Read new_tumbuka_bible 2 Midauko 26 Bible Online

2 Midauko 26 - new_tumbuka_bible bible

2 Midauko 26

¹Pamanyuma pa ichi ŵanthu wose ŵa charu cha Yuda wakatora Uziya uyo wakaŵa na virimika 16 ndipo ŵakamuŵika kuŵa karonga mu malo mwa wiske Amaziya.

²Uziya ndiyo wakazengaso msumba wa Eloti na kuwuwezgera ku charu cha Yuda wakati wafwa Karonga Amaziya na kusungika ku mararo gha ŵawiskewokuru.

³Uziya wakamba kuwusa para wakaŵa na virimika 16 ndipo wakaŵa karonga mu Yerusalemu pa virimika 52. Zina la nyina ŵakhe likaŵa Yekoliya uyo kwawo kukaŵa ku Yerusalemu.

⁴Iyo wakachita ivyo vikaŵa viweme panthazi pa FUMU nga ndi ivyo wakachita Amaziya ŵawiske ŵakhe.

⁵Ndipo Uziya wakaŵikapo mtima pa Chiuta mu mazuŵa ghose gha Zakariya mweneuyo wakamusambizganga kumopa Chiuta. Ndipo nyengo yose iyo Uziya wakaŵikangapo mtima wakhe pa FUMU, Chiuta nayo wakamuchitiranga uweme.

⁶Uziya wakaruta kuya karwa nkhondo na ŵaFilisiti ndipo wakagumulira pasi malinga gha misumba wa Gati, wa Yabine na ŵa Ashidodi. Pamanyuma wakazengaso misumba ya malinga kuyambira msumba wa Ashidodi na ku malo ghanyakhe mu charu cha ŵaFilisiti.

⁷Chiuta wakamovwira Uziya kuti waŵathereske ŵaFilisiti, ŵaArabu awo ŵakakharanga ku Guru Baala ndiposo na ŵaMeyunimu.

⁸ŴaAmoni ŵakaperekanga mithulo kwa Uziya ndipo lumbiri lwakhe lukatandazgika kuya kafika na ku mphaka za charu cha Eguputo chifukwa wakaŵa wankhongono chomene.

⁹Uziya wakakhozgaso malinga gha Yerusalemu pakuzenga vigongwe pa Chipata cha pa Chingodya, pa chipata cha ku Dambo ndiposo na apo Linga Likazgokeranga.

¹⁰Wakazengaso vigongwe mu mapopa na kujima visimi vinandi pakuti ŵakaŵa na viŵeto vinandi chomene mu madambo na mu vidika. Wakaŵa na ŵanthu awo ŵakalimanga mu minda na awo ŵakaphatiliranga mpheska mu mapiri na mu dambo umo mukaŵa nyata yiweme pakuti wakatemwa kulima.

¹¹Uziya wakaŵa na ŵasilikari ŵakumanya chomene kurwa nkhondo ŵeneawo ŵakaŵa ŵakunozgeka kuya karwa mu vigaŵa kwakuyana na umo mulembi Yeyiyele wakavinozgera pamoza na Maaseya murongozgi wawo pasi pa mazaza gha Hananiya, yumoza wa ŵarongozgi wa nkhondo ya karonga.

¹²Unandi wose wa ŵarongozgi wa ŵasilikari awo vikaŵa vinkhara vya nkhondo ukaŵa 2,600.

¹³Pasi pa mazaza ghawo pakaŵa wumba wa ŵasilikari 307,500 ŵeneawo ŵakaŵa ŵankhongono chomene pa nkhondo na ŵakumanya kovwira karonga kurwa na ŵarwani ŵakhe.

¹⁴Uziya wakaŵapangira ŵasilikari wose ŵara nguru, mikondo, vipewa vya nkhondo, malaya gha visulo, mauta na mawe gha mu fyata.

¹⁵Mu Yerusalemu nkhwantha zikapanga visulo ndipo ŵakaviŵika mu vigongwe na mu vingodya vya linga kuti ŵaponyerenge mivwi na mawe ghakurughakuru. Lumbiri lukatandazgika kosekose pakuti wakavwirika na Chiuta mwa kuzizwiska chomene ndipo wakaŵa wankhongono nadi.

¹⁶Uziya wakati waŵa na nkhongono chomene wakamba kujikuzga uko kukamutorera kuwa kwakhe. Iyo wakayinangira FUMU, Chiuta wakhe pakuruta kuya kanjira mu Nyumba ya Chiuta na kocha sembe yakununkhira pa jochero la vyakununkhira.

¹⁷Kweni musofi Azariya wakamurondezga pamanyuma pakhe pamoza na ŵasofi ŵa chikanga ŵanyakhe 80 ŵa FUMU.

¹⁸Ŵasofi ŵara ŵakamususka Uziya pakuyowoya kwa iyo kuti, “Uziya, kuti nchakwenerera chara kuti iwe uwochere FUMU vyakununkhira. Mlimo uwu ngwa ŵasofi pera awo mba mbumba ya Aroni ŵeneawo ŵali kupatulika kuti ŵawochenge vyakununkhira. Ntheura fumamo mu Malo Ghakupatulika chifukwa wananga ndipo uti upokerengepo nchindi zakufuma kwa FUMU Chiuta chara.”

¹⁹Uziya mweneuyo wakakorera bakule wakusunkhizgiramo vyakununkhira mu woko lakhe wakakwiya. Ndipo apo wakaŵakaripiranga ŵasofi ŵara, vyoni vikabamuka pa chisko chakhe uku ŵasofi ŵara ŵakuwona panthazi pa jochero la vyakununkhira mu Nyumba ya FUMU.

²⁰Musofi mukuru Azariya na ŵasofi ŵanyakhe ŵara, ŵakamulaŵiska ndipo ŵakamuwona na chitenthe kuti wali na vyoni pa chisko chakhe. Ntheura wakamukanchizgira kuwaro ndipo iyo nayo wakafumamo luŵiro chifukwa FUMU yikamulanga na nthenda ya vyoni.

²¹Karonga Uziya wakaŵa na vyoni mpaka pa zuŵa la nyifwa yakhe. Sono pakuti wakaŵa na vyoni, ŵakamufumyamo mu nyumba ya ufumu kuya kakhara mu nyumba ya yekha na kumurekeska kuŵa na mazaza gha mu charu. Penepapo ŵakamukanizga kunjira mu Nyumba ya FUMU. Ndipo Yotamu, mwana wakhe ndiyo wakaŵa wa mazaza pa nyumba ya ufumu na kuwusa ŵanthu ŵa mu charu chira.

²²Milimo yinyakhe ya Karonga Uziya kufuma pakwamba mpaka pa umaliro yili kulembeka na nchimi Yesaya mwana wa Amozi.

²³Uziya wakafwa ndipo ŵakamusunga ku mararo gha ŵakaronga chara. Kweni ŵakamusunga ku mararo ghanyakhe mu munda wa ŵakaronga kuwaro pafupi penepapo, chifukwa ŵanthu ŵakati, “Wali na vyoni!” Ndipo Yotamu mwana wakhe ndiyo wakamba kuwusa mu malo ghakhe.