Read new_tumbuka_bible 2 Midauko 28 Bible Online

2 Midauko 28 - new_tumbuka_bible bible

2 Midauko 28

¹Ahazi wakaŵa na virimika 20 para wakambanga kuwusa ndipo wakaŵa karonga mu Yerusalemu pa virimika 16. Ahazi kuti wakachita viweme chara panthazi pa FUMU nga ndi umo wakachitira Davide wiskekuru wakhe.

²Iyo wakachita viheni nga ndi ivyo ŵakachitanga ŵakaronga ŵa charu cha Israele ndipo wakapangaso vikozgo vya chisulo vya Baala na kuvilambira.

³Wakocheranga vyakununkhira kwa Baala mu Dambo la Hinomu. Wakapereka ŵana ŵakhe ŵanarume kuŵa sembe zakocha pa moto kurondezga machitiro gha ukazuzi gha ŵamitundu ŵeneawo FUMU yikaŵachimbizga para ŵaIsraele ŵakafikanga mu charu.

⁴Ahazi wakapereka sembe na kocha vyakununkhira mu malo ghose gha pachanya ghakusoperako, pa mapiri ghatalighatali ndiposo na musi mu makuni gha minthavi ghakutandazga.

⁵Chifukwa cha kwananga kwa Ahazi, FUMU, Chiuta wakhe wakamupereka kwa karonga wa charu cha Siriya. Ŵasilikari ŵa charu cha Siriya ŵakamuthereska Ahazi na kutora ŵanthu ŵakhe kuŵa ŵazga ndipo ŵakaruta nawo ku msumba wa Damaseko. Pamanyuma FUMU Chiuta wakamuperekaso Ahazi mu mawoko gha karonga wa charu cha Israele mweneuyo wakakoma ŵanthu ŵanandi chomene.

⁶Mu zuŵa limoza pera, Peka mwana wa Remaliya wakamuthereska Ahazi na kukoma ŵasilikari ŵakhe 120,000 ŵa charu cha Yuda awo ŵakaŵa vinkhara vya nkhondo, chifukwa ŵakayireka FUMU, Chiuta wa ŵa wiskewokuru.

⁷Ndipo Zikiri, chinkhara cha nkhondo cha fuko la Efurayimu chikakoma Maaseya mwana wa Karonga Ahazi, Azirikamu mukuru wa pa nyumba ya ufumu, ndiposo na Elikana uyo wakaŵa wa chiŵiri kwa karonga.

⁸Ŵasilikari ŵa charu cha Israele ŵakaŵakora ŵabali ŵawo kuŵa ŵamikori ŵakukwana 200,000 ŵanakazi pamoza na ŵana. Ŵakaskogha katundu munandi chomene na kuruta nayo ku msumba wa Samariya.

⁹Kweni kwenekura ku Samariya kukaŵa nchimi ya FUMU zina lakhe Odedi ndipo wakiza kuti wakumane na ŵasilikari ŵa charu cha Israele apo ŵakaweranga ku nkhondo ndipo wakati kwa iwo, “FUMU, Chiuta wa ŵawiskemwekuru wakaŵakwiyira ŵaYuda. Pa chifukwa ichi wakaŵapereka mu mawoko ghinu. Kweni imwe mwaŵakomera mu ukari weneuwo wafika na kuchanya wuwo.

¹⁰Ndipo sono mukughanaghana kuŵazgora ŵanarume na ŵanakazi ŵa mu Yerusalemu na ŵa mu charu cha Yuda kuti ŵaŵe ŵazga ŵinu. Kasi imwe mukumanya chara kuti namwe mwanangira FUMU, Chiuta winu?

¹¹Sono mundipulike. Ŵanthu awo mwaŵakora kuti ŵaŵe ŵazga, mbabali ŵinu. Ntheura ŵawezgani kuti ŵarutenge, mzire FUMU yimulangani mu ukari ŵakhe.”

¹²Penepapo ŵarongozgi ŵanayi ŵakumanyikwa ŵa charu cha Efurayimu nawo ŵakasuska ŵasilikari ŵara apo ŵakaweranga ku nkhondo. Ŵarongozgi ŵara ŵakaŵa aŵa: Azariya mwana wa Yohanani, Berekiya mwana wa Meshilemoti, Yehizikiya mwana wa Shalumu na Amasa mwana wa Hadilayi.

¹³Iwo ŵakati, “Ŵazga awo mureke kwiza nawo kuno mzire tiyinangire chomene FUMU. Kasi mukukhumba kuti musazgireko uheni uwo tili nawo kale? Uheni withu ngukuru na kale ndipo ukari wakofya wa FUMU uli pa ŵaIsraele.”

