Read new_tumbuka_bible 2 Midauko 30 Bible Online

2 Midauko 30 - new_tumbuka_bible bible

2 Midauko 30

¹Karonga Hezekiya wakatuma mazgu ku ŵanthu wose ŵa charu cha Israele na cha Yuda. Wakalembaso makarata kuti gharute ku ŵanthu ŵa fuko la Efurayimu na la Manase kuŵachema kuti ŵize ku Nyumba ya Chiuta mu Yerusalemu mwakuti ŵizakaŵe na chiphikiro cha Paska kwa FUMU, Chiuta wa Israele.

²Karonga pamoza na nduna zakhe ndiposo na wumba wose mu Yerusalemu ŵakazomerezgana kuchita chiphikiro cha Paska mu mwezi wa chiŵiri.

³Vikaŵa ntheura chifukwa ŵanthu ŵakatondekanga kuchita chiphikiro cha Paska pa nyengo yakhe na yakhe pakuti ŵasofi ŵanandi kuti ŵakajitozga chara ndipo ŵanthu nawo ŵakareka kuwungana mu Yerusalemu.

⁴Ndipo fundo iyi yikawoneka kuŵa yiweme kwa karonga na ku ŵanthu wose awo ŵakawungana.

⁵Ntheura ŵakadumula kuti ŵapharazge uthenga uwu mu charu chose cha Israele kufuma ku Beyeresheba ku mwera mpaka ku Dani ku mpoto. Ŵanthu wose ŵakenera kuphalirika kuti ŵize ku Yerusalemu mwakuti waŵe na chiphikiro cha Paska kwa FUMU, Chiuta wa Israele. Chiphikiro ichi kuti chikachitikanga na ŵanthu ŵanandi chara nga ndi umo kukalembekera.

⁶Nthumi zira zikaruta nga ndi umo wakalangulira karonga na nduna zakhe ndipo zikayegha makarata kuruta nayo mu charu chose cha Israele na cha Yuda. Mu makarata ghara mukalembeka kuti: “Mwa ŵanthu mose ŵa charu cha ŵaIsraele, wererani kwa FUMU, Chiuta wa Abrahamu, wa Yisake na wa Yakhobe mwakuti iyo nayo wawerere kwa imwe, mwaŵeneimwe muli kukharako, imwe mukaponapo ku woko la ŵakaronga wa charu cha Asiriya.

⁷Mureke kuŵa nga mba wiskemwekuru na ŵabali ŵinu awo ŵakaŵa ŵambula kugomezgeka kwa FUMU, Chiuta wa wiskewokuru. Ntheura FUMU yikaŵamara petu nga ndi umo mukuwonera.

⁸Sono mureke kunonofya mitima yinu nga ndi umo wakachitira ŵawiskemwekuru. Kweni imwe mujipereke kwa FUMU. Mwize ku Nyumba ya Chiuta iyo wayipatula kwa muyirayira. Muyiteŵeterenge FUMU, Chiuta winu mwakuti yiwereko ku ukari wakhe wakofya kwa imwe.

⁹Chifukwa usange mungawerera kwa FUMU, ŵanthu awo ŵakakora ŵabali ŵinu na ŵana ŵinu kuŵa ŵazga ŵawo, ŵati ŵaŵenge na lusungu kwa iwo ndipo ŵati ŵaŵazomerezge kuwerera ku charu chawo. FUMU, Chiuta winu ngwa uchizi na wa chiwuravi ndipo usange imwe mukuwerera kwa iyo, wati wamupokererani.”

¹⁰Nthumi zira izo zikayegha makarata zikenda kufuma msumba uwu na uwu mu charu cha fuko la Efurayimu na la Manase, mpaka zikafika ku charu cha fuko la Zebuloni. Kweni ŵanthu ŵa kwenekura ŵakaziseka na kuzihoya chomene.

¹¹Wakaŵako ŵanthu ŵachoko waka wa fuko la Ashere, la Manase na la Zebuloni awo ŵakajinyumwa, ŵakiza ku Yerusalemu.

¹²Ndipo nkhongono ya Chiuta yikaŵa na ŵaYuda kuti waŵe na mtima umoza pakurondezga mazgu gha FUMU umo karonga na nduna zakhe ŵakalangulira.

¹³Ŵanthu ŵanandi ŵakawungana mu Yerusalemu kuti ŵaŵe na chiphikiro cha Chingwa chambula chirungo mu mwezi wa chiŵiri. Uwu ukaŵa ungano ukuru chomene.

¹⁴Ŵanthu ŵakamba kuwuskamo majochero ghose agho ghakaŵa mu Yerusalemu ndiposo na majochero ghakocherapo vyakununkhira nayo ŵakaghafumyamo na kughataya ku kamronga ka Kidironi.

¹⁵Ndipo pa zuŵa la 14 la mwezi wa chiŵiri ŵakakoma mwana-mberere wa sembe ya Paska. Ŵasofi na ŵaLevi awo ŵakaŵa ŵandajitozge, soni zikaŵakora mwakuti penepapo ŵakajitozga ndipo ŵakiza na sembe zakocha ku Nyumba ya FUMU.

¹⁶Penepapo ŵakamba milimo yawo mu Nyumba ya FUMU nga ndi umo ŵakachitiranga kwakuyana na Dango la Mozesi muteŵeti wa Chiuta. Ŵasofi ŵakati ŵapokerera ndopa za sembe kufuma ku ŵaLevi, ŵakazimijira pa jochero.

¹⁷Pa ungano pakaŵa ŵanthu ŵanandi awo kuti ŵakajitozga chara. Ntheura ŵaLevi ŵakenera kumukomera mwana-mberere ŵa Paska waliyose uyo wakaŵa wambula kutozgeka, kuti waŵe wakupatulika kwa FUMU.

¹⁸Nangauli ŵanandi awo ŵakiza kufuma ku fuko la Efurayimu, la Manase, la Isakara na la Zebuloni ŵakaŵa ŵambula kujitozga, kweni ŵakarya Paska kupambana na umo vili kulembekera kuti wambula kujitozga wareke kurya. Kweni Karonga Hezekiya wakaŵarombera wakati, “FUMU, yeneiyo njiweme nadi, yigowokere waliyose,

¹⁹uyo waŵikapo mtima pakumupenja Chiuta, FUMU Chiuta wa wiskekuru na mtima wawo wose, nangauli ŵangaŵa ŵambula kujitozga kwakuyana na marango gha pa Nyumba ya Chiuta.”

²⁰FUMU yikamupulika Hezekiya ndipo yikaŵagowokera zakwananga zawo na kuŵachizga.

²¹ŴaIsraele awo ŵakawungana mu Yerusalemu, ŵakaŵa na chiphikiro cha chingwa chambula chirungo pa mazuŵa ghankhonde na ghaŵiri na kukondwa chomene. Ŵasofi na ŵaLevi ŵakimbanga sumu zakurumba FUMU, zuŵa na zuŵa uku ŵakulizga vyakwimbira vyawo kumwimbira FUMU.

²²Ndipo Hezekiya wakayowoya mwa kuŵakhwimiska ŵaLevi wose awo ŵakaŵa ŵamwamphu pakuteŵetera FUMU. Ntheura ŵanthu ŵakarya chiphikiro cha Paska pa mazuŵa ghankhonde na ghaŵiri na kupereka sembe za wenenawene na kurumba FUMU, Chiuta wa ŵawiskewokuru.

²³Pamanyuma ŵanthu ŵa ungano ŵara ŵakazomerezganaso kuti ŵarutizge kuŵa na chiphikiro pa mazuŵa ghanyakhe ghankhonde na ghaŵiri. Ndipo wakachita chiphikiro chira na kukondwa chomene.

²⁴Karonga Hezekiya wa charu cha Yuda wakapereka nkhambako 1,000 ndiposo na mberere na mbuzi 7,000 kuti ziperekeke kuŵa sembe. Nduna zakhe nazo zikapereka nkhambako 1,000 ndiposo na mberere na mbuzi 10,000 ku ungano weneuwu. Ndipo ŵasofi ŵanandi ŵakajiphotora.

²⁵Sono ŵanthu wose ŵa charu cha Yuda, ŵasofi na ŵaLevi pamoza na awo ŵakafuma ku chigaŵa cha ku mpoto na ŵalendo awo ŵakakharanga mu charu cha Yuda, wakakondwa chomene.

²⁶Ntheura ŵanthu ŵakakondwa chomene mu Yerusalemu, pakuti kufuma pa nyengo ya Karonga Solomoni wa charu cha Israele, mwana wa Davide, kuti ŵanthu ŵakakondwapo nga ndi umo ŵakachitira pa nyengo iyi mu Yerusalemu chara.

²⁷Penepapo ŵasofi na ŵaLevi ŵakawuka na kuŵatumbika ŵanthu ndipo Chiuta wakaŵapulika pakuti lurombo lwawo lukafika kuchanya ku chikhazi chakhe chakupatulika.