Read new_tumbuka_bible 2 Midauko 29 Bible Online

2 Midauko 29 - new_tumbuka_bible bible

2 Midauko 29

¹Hezekiya wakaŵa na virimika 25 para wakambanga kuwusa ndipo wakaŵa karonga mu msumba wa Yerusalemu pa virimika 29. Zina la nyina likaŵa Abiya mwana wa Zakariya.

²Iyo wakachita ivyo vikaŵa viweme panthazi pa FUMU nga ndi ivyo wakachita wiskekuru Davide.

³Mu chirimika chakudanga cha kuwusa kwakhe, mu mwezi wakudanga, Hezekiya wakajula vijaro vya Nyumba ya FUMU na kuvinozgaso.

⁴Wakachema ŵasofi na ŵaLevi na kuŵawunganya pa baraza, cha ku mafumiro gha dazi.

⁵Ndipo wakati kwa iwo, “Mundipulike imwe mwa ŵaLevi! Mujipatuliske sono ndipo mupatuliskeso Nyumba ya FUMU, Chiuta wa ŵawiskemwekuru. Mufumyemo vyose ivyo nvya ukazuzi mu malo ghakupatulika.

⁶Pakuti ŵasekuru ŵithu ŵakaŵa ŵambula kugomezgeka kwa FUMU, Chiuta withu na kuchita viheni panthazi pakhe. Ŵakayireka FUMU na kurazgako nkhonyoro kwa FUMU na ku nyumba yakhe.

⁷Ŵakajaraso vijaro vya khonde la muryango wa Nyumba FUMU, ŵakazimya nyali, ŵakareka kupereka na kocha vyakununkhira, ndipo ŵakareka kupereka sembe zakocha kwa Chiuta wa Israele mu malo ghakupatulika.

⁸Pa chifukwa ichi FUMU yili kuŵakwiyira ŵaYuda na ŵa mu Yerusalemu na kuŵazgora kuŵa chinthu chakuseruska, chakusekeka ndiposo chakulengeska nga ndi umo namwe mukuchiwonera na maso ghinu.

⁹Ndicho chifukwa ŵasekuru ŵithu ŵali kumara na nkhondo ndipo ŵana ŵithu na ŵawoli ŵithu ŵali ku umikori.”

¹⁰“Sono nkhughanaghana kuti ndichite phangano na FUMU, Chiuta wa Israele mwakuti wawereko ku ukari wakhe wakofya pa ise.

¹¹Mwa ŵana ŵane, sono mureke kuŵa na mphwayi pakuti FUMU yili kumusorani imwe pa mlimo wakhe kuti mwimilirenge panthazi pakhe kuyiteŵetera ndiposo na kumochera vyakununkhira.”

¹²ŴaLevi awo ŵakaŵapo ndipo mitima yawo yikawukira muchanya na kwamba kuteŵeta kufuma mu mbumba ya Kohati, mukaŵa aŵa: Mahati mwana wa Amasayi na Yoyele mwana wa Azariya. Kufuma mu mbumba ya Merari, mukaŵa Kishi mwana wa Abidi na Azariya mwana wa Yehalelele. Kufuma mu mbumba ya Gerishoni, mukaŵa Yowa mwana wa Zima, na Edeni mwana wa Yowa.

¹³Kufuma mu mbumba ya Elizafani. Mukaŵa Shimuri na Yeyiyele. Kufuma mu mbumba ya Asafu, mukaŵa Zakariya na Mataniya.

¹⁴Kufuma mu mbumba ya Hemani, mukaŵa Yehiyele na Shimeyi. Kufuma mu mbumba ya Yedutuni, mukaŵa Shemaya na Uziyele.

¹⁵Ŵanthu aŵa ŵakawunganya ŵaLevi ŵanyawo wose na kujitozga ndipo ŵakanjira mu Nyumba ya Chiuta kuya kayitozga nga ndi umo karonga wakalangulira, kwakuyana na mazgu gha FUMU.

¹⁶Ŵasofi ŵakanjira mu Nyumba ya FUMU mukati ndipo wakamba kuyitozga. Ŵakafumyamo vya ukazuzi vyose ivyo vikaŵa mwenemura kwiza navyo pa baraza la Nyumba ya FUMU. Penepapo ŵaLevi ŵakavitora na kuvitaya ku kamronga ka Kidironi.

¹⁷Ŵasofi ŵara ŵakamba kuyipatula nyumba pa zuŵa lakudanga mu mwezi wakudanga, ndipo pa zuŵa la chinkhonde na chitatu la mwezi, ŵakafika pa khonde la pa muryango wa mu Nyumba ya FUMU. Pa mazuŵa ghanyakhe ghankhonde na ghatatu wakayipatula Nyumba ya FUMU iyoyene na kuyimarizga pa zuŵa la 16 la mwezi wakudanga.

¹⁸Penepapo ŵasofi ŵara ŵakaruta kwa Karonga Hezekiya ndipo ŵakati kwa iwo, “Mbumba yose ya Fumu tayitozga kwamba jochero la sembe zakocha pamoza na viteŵetero vyakhe vyose ndiposo na gome la chingwa chakurongora uŵapo wa FUMU pamoza na viteŵetero vyakhe vyose.

¹⁹Viteŵetero vyose ivyo Karonga Ahazi wakavitaya pa nyengo ya kuwusa kwakhe apo wakaŵa wambula kugomezga, tavinozga na kuvipatula. Ndipo wonani, vili panthazi pa jochero la FUMU.”

²⁰Karonga Hezekiya wakawuka na machero ghakhe ku mulenje chomene na kuwunganya ŵarongozgi ŵa msumba pamoza ndipo wakaruta ku Nyumba ya Chiuta.

²¹Ŵanthu ŵara ŵakiza na nkhambako zinkhonde na ziŵiri, mberere zanarume zinkhonde na ziŵiri, ŵana-mberere ŵankhonde na ŵaŵiri, ndiposo na ŵapepe ŵankhonde na ŵaŵiri, kuti viŵe sembe zakuphepiskira zakwananga za ufumu ura, na za Nyumba ya Chiuta ndiposo na za ŵaYuda. Karonga wakalangula ŵasofi, ŵa mbumba ya Aroni kuti ŵavipereke pa jochero la FUMU.

²²Ntheura ŵanthu ŵara ŵakakoma nkhambako zira, ndipo ndopa zakhe ŵasofi ŵakupokerera na kuzimijira pa jochero. Wakakomaso mberere zanarume zira ndipo ndopa zakhe ŵakazimijira pa jochero. Ŵakakomaso ŵana-mberere ŵara na kumijira ndopa zawo pa jochero.

²³Ndipo mbuzi zanarume zira ŵakiza nazo kuŵa sembe yakuphepiskira zakwananga za karonga na ŵanthu wose ŵakuwungana ŵara ndipo ŵakaŵika mawoko ghawo pa izo.

²⁴Ŵasofi ŵakakoma mbuzi zira ndipo ndopa za mbuzi zira ŵakazithira pa jochero kuŵa sembe zakuphepiskira zakwananga za ŵanthu wose ŵaIsraele. Pakuti karonga wakalangula kuti sembe yakocha na sembe ya za kwananga zichitikire charu chose cha Israele.

²⁵Penepapo Karonga Hezekiya wakaŵika ŵaLevi ŵara mu Nyumba ya Chiuta kuti ŵimbenge sumu za kurumba na ŵabango, viding'indi na ŵazeze nga ndi umo Karonga Davide mwa Gadi, muwoni wakhe, ndiposo na Natani nchimi ya Chiuta ŵakayowoyera. Ichi chikalangurika na FUMU kwizira mu nchimi zakhe.

²⁶Ntheura ŵaLevi ŵakimilira uku ŵakakorera vyakwimbira vya Davide ndipo ŵasofi ŵakakorera zimbata.

²⁷Hezekiya wakalangula kuti sembe yakocha yiperekeke pa jochero. Para ŵakamba kupereka sembe yakocha, sumu zakurumba FUMU zikimbikanga. Ŵakulizga zimbata pamoza na vyakwimbira vinyakhe vya Davide karonga wa Israele nawo ŵakamba kulizga.

²⁸Ŵanthu wose awo ŵakawungana wakayilambira FUMU pakusindamira visko vyawo pasi, apo ŵimbi ŵakwimba sumu zakurumba FUMU, ndipo ŵakulizga zimbata nawo ŵakulizga. Vyose ivi vikarutilira mpaka sembe yakocha yikamara kuperekeka.

²⁹Para ŵakati ŵamara kupereka sembe, Karonga Hezekiya na ŵanthu wose ŵakajikama na kuyisopa FUMU.

³⁰Penepapo Karonga Hezekiya pamoza na nduna zakhe ŵakaŵalangula ŵaLevi kuti ŵarumbe FUMU na mazgu agho Davide na muwoni Asafu ŵakalemba. Ntheura ŵakimba sumu zakurumba FUMU na kukondwa chomene ndipo wakasindamira pasi visko vyawo na kusopa.

³¹Penepapo Hezekiya wakati ku ŵanthu, “Sono mwajipereka mwekha kwa FUMU. Ntheura sendererani pafupi, mwize ku Nyumba ya Chiuta na kupereka sembe na vyawanangwa vyakuwonga kwa iyo.” Ndipo ŵanthu ŵakiza na kupereka sembe za kuwonga na sembe zakukoma kwa FUMU. Ndipo wose awo ŵakaŵa na mitima yakujipereka, ŵakapereka sembe zakocha mburuma.

³²Sembe zakocha izo ŵakapereka kwa FUMU zikaŵa ntheura unandi wakhe: Nkhambako zikaŵa 70, mberere zanarume zikaŵa 100, ndipo ŵana-mberere ŵakaŵa 200.

³³Ŵanthu ŵakizaso na nkhambako 600 ndiposo mberere na mbuzi 3,000 kuŵa nga vyawanangwa kuti ŵanthu ŵakome na kurya.

³⁴Kweni ŵasofi ŵakaŵa ŵachoko chomene mwakuti ŵakatondekanga kufuŵa sembe zose zakocha zira. Sono pakulindirira kuti ŵasofi ŵanyakhe ŵajitozge, ŵabali ŵawo ŵaLevi ndiwo ŵakaŵawovwiranga mpaka mlimo wose umare. ŴaLevi ŵakaŵikangapo mtima chomene pakujitozga kuruska ŵasofi.

³⁵Pa dera pa sembe zinandi chomene zakocha izo zikaperekeka, pakaŵaso sembe ya mafuta, sembe ya wenenawene, ndiposo na sembe ya vyakumwa. Ntheura mlimo wose wa mu Nyumba ya Chiuta ukambikaso.

³⁶Karonga Hezekiya pamoza na ŵanthu wose ŵakasekerera chifukwa cha ivyo Chiuta wakaŵachitira ŵanthu, pakuti ichi chikachitika mwaluŵiro chomene.