¹⁴Ntheura ŵasilikari ŵara ŵakaŵareka penepapo ŵazga pamoza na vyakuskogha panthazi pa ŵarongozgi na wumba wose.

¹⁵Ŵarongozgi ŵakumanyikwa ŵara awo ŵazunurika mazina, ŵakatora ŵazga ŵara ndipo kufuma mu katundu uyo ŵakaskogha ku nkhondo, ŵakaŵagaŵira vyakuvwara awo ŵakaŵa nkhule ndipo ŵakaŵapaso skapato, chakurya na vyakumwa na kuŵaphakazga mafuta awo ŵakaŵa na vilonda. Awo ŵakaŵa ŵakutomboroka ŵakaŵakwezga pa zimbunda. Ntheura ŵakaŵatorera ku ŵabali ŵawo ku Yeriko, msumba wa mikama. Penepapo iwo ŵakawerera ku msumba wa Samariya.

¹⁶Nyengo yeneyira, Karonga Ahazi wakatuma nthumi kuti zikacheme karonga wa charu cha Asiriya kuti wamovwire.

¹⁷Wakachita ichi chifukwa ŵaEdomu wakizaso na kurwa nkhondo na charu cha Yuda na kutoraso ŵanthu ŵanji kuŵa ŵamikori.

¹⁸Nyengo yeneiyo pera ŵaFilisiti nawoso ŵakiza na kurwa nkhondo pa misumba ya mu vidika na mu chigaŵa cha ku mwera mu charu cha Yuda na kuyipoka. Mizi iyo wakapoka ndi iyi: Beti Shemeshi, Ayaloni, Gederoti, Soko, Timuna na Gimuzo pamoza na vikaya vyakuzingirizga mizi iyi.

¹⁹FUMU yikakhizgira pasi charu cha Yuda chifukwa cha Ahazi, karonga wa charu cha Yuda pakuti wakarutilira kuchita vinthu viheni mu charu ndipo wakaŵa wambula kugomezgeka kwa FUMU kuruska wose.

²⁰Tigilati Pilesere, karonga wa charu cha Asiriya wakiza na kurwa nayo nkhondo mu malo mwakuti wamovwire.

²¹Ahazi wakayezga kutora katundu munyakhe kufuma mu Nyumba ya FUMU na mu Nyumba ya ufumu ndiposo kufuma mu zinyumba za nduna zakhe na kumupa karonga wa charu cha Asiriya, kweni vyose ivi kuti vikamovwira chara.

²²Nangauli Ahazi wakaŵa mu visuzgo ivi, wakarutilira ndipera kuŵa wambula kugomezgeka kwa FUMU.

²³Iyo wakapereka sembe kwa ŵachiuta ŵa ku msumba wa Damaseko kweneuko kukafuma ŵasilikari awo ŵakamuthereska. Iyo wakaghanaghana kuti, “Pakuti ŵachiuta ŵa ŵaSiriya ŵakovwira ŵakaronga ŵawo, ine nane ndipereke sembe ku ŵachiuta ŵeneŵara mwakuti ŵandovwire.” Kweni kupereka sembe kwa ŵachiuta aŵa, kukamutorera kuwa kwakhe na kuwa kwa ŵaIsraele wose.

²⁴Kusazgirako pa uheni uwu, Ahazi wakatora viteŵetero vya mu Nyumba ya FUMU na kuviwunjika pamoza ndipo wakaviswa tuchokotuchoko. Wakajara vijaro vya Nyumba ya Chiuta na kwimika majochero mu mphatukano zose za mu misewu ya mu Yerusalemu.

²⁵Mu misumba na mu mizi yose ya mu charu cha Yuda, ŵakazengako malo gha pachanya ghakusoperako na kocherako vyakununkhira ku ŵachiuta ŵanyakhe. Ntheura ŵakavya FUMU, Chiuta wa ŵawiskekuru kuti waŵe mukari chomene.

²⁶Milimo yinyakhe ya kuwusa kwa Ahazi na vinyakhe vyose ivyo wakachita, kufuma pa kwamba mpaka pa umaliro, vili kulembeka mu Buku la ŵakaronga ŵa charu cha Yuda na cha Israele.

²⁷Karonga Ahazi wakafwa ndipo ŵakamusunga mu msumba wa Yerusalemu, kweni kuti ŵakamusunga ku madindi gha ŵakaronga ŵa Israele chara. Ntheura Hezekiya mwana wakhe ndiyo wakamba kuwusa mu malo ghakhe.