Read new_tumbuka_bible 2 Midauko 25 Bible Online

2 Midauko 25 - new_tumbuka_bible bible

2 Midauko 25

¹Amaziya wakaŵa na virimika 25 para wakambanga kuwusa ndipo wakaŵa karonga pa virimika 29 mu msumba wa Yerusalemu. Zina la nyina likaŵa Yehowadini wa ku Yerusalemu.

²Amaziya wakachita icho chikaŵa chiweme panthazi pa FUMU, ndipouli kuti wakachita na mtima wose chara.

³Wakati wapoka mazaza gha ufumu wa charu chakhe, wakakoma nduna izo zikakoma wiske karonga.

⁴Kweni iyo kuti ŵakakoma ŵana ŵawo chara, kweni wakachita nga ndi umo kuli kulembekera mu Dango la mu Buku la Mozesi umo FUMU yikalangula kuti, “Ŵapapi ŵareke kukomeka chifukwa cha kwananga kwa ŵana ndipo ŵana nawo, ŵareke kukomeka chifukwa cha kwananga kwa ŵapapi ŵawo.”

⁵Karonga Amaziya wakawunganya ŵanthu wose ŵa fuko la Yuda na la Benjamini ndipo ŵakasankhapo ŵanji na kuŵimika kuŵa ŵarongozgi ŵa ŵasilikari 1,000 ndipo ŵanyakhe kuŵa ŵarongozgi ŵa ŵasilikari 100. Wakaŵasankha kwakuyana na mbumba za ŵawiskewo ndipo wakaŵapenda awo ŵakaŵa ŵa virimika 20 na ŵakujumphirapo ndipo wakasanga kuti ŵali 300,000 awo ŵakaŵa ŵakunozgeka kurwa nkhondo ndipo ŵakumanya kukora mukondo na nguru.

⁶Ndiposo ŵakalemba ŵasilikari ŵa ganyu ŵakukwana 100,000 awo ŵakaŵa vinkhara vya nkhondo kufuma mu charu cha Israele na kuŵaripa makilogiramu 3,400 gha siliva.

⁷Kweni nchimi iyo yikatumika na Chiuta yikiza kwa Amaziya ndipo yikati kwa iyo, “Imwe karonga mureke kuruta na ŵasilikari aŵa ŵa charu cha Israele nanga wangaŵa waliyose wa fuko la Efurayimu pakuti FUMU yili pamoza na iwo chara.

⁸Nangauli ukughanaghana kuti mungaruta kuti mukarwe nkhondo mwa nkhongono chifukwa muli ŵanandi, Chiuta wamkumuthereskani panthazi pa ŵarwani ŵinu pakuti Chiuta wali na nkhongono za kovwira kuti muruske na nkhongono kuti mutondeke.”

⁹Amaziya wakafumba nchimi ya Chiuta yira yikati, “Kasi ndichite nayo uli makilogiramu 3,400 gha siliva agho ndapereka kale ku ŵasilikari ŵa ŵaIsraele?” Nchimi yira yikazgora yikati, “FUMU yingakupa makilogiramu ghanandi kuruska agha.”

¹⁰Penepapo Amaziya wakawuskamo ŵasilikari ŵa ganyu ŵara awo ŵakafuma ku charu cha Efurayimu kuti ŵarute ku kwawo. Pa chifukwa ichi ŵasilikari ŵa ganyu ŵara ŵakakwiyira chomene ŵaYuda ndipo ŵakawerera ku kwawo na ukari ukuru.

¹¹Kweni Amaziya wakakhwima mtima na kurongozgera ŵasilikari ŵakhe ku Dambo la Muchere uko wakakoma ŵasilikari 10,000 ŵa charu cha Edomu.

¹²Ŵasilikari ŵa charu cha Yuda ŵakakoraso ŵasilikari 10,000 ŵa charu cha Edomu ndipo ŵakakwera nawo pachanya pa jarawe na kuŵagodobolera pasi. Ntheura wose ŵakateketeka tuchokotuchoko.

¹³Pa nyengo iyo Amaziya wakarwiranga nkhondo na charu cha Edomu, ŵasilikari ŵa charu cha Israele awo ŵakawezgeka kuti ŵareke kuruta nayo, ŵakiza na nkhondo ku misumba ya charu cha Yuda kufuma ku Samariya mpaka msumba wa Beti Horoni. Ndipo wakakomapo ŵanthu 3,000 na kutoramo vyakuskogha vinandi chomene mu misumba yira.

¹⁴Para Amaziya wakawerako kufuma ku nkhondo uko wakakomanga ŵanthu ŵa ku Edomu, wakiza na ŵachiuta ngoza ŵa charu cha Edomu ndipo wakaŵimika kuti ŵaŵe ŵachiuta ŵakhe mwakuti waŵalambirenge na kupereka sembe zakocha kwa iwo.

¹⁵Ichi chikakwiyiska FUMU, ndipo yikatuma nchimi kuti yikamuchenye Amaziya pakuyowoya kuti, “Kasi nchifukwa uli ukulambira ŵachiuta ŵa chilendo awo kuti ŵangathaska ŵanthu ŵawo mu woko lako chara?”

¹⁶Apo nchimi yira yikaŵa yichali kuyowoya, Amaziya wakati kwa iyo, “Chetama, kasi ndi njani uyo wali kukwimika iwe kuti uperekenge urongozgi kwa karonga? Kasi uti ufwirengechi?” Ntheura nchimi yira yikachetama, kweni yikati, “Nkhumanya kuti Chiuta wachighanaghana kuti wakukome waka iwe chifukwa wachita ichi ndipo wareka kupulikira urongozgi wane.”

¹⁷Zuŵa limoza Karonga Amaziya wa charu cha Yuda wakakumana na ŵarongozgi ŵakhe ndipo wakatuma nthumi kuruta kwa Yowashi mwana wa Yehowahazi mwana wa Yehu karonga wa charu cha Israele na mazgu ghakuti, “Zanga kuti tiwonane pakurwa nkhondo.”

¹⁸Kweni Yowashi karonga wa charu cha Israele wakamuzgora Amaziya karonga wa charu cha Yuda kuti, “Nyengo yimoza nthura ya nkhorongo ya mu Lebanoni yikatuma nthumi ku khuni la milanje mu nkhorongo yeneyira na mazgu ghakuti, ‘Pereka mwana wako mwanakazi kuti watorane na mwana wane mwanarume kuŵa muwoli wakhe.’ Kweni chikoko cha mu nkhorongo yeneyira chikizira mu nthowa yeneyira na kukandira pasi nthura yira.

¹⁹Iwe ukujiyowoya kuti, ‘Ndathereska charu cha Edomu’, ndipo sono ukujitukumura na kujikuzga. Kweni sono nkhukuphalira kuti ukhare waka ku nyumba. Kasi nchifukwa uli ukusosomora suzgo kuti iwe na ŵaYuda mumarire pamoza?”

²⁰Kweni Amaziya kuti wakapwererako za ichi chara, pakuti likaŵa khumbo la Chiuta kuti waŵapereke mu mawoko gha ŵarwani ŵawo chifukwa ŵakalambira ŵachiuta ngoza ŵa charu cha Edomu.

²¹Ntheura Yowashi karonga wa charu cha Israele wakaruta kuya karwa nkhondo na Amaziya karonga wa charu cha Yuda ndipo ŵakarweranga ku Beti Shemeshi mu charu cha Yuda.

²²Ŵasilikari ŵa charu cha Yuda ŵakathereskeka na ŵasilikari ŵa charu cha Israele. Penepapo wose ŵa charu cha Yuda ŵakachimbilira ku vikaya vyawo.

²³Karonga Yehowashi wa charu cha Israele wakamukora Amaziya mwana wa Yowashi, muzukuru wa Ahaziya pa Beti Shemeshi ndipo wakiza nayo ku Yerusalemu. Wakabwangandulira pasi linga la msumba wa Yerusalemu pa mtunda wakukwana mamita 200 kufumira ku chipata cha Efurayimu mpaka ku chipata cha pangodya.

²⁴Ndipo wakatora ndarama zose za golide na za siliva ndiposo na viteŵetero vyose ivyo wakavisanga mu Nyumba ya Chiuta ivyo vikasungikanga na Obedi Edomu. Wakatoraso vyuma ivyo vikaŵa mu nyumba ya ufumu pamoza na ŵanthu awo wakaŵakora uzga na kuruta nawo ku msumba wa Samariya.

²⁵Amaziya mwana wa Yowashi karonga wa charu cha Yuda wakakhara virimika 15 wakati wafwa Yehowashi mwana wa Yehowahazi karonga wa charu cha Israele.

²⁶Milimo yinyakhe ya Amaziya kufuma pa kwamba mpaka ku umaliro yili kulembeka mu Buku la ŵakaronga ŵa charu cha Yuda na cha Israele.

²⁷Kufuma pa nyengo iyo Amaziya wakarekera kurondezga khumbo la FUMU, ŵanthu ŵanyakhe ŵakamuchitira chiŵembu mu Yerusalemu ndipo wakachimbilira ku msumba wa Lakishi. Kweni ŵarwani ŵakhe ŵakatuma ŵanthu kumuronderera ndipo ŵakamukomera kwenekura.

²⁸Thupi lakhe ŵakiza nalo ku Yerusalemu pakuliyegha pa hachi ndipo wakamusunga ku mararo gha ŵakaronga mu msumba wa Davide.