Read new_tumbuka_bible 2 Midauko 3 Bible Online

2 Midauko 3 - new_tumbuka_bible bible

2 Midauko 3

¹Ntheura Solomoni wakamba kuzenga Nyumba ya Chiuta mu Yerusalemu pa Phiri la Moriya uko FUMU yikawonekera kwa Davide ŵawiske ŵakhe. Pa malo gheneagha ndipo Davide wakasankha apo pakaŵa pa luwugha lwa Orinani muYebusi.

²Solomoni wakamba kuzenga Nyumba ya Chiuta mu mwezi wa chiŵiri, wa chirimika cha chinayi cha kuwusa kwakhe.

³Lufura lwa Nyumba ya Chiuta ulo Solomoni wakazengapo nyumba yira lukaŵa mamita 27 mu utali ndipo mamita ghankhonde na ghanayi mu usani.

⁴Khonde la pa muryango wa Nyumba ya Chiuta, likaŵa mamita ghankhonde na ghanayi mu usani uko kukayana waka na usani wa nyumba ndipo kukwera kwakhe likaŵa mamita 44 mu utali. Mukati mwakhe wakaliphaka golide mwenecho.

⁵Mukati mwa chipinda chikuru chakukumaniranamo ŵakakhomako mathabwa gha mulombwa na kughaphaka golide lenecho. Ndipo wakazongamo vithuzithuzi vya mikama na maunyoro.

⁶Ŵakayitozga Nyumba ya Chiuta yira na mawe gha mtengo wa patali ndipo golide uyo wakaphakamo wakafuma ku charu cha Parivayimu.

⁷Ndipo wakaphaka nyumba yira na golide: michiko yakhe, mizati, viliŵa na vijaro vyakhe ndipo pa viliŵa wakazongapo vithuzithuzi vya ŵakerubi.

⁸Wakazengaso Malo Ghakupatulika Nkhanira agho utali wakhe ukayana waka na usani wa nyumba, mamita 9 mu usani ndiposo mamita 9 mu utali. Wakachiphaka golide mukati mwakhe wakukwana matani 20.

⁹Uzitu wa mizumali ya golide ukaŵa magiramu 570. Ndipo vipinda vya pachanya wakaviphaka golide.

¹⁰Mu Malo Ghakupatulika Nkhanira wakapangiramo ŵakerubi ŵaŵiri ŵa khuni ndipo wakaŵaphaka na golide.

¹¹Mapapindo gha ŵakerubi wose pamoza para ŵaghatambasura ghakaŵa pafupi mamita ghankhonde na ghanayi. Phapindo limoza la mukerubi munyakhe likaŵa mamita ghaŵiri na masentimita 20, mu utali wakhe ndipo likafika ku chiliŵa cha Nyumba ya Chiuta. Ndipo phapindo linyakhe nalo likaŵa ntheura pera mamita ghaŵiri na masentimita 20 na kukhwaskana na phapindo la mukerubi munyakhe.

¹²Phapindo la mukerubi wa chiŵiri nalo likaŵa mamita ghaŵiri na masentimita 20 mu utali wakhe ndipo likafika ku chiliŵa na Nyumba ya Chiuta ndipo phapindo linyakhe nalo likaŵa ntheura pera mamita ghaŵiri na masentimita 20 na kukhwaskana na phapindo la mukerubi linyakhe.

¹³Mapapindo gha ŵakerubi aŵa ghakatandauka mamita ghankhonde na ghanayi. Iwo ŵakimilira na malundi ghawo ndipo visko vyawo vikarazga mu chipinda chikuru.

¹⁴Wakapanga salu yakuchinga ya salu ya bululu, yichesamu, yiswesi, ndiposo na ya bafuta muweme ndipo wakayiroŵa na ŵakerubi.

¹⁵Kumaso kwa Nyumba ya Chiuta yira wakazengako mizati yiŵiri iyo mu utali wakhe yikaŵa pafupi mamita 16 ndipo mutu wa mzati uliwose ukaŵa mamita ghaŵiri pachanya masentimita 20.

¹⁶Wakapanga maunyoro gheneagho ghakaŵa nga ndi majuda gha pa singo na kughaŵika pachanya kuzingirizga mitu ya mizati yira. Wakapangaso vithuzithuzi 100 vya magalagadeya na kuviŵika pa maunyoro ghara.

¹⁷Wakimika mizati yiŵiri yira kunthazi kwa Nyumba ya Chiuta, umoza ku chigaŵa cha ku mwera, unyakhe ku chigaŵa cha ku mpoto. Wa ku mwera wakawuthya kuti, “Yakini”, ndipo wa ku mpoto wakawuthya kuti, “Bowazi.”