chifukwa ŵakayireka FUMU, Chiuta wa ŵawiskewokuru. Ntheura ichi chikaŵa chilango pa Yowashi.

²⁵Ŵasilikari ŵa charu cha Siriya ŵakawerako ndipo ŵakamureka Yowashi kuti wapwetekeka chomene. Nduna zakhe zikamuchitira chiŵembu chifukwa cha kukoma mwana wa musofi Yehoyada. Ntheura nayo ŵakamukomera pa chitara chakhe apo wakagona. Ndipo ŵakamusunga mu msumba wa Davide, kweni kuti wakamusanga ku madindi gha ŵakaronga chara.

²⁶Nduna izo zikamuchitira chiŵembu zikaŵa ziŵiri: Zabadi mwana wa Shimeyati uyo wakaŵa mwanakazi wa ku Amoni na Yehozabadi mwana wa Shimuriti uyo wakaŵa mwanakazi wa ku Mowabu.

²⁷Makani gha ŵana ŵakhe na uchimi unandinandi wakumususka iyo ndiposo na mlimo wakuzengaso Nyumba ya Chiuta, vili kulembeka mu Buku la Midauko ya ŵakaronga. Ndipo Amaziya mwana wakhe ndiyo wakamba kuwusa mu malo ghakhe.