Read new_tumbuka_bible 2 Midauko 31 Bible Online

2 Midauko 31 - new_tumbuka_bible bible

2 Midauko 31

¹Chikati chamara chiphikiro cha Chingwa chambula chirungo, ŵaIsraele wose awo ŵakaŵa pa ungano ura ŵakaruta ku misumba ya charu cha Yuda na kuphwanyira pasi vikozgo vyose, na kudumula mizati yakusoperamo Ashera. Ŵakabwangandula malo gha pachanya ghakusoperako na majochero ghakhe mu charu chose cha Yuda na cha Benjamini, ndiposo na cha Efurayimu na Manase. Ŵakati ŵamara kubwangandula vyose, ŵaIsraele ŵakawerera ku misumba yawo na ku nyumba zawo.

²Sono Hezekiya wakimika ŵasofi na ŵaLevi kuŵa mu mawupu. Wupu uli wose ukaŵa pa uteŵeti wakhe nga ndi musofi kupereka sembe zakocha na za wenenawene kwa FUMU panji nga ndi mu Levi kwimba sumu za kuwonga na kurumba FUMU mu mabaraza na mu vipata vya Nyumba ya Chiuta.

³Karonga wakaperekanga kufuma mu viŵeto vyakhe sembe zakocha za mulenje na za mise ndipo na viŵeto vinyakhe kuŵa sembe pa sabata waliyose, pa chiphikiro cha kuthwasa kwa mwezi uliwose na pa viphikiro vya kwimikika nga ndi umo kuli kulembekera mu marango gha FUMU.

⁴Ndiposo karonga wakaŵalangulira ŵanthu awo ŵakakharanga mu Yerusalemu kuti ŵaperekenge phande ku ŵasofi na ŵaLevi mwakuti ŵajiperekenge kusungilira marango gha FUMU.

⁵Languro la karonga likati lapulikikwa, maluŵiro ŵaIsraele ŵakapereka mwa wanangwa vipambi vyakwamba kucha nga ndi tirigu, vinyo, mafuta, uchi ndipo na vinyakheso ivyo ŵakalima. Ndipo ŵakaperekaso chakhumi mu vyose ivyo ŵakaŵa navyo. Ivyo vikaperekeka vikaŵa vinandi chomene.

⁶ŴaIsraele na ŵaYuda awo ŵakakharanga mu misumba ya charu cha Yuda ŵakiza na chakhumi cha ng'ombe, cha mberere na mbuzi ndiposo na chakhumi cha vinthu vyakupatulika ivyo vikenera kuperekeka kwa FUMU, Chiuta wawo ndipo wakaviwunjika mu miwulumiwulu.

⁷Ŵanthu ŵakamba kupereka vyawanangwa pa mwezi wa chitatu ndipo ŵakamara pa mwezi wa chinkhonde na chiŵiri yikasuka yikaŵa miwulu yikuru.

⁸Para Hezekiya na nduna zakhe ŵakati ŵiza na kuwona miwulu yira, ŵakarumba FUMU ndiposo na ŵanthu ŵakhe ŵaIsraele.

⁹Penepapo Hezekiya wakafumba ŵasofi na ŵaLevi za vyawanangwa vira.

¹⁰Ndipo Azariya, musofi mukuru wa mu mbumba ya Zadoki wakazgora karonga wakati, “Kufuma pa nyengo iyo ŵanthu ŵakambira kwiza na vyawanangwa vya ku Nyumba ya Chiuta, taryanga na kukhuta, ndipo tavirekangapo vinandi chifukwa FUMU ya ŵatumbika ŵanthu ŵakhe. Ndicho chifukwa tili navyo vinandi ivyo vyakharako.”

¹¹Penepapo Hezekiya wakalangula kuti ŵazengemo vipinda mu Nyumba ya FUMU kuti wasungemo vyakurya vira ndipo vipinda vikazengeka.

¹²Ntheura mwakugomezgeka ŵakanjizga vyakupereka vya chakhumi na vinthu vyakupatulika. MuLevi Konaniya ndiyo wakaŵa murara wakusungilira vinthu ivi ndipo wa chiŵiri wakhe wakaŵa Shimeyi munung'una wakhe.

¹³Karonga Hezekiya wakimikaso Azaziya musofi mukuru wa Nyumba ya Chiuta pamoza na ŵaLevi aŵa: Yehiyele, Azaziya, Nahati, Asahele, Yerimoti, Yozabadi, Eliyele, Isimakiya, Mahati na Benaya kuŵa ŵalaŵiliri ŵa vyakurya vira pasi pa. Aŵa ŵakaŵa pasi Konaniya na Shimeyi munung'una wakhe.

¹⁴Ndipo Kore, mwana wa Imuna muLevi, mulinda wa chipata cha ku mafumiro gha dazi, ndiyo wakaŵa na mazaza pa vyawanangwa ivyo ŵanthu ŵakaperekanga mu wanangwa kwa Chiuta. Iyo wakagaŵanga vyakupereka ivyo wakaviŵika pa dera kuŵa vya FUMU na vya vinthu vyakupatulika nkhanira.

¹⁵Mu misumba yinyakhe umo mukakharanga ŵasofi, Kore wakovwirikanga na ŵaLevi ŵakugomezgeka aŵa: Edeni, Miniyamini, Yeshuwa, Shemaya, Amariya na Shekaniya. Iwo ŵagaŵiranga vyakurya ku ŵasofi ŵanyawo ŵarara na ŵachoko wuwo, kwakuyana na vigaŵa vyawo.

¹⁶Kweniso ŵakagaŵanga ku ŵanarume kwambira pa virimika 30[4] na kujumphilirako ŵeneawo ŵakalembeskanga kwakuyana na mbumba zawo. Aŵa ndi awo ŵakanjiranga mu Nyumba ya Chiuta kuya kateŵeta mlimo wa zuŵa na zuŵa kwakuyana na vigaŵa vyawo nga ndi umo nchito yawo yikakhumbikwiranga.

¹⁷Ŵasofi ŵakaŵalembanga kwakuyana na mbumba za wiskewo ndipo ŵaLevi awo ŵakaŵalembanga ŵakaŵa ŵa virimika 20 na ŵakujumphirapo kwakuyana na nchito zawo mu vigaŵa vyawo.

¹⁸Ŵasofi ŵakalembeka pamoza na twabonda twawo, ŵawoli ŵawo, ŵana ŵawo ŵanarume na ŵanakazi, pamoza na ŵanyakhe awo ŵakakharanga nawo, pakuti ŵakaŵa ŵakugomezgeka pakujisungilira kuŵa ŵakupatulika.

¹⁹Kweni ŵasofi awo ŵakaŵa ŵa mbumba ya Aroni ŵeneawo ŵakakharanga mu vikaya vya mu minda uko ŵakaliskirangako viŵeto vyawo pafupi na misumba ya charu cha Yuda, ŵakaŵazunuranga mazina kuti ŵagaŵire chakurya waliyose uyo wakaŵa mwanarume mu mbumba ya usofi ndiposo na waliyose uyo wakalembeka nga ndi muLevi.

²⁰Hezekiya wakachita ichi mu charu chose cha Yuda. Iyo wakachita ivyo vikaŵa viweme na vyakunyoroka ndipo wakaŵa wakugomezgeka panthazi pa FUMU, Chiuta wakhe.

²¹Mu mlimo uliwose wa mu Nyumba ya Chiuta na mu kupulikira marango na malangulo gha Chiuta, Hezekiya, pakupenja khumbo la Chiuta wakhe, wakachita na mtima wakhe wose ndipo vinthu vikamwendera makora.