Read new_tumbuka_bible 2 Midauko 34 Bible Online

2 Midauko 34 - new_tumbuka_bible bible

2 Midauko 34

¹Yosiya wakaŵa na virimika vinkhonde na vitatu para wakambanga kuwusa charu cha Yuda ndipo wakaŵa karonga mu Yerusalemu virimika 31.

²Yosiya wakachita ivyo vikaŵa viweme panthazi pa FUMU nga ndi ivyo wakachita Davide wiskekuru wakhe kwambula kuzgokera uku na uku.

³Mu chirimika cha chinkhonde na chitatu cha kuwusa kwakhe, apo wakaŵa wachali munyamata, wakamba kulambira Chiuta wa wiskekuru Davide. Ndipo mu chirimika cha 12 wakamba kutozga charu cha Yuda na mu msumba wa Yerusalemu pakuwuskamo malo gha pachanya ghakusoperako, mizati yakusoperako Ashera, vikozgo vya kuŵaja na vikozgo vyakusongonora.

⁴Ŵakalangula ŵanthu kuti ŵabwangandulire pasi majochero gha kocherapo sembe kwa chiuta Baala uku iyo Yosiya wakuwona na maso ghakhe. Ŵakawiskire pasi majochero gha kocherapo vyakununkhira ivyo vikaŵa pachanya pa majochero ghara. Mizati ghakusoperako Ashera pamoza na vikozgo vya kusongonora na vyakuŵaja ŵakaviteketa tuchokotuchoko na kuvizgora nga ndi fuvu. Ndipo fuvu lira wakalimijira pa mararo gha ŵanthu ŵara awo ŵakaperekanga sembe ku vinthu ivi.

⁵Viwangwa vya ŵasofi awo ŵakaperekanga sembe ku ŵachiuta ngoza, wakavyochera pa majochero ghawo. Ntheura wakatozga charu cha Yuda na msumba wa Yerusalemu.

⁶Wakachita ichi na mu misumba ya fuko la Manase, la Efurayimu na la Simiyoni mpaka na ku la Nafutali ndiposo na ku mahami ghawo zingirizge.

⁷Wakabwangandulira pasi majochero na mizati yakusoperapo Ashera. Wakateketa vikozgo na kuvizgora nga ndi fuvu, ndipo wakagumulira pasi majochero ghose gha kocherapo vyakununkhira mu charu chose cha Israele. Ndipo penepapo wakawerera ku Yerusalemu.

⁸Mu chirimika cha 18 cha kuwusa kwakhe Yosiya, wakati wamara kutozga charu cha Israele na Nyumba ya FUMU, wakatuma nduna zakhe zitatu, Shafani mwana wa Azaliya, Maaseya murongozgi murara wa msumba wa Yerusalemu, ndiposo na Yowa mwana wa Yowahazi, mulembi wa Midauko kuti ŵayinozge Nyumba ya FUMU, Chiuta wakhe.

⁹Ŵanthu aŵa ŵakaruta kwa Hilikiya musofi mukuru ndipo ŵakamupa ndarama izo ŵaLevi awo ŵakalindanga pa muryango wa Nyumba ya Chiuta wakawunjika. Ndarama izi wakawunjika kufumira ku ŵanthu ŵa fuko la Manase, la Efurayimu na ku wose ŵakukharako ŵa mu charu cha Israele ndipo na ŵanthu wose ŵa mu charu cha Yuda na cha Benjamini ku Yerusalemu.

¹⁰Ndarama zira ŵakazipereka ku ŵanthu ŵatatu ŵara awo ŵakaŵa ŵalaŵiliri pa Nyumba ya FUMU. Ŵanthu aŵa ŵakalipiranga ŵanthu awo ŵakanozgangaso Nyumba ya FUMU na kuti yiwereremo umo yikaŵira pakudanga.

¹¹Ndarama zinyakhe ŵakazipereka ku ŵakupara mathabwa na ŵazengi kuti ŵagule mawe ghakuŵaja makora na mathabwa gha mapaso na gha sito mwakuti ŵanozgereso nyumba izo ŵakaronga ŵa charu cha Yuda ŵakazirekerera waka kuti zigumukenge.

¹²Ŵanthu ŵara ŵakachita mlimo ura mwakugomezgeka ndipo awo ŵakawonereranga mlimo uwu ŵakaŵa ŵaLevi awo ŵakaŵa ŵaluso pakwimba sumu na vyakwimbira. ŴaLevi aŵa ŵakaŵa Yahati na Obadiya wa mbumba ya Merari ndipo Zakariya na Meshulamu ŵa mbumba ya Kohati.

¹³ŴaLevi ŵanyakhe ŵakaŵa ŵalaŵiliri ŵa ŵanthu awo ŵakayeghanga katundu ndipo na kurongozga ŵanthu wose awo ŵakachitanga milimo yakupambanapambana. Ndiposo ŵaLevi ŵanyakhe ŵakaŵa ŵalembi, ŵanyakhe ŵakaŵa ŵarongozgi, ndipo ŵanyakhe ŵakaŵa ŵalinda ŵa pa vipata vya Nyumba ya Chiuta.

¹⁴Apo ŵakatoranga ndarