Read new_tumbuka_bible 2 Midauko 32 Bible Online

2 Midauko 32 - new_tumbuka_bible bible

2 Midauko 32

¹Hezekiya wakati wachita milimo yiweme na mwakugomezgeka panthazi pa FUMU, Senakeribu karonga wa charu cha Asiriya wakiza na nkhondo mu charu cha Yuda. Wakazenga misasa kuzingirizga misumba ya malinga ndipo wakaghanaghana kuti wayipoke kuti yiŵe yakhe.

²Hezekiya wakati wawona kuti Senakeribu wiza ndipo wanozgeka kuti warwe nkhondo na ŵanthu ŵa mu Yerusalemu,

³wakanozgera pamoza na ŵarongozgi ŵakhe ŵa ŵasilikari ndiposo na vinkhara vya nkhondo kujara mbwiwi za maji izo zikaŵa kuwaro kwa msumba. Iwo ŵakakhozgera fundo iyi.

⁴Ŵanthu ŵanandi chomene ŵakawungana ndipo ŵakajara mbwiwi zose na kamronga ako kasorotanga mukati mu charu. Iwo ŵakayowoya kuti, “Kasi nchifukwa uli ŵakaronga ŵa charu cha Asiriya ŵize na kusanga maji ghanandi?”

⁵Hezekiya wakakhozgaso chivikiriro cha msumba pakuzenga chiliŵa cha linga pose apo chikagumuka na kuzenga vigongwe. Wakazengaso linga linyakhe kuwaro kwa linga lakudanga lira, ndipo wakakhozga ŵakapolosi gha msumba wa Davide. Wakapangaso mahomwa na nguru zinandi chomene.

⁶Wakimika ŵarongozgi ŵasilikari kuti ŵawusenge ŵanthu ndipo ŵakaŵawunganya ŵanthu pa baraza ulo lukaŵa pa chipata cha msumba ndipo wakaŵakhwimiska na mazgu agha:

⁷“Muŵe ŵankhongono na ŵakukhwima mu mtima. Mureke kopa nanga nkhuthika lusoko chifukwa cha karonga wa charu cha Asiriya na ŵasilikari ŵakhe ŵanandi. Ise tili na nkhongono zinandi kuruska izo iwo ŵali nazo.

⁸Iyo wali na nkhongono za unthu pera, kweni ise tili na FUMU, Chiuta withu mweneuyo watovwira na kutirwera mu nkhondo zithu.” Ntheura ŵanthu ŵakakhwimiska na mazgu gha Hezekiya karonga wa charu cha Yuda.

⁹Pamanyuma pa ichi, Senakeribu karonga wa charu cha Asiriya pamoza na ŵasilikari ŵakhe wose ŵakazingirizga msumba wa Lakishi, wakatuma nduna zakhe kuruta ku Yerusalemu kwa Hezekiya karonga wa charu cha Yuda pamoza na ŵanthu wose awo ŵakakharanga mwenemumo. Mazgu agho wakaŵatuma nagho nduna zira ndi agha:

¹⁰“Senakeribu karonga wa charu cha Asiriya wakuti: Kasi icho chikukupa chigomezgo nchivichi kuti ukhalirire mu Yerusalemu na kuzingirika ntheura?

¹¹Asi Karonga Hezekiya wakumupusikani kuti mufwe na njara na nyota para wakumuphalirani kuti, ‘FUMU, Chiuta withu wati watithaske ku mawoko gha karonga wa charu cha Asiriya?’

¹²Asi ndi Hezekiya mweneuyu uyo wakakanizga visopo vya pa malo gha pachanya ghakusoperako, ndiposo na kubwangandulira pasi majochero ghakhe, na kuŵaphalira ŵaYuda na ŵa mu Yerusalemu kuti, ‘Imwe mukwenera kusopa FUMU panthazi pa jochero limoza pera na kupereka sembe yakocha pa leneliro pera?’

¹³Kasi mukumanya chara icho ine na ŵadada tili kuchita ku ŵanthu wose ŵa mu vyaru vinyakhe? Kasi ŵachiuta ŵa vyaru vyenevira ŵakamanya kuthaska vyaru vyawo kwa ine?

¹⁴Pa ŵachiuta wose ŵa ŵamitundu awo ŵadada ŵakaŵamara petu, kasi ndi njani uyo wakamanya kuthaska ŵanthu ŵakhe kwa ine? Kasi Chiuta winu ndiyo wamuthaskani ku woko lane?

¹⁵Ntheura sono mungazomerezganga kuti Hezekiya wamupusikani nanga nkhumupuruskani nga ndi umo wakuyowoyera. Mungamugomezganga pakuti palije chiuta wa fuko lirilose panji wa ufumu uliwose uyo wakamanya kuthaska ŵanthu ŵakhe ku woko lane panji ku woko la ŵadada. Kasi sono Chiuta winu wangamanya uli kumuthaskani ku woko lane?”

¹⁶Nduna za Senakeribu zikayowoya vinandi vya kutuka FUMU Chiuta na muteŵeti wakhe Hezekiya.

¹⁷Karonga yura wakalembaso makarata ghakutuka FUMU, Chiuta wa Israele. Iyo wakalemba kuti, “Nga ndi umo ŵachiuta ŵa ŵanthu ŵa vyaru vinyakhe ŵakatondekera kuthaska ŵanthu ŵawo kufuma ku woko lane, ntheura ndimo Chiuta wa Hezekiya watondekerenge kuthaska ŵanthu ŵakhe kufuma mu woko lane.”

¹⁸Ntheura ŵakachemerezga chomene mu chiyowoyero cha chiHebere ku ŵanthu ŵa mu Yerusalemu awo ŵakaŵa pa linga kuti ŵa ŵatenthemiske na kuwofya mwakuti ŵapoke msumba.

¹⁹Ŵakamutemba Chiuta wa Yerusalemu nga ndi umo wakatembera ŵachiuta ŵa vyaru vinyakhe, ŵachiuta awo ŵakapangika na mawoko gha ŵanthu.

²⁰Karonga Hezekiya pamoza na nchimi Yesaya mwana wa Amozi wakaromba kwa Chiuta kuchanya uku wakulira kuti wawovwire.

²¹FUMU yikatuma mungelo mweneuyo wakakoma ŵasilikari, ŵarongozgi ŵa ŵasilikari na nduna za karonga wa charu cha Asiriya awo ŵakaŵa mu msasa. Penepapo Senakeribu wakawerera ku charu cha kwakhe wali na soni chomene. Ndipo zuŵa limoza wakati wanjira mu nyumba ya chiuta wakhe, ŵanji ŵa ŵana ŵakhe ŵakamukoma na lupanga mwenemura.

²²Ntheura FUMU yikamuthaska Hezekiya na ŵanthu awo ŵakakharanga mu Yerusalemu kwa Senakeribu karonga wa charu cha Asiriya, na ku ŵarwani ŵakhe wose. Ntheura Fumu yikaŵavikiriranga ku ŵarwani wose.

²³Ŵanthu ŵanandi ŵakizanga na vyawanangwa kwa FUMU mu Yerusalemu ndiposo ŵakaperekanga vinthu vya kuzirwa kwa Hezekiya karonga wa charu cha Yuda. Ntheura Hezekiya wakamanyikwa chomene na ŵanthu ŵa vyaru vinandi kwamba pa nyengo yeneyira.

²⁴Nyengo yimoza Hezekiya wakarwara ndipo wakaŵa pafupi na kufwa. Ntheura wakaromba kwa FUMU yeneiyo yikamupulika na kumupa chimanyikwiro kuti wati wachirenge.

²⁵Kweni Hezekiya wakamba kujikuzga mu mtima wakhe pakureka kuwonga icho FUMU yikamuchitira. Chifukwa cha ichi, FUMU yikamukwiyira Hezekiya ndiposo na ŵaYuda na ŵa mu Yerusalemu.

²⁶Pamanyuma Hezekiya pamoza na ŵanthu ŵa mu Yerusalemu ŵakajiyuyura panthazi pa FUMU mwakuti FUMU yikawerako ku ukari wakhe kwambula kuŵalanga mu mazuŵa ghose gha Hezekiya.

²⁷Hezekiya wakaŵa musambazi chomene ndipo ŵanthu ŵakamuchindikanga chomene. Ndipo wakajizengera nyumba zakusungiramo ndarama za siliva, za golide, mawe ghakuzirwa, vyakununkhira, zinguru na vinthu vinyakhe vinandi vya kuzirwa.

²⁸Wakazengaso nyumba zakusungiramo vyakurya, vinyo, na mafuta. Wakaŵaso na viŵaya vya ng'ombe za mtundumtundu na vitupa vya mberere.

²⁹Hezekiya wakazengaso misumba uko wakaŵeterako mberere, mbuzi na ng'ombe zinandi pakuti Chiuta wakamutumbika na usambazi unandi chomene.

³⁰Hezekiya ndiyo wakajara maji gha mronga wa Gihoni cha kunena kwakhe na kughapatuskira cha ku manjiliro gha dazi kwa msumba wa Davide. Mu vyose ivyo Hezekiya wakachitanga vinthu vikamwenderanga makora.

³¹Nanga ndi nthumi zira, zeneizo zikatumika na ŵakaronga wa charu cha Babuloni, nthumi izo zikatumika kuti zifumbilire na vya chinthu cha minthondwe icho chikachitika mu charu, Chiuta wakamureka yekha kuti wamuyezge na kumanya chose icho chikaŵa mu mtima wakhe.

³²Milimo yinyakhe ya Hezekiya, na kugomezgeka kwakhe kwa FUMU, vili kulembeka mu mboniwoni ya nchimi Yesaya mwana wa Amozi na mu Buku la ŵakaronga ŵa charu cha Yuda na cha Israele.

³³Hezekiya wakafwa ndipo ŵakamusunga pa chikwera cha madindi gha ŵana ŵa Davide. Ŵanthu wose ŵa charu cha Yuda na ŵa mu Yerusalemu wakamuchindika pa nyifwa yakhe. Mwana wakhe Manase ndiyo wakamba kuwusa mu malo ghakhe.