Read new_tumbuka_bible 2 Midauko 33 Bible Online

2 Midauko 33 - new_tumbuka_bible bible

2 Midauko 33

¹Manase wakaŵa na virimika 12 para wakambanga kuwusa ndipo wakaŵa karonga mu Yerusalemu pa virimika 55.

²Manase wakachita viheni panthazi pa FUMU pakuchita vya ukazuzi ivyo ŵamitundu ŵakachitanga ŵeneawo FUMU yikaŵachimbizgamo kuti ŵaIsraele ndiwo ŵahare charu chira.

³Iyo wakazengaso mu malo gha pachanya ghakusoperako gheneagho wiske Hezekiya wakabwangandula. Wakazenga ma jochero ghakuperekerapo sembe kwa chiuta Baala ndipo wakimika mizati yakusoperapo chiutakazi Ashera. Ndipo wakambaso kusopa nyenyezi na vyose vya mu mlengalenga na kuviteŵetera.

⁴Wakazenga majochero ghakuperekerapo sembe kwa ŵachiuta ngoza mukati mwa Nyumba ya Chiuta yeneiyo FUMU yikayowoya kuti, “Mu Yerusalemu ndimo ŵanthu ŵati ŵachindikirengemo zina lane kwa muyirayira.”

⁵Wakazengaso majochero gha kuperekerapo sembe ku nyenyezi za mu mlengalenga izo wakazisopanga mu mabaraza ghose ghaŵiri gha mu Nyumba ya FUMU.

⁶Wakapereka ŵana ŵakhe ŵanarume kuŵa sembe yakocha pa moto mu Dambo la Hinomu. Wakazomerezga ŵamaula, ŵaroski, ŵawukwi, fwiti, na ŵamayere. Manase wakachita viheni vinandi panthazi pa FUMU vyeneivyo vikawuska ukari wa FUMU.

⁷Chikozgo chakuŵaja cha chiutakazi Ashera chira wakachitora na kuchiŵika mu Nyumba ya Chiuta yeneiyo Chiuta wakayowoya kwa Davide na ku mwana wakhe Solomoni kuti, “Mu nyumba yeneiyi, mwenemumo mu Yerusalemu, ndimo ndili kusora mukati mu mafuko ghose gha mu Israele, kuti zina lane ndimo lichindikikirengemo kwa muyirayira.

⁸ŴaIsraele kuti ndizamkuŵafumyamoso chara mu charu icho nkhapereka ku ŵawiskewokuru, usange ŵangaŵikapo mtima pakupulikira vyose ivyo nkhuŵalangula mu marango ghose, vilayizgo na malangulo agho nkhapereka kwa Mozesi.”

⁹Manase wakaŵapuruska ŵanthu ŵa mu Yerusalemu mwakuti ŵakachita viheni kuruska ŵamitundu awo FUMU yikaŵafumyamo kuti ŵaIsraele ndiwo ŵahare charu chira.

¹⁰FUMU yikayowoya na kumuchenya Manase pamoza na ŵanthu ŵakhe, kweni kuti wakapulikira chara.

¹¹Ntheura FUMU yikaŵatumira ŵarongozgi ŵa ŵasilikari ŵa charu cha Asiriya na kurwa nayo nkhondo. Ŵasilikari ŵara ŵakamukora Manase ndipo ŵakamukoroŵeka pa mphuno, ŵakamukaka na unyoro wamkuŵa ndipo ŵakaruta nayo ku Babuloni nga ndi mukayidi.

¹²Ndipo para wakaŵa mu visuzgo, wakaromba kwa FUMU, Chiuta wakhe kuti waŵe na lusungu na iyo ndipo wakajiyuyura chomene panthazi pa Chiuta wa ŵawiskekuru.

¹³Ndipo wakati waromba, FUMU yikapulika kuŵeyerera kwakhe. Ntheura yikamuwezgera ku Yerusalemu na kumukhazikaso pa chizumbe cha ufumu wakhe. Penepapo Manase wakamanya kuti FUMU ndi Chiuta.

¹⁴Pamanyuma Manase wakazengaso linga la kuwaro kwa msumba wa Davide, ku dera la ku manjiliro gha dazi kwa mronga wa Gihoni mu chinkhwawu, mpaka wakafika pa chipata cha somba kuzingirizga linga la msumba wa Ofele. Wakalizenga litali chomene ndipo wakaŵikapo ŵarongozgi ŵasilikari mu misumba yose ya malinga gha mu charu cha Yuda.

¹⁵Wakawuskamo ŵachiuta ŵa chilendo, na chikozgo icho chikaŵa mu Nyumba ya FUMU. Wakawuskamoso majochero agho wakazenga pa phiri apo pakaŵa Nyumba ya FUMU na mu Yerusalemu ndipo wakavitaya kuwaro kwa msumba.

¹⁶Wakanozgaso jochero la FUMU na kuperekerapo sembe za wenenawene na za kuwonga kwa FUMU. Ndipo wakaŵaphalira ŵaYuda kuti ŵamuteŵeterenge FUMU, Chiuta wa Israele.

¹⁷Ndipouli ŵanthu ŵakarutilira kupereka sembe ku malo gha pachanya ghakusoperako, kweni ŵakaperekanga sembe zira kwa FUMU, Chiuta wawo pera.

¹⁸Milimo yinyakhe ya Manase na lurombo lwakhe kwa Chiuta wakhe ndiposo na mazgu gha ŵawoni awo ŵakayowoya nayo mu zina la FUMU, Chiuta wa Israele, vili kulembeka mu mudauko wa ŵakaronga ŵa mu charu cha Israele.

¹⁹Lurombo lwakhe ndiposo na umo Chiuta wakapokerera kuŵeya kwakhe, uheni wose awo wakachita, kuwura kugomezgeka kwakhe, malo ghose gha pachanya ghakusoperako agho wakazenga ndiposo na umo wakimikira mizati yakusoperapo Ashera na vikozgo vya kuŵaja vyeneivyo wakachita pambere wandajiyuyure vyose ivi, vili kulembeka mu mudauko wa nchimi.

²⁰Manase wakafwa ndipo wakasungika pafupi pa nyumba yakhe, ndipo Amoni mwana wakhe ndiyo wakamba kuwusa mu malo ghakhe.

²¹Amoni wakaŵa na virimika 22 para wakambanga kuwusa ndipo wakaŵa karonga mu Yerusalemu pa virimika viŵiri pera.

²²Amoni wakachita viheni panthazi pa FUMU nga ndi umo wakachitira wiske Manase. Wakapereka sembe ku vikozgo vyose vyeneivyo ŵawiske wakapanga na ku viteŵetera.

²³Amoni kuti wakajiyuyura panthazi pa FUMU chara nga ndi umo wakachitira wiske Manase, kweni Amoni wakarutilira kwananga.

²⁴Nduna za Amoni zikamuchitira chiŵembu ndipo zikamukomera mu nyumba yakhe ya ufumu.

²⁵ŴaYuda ŵakaŵakoma wose awo ŵakamuchitira chiŵembu Karonga Amoni ndipo ŵakamuŵika Yosiya mwana wakhe kuŵa karonga mu malo ghakhe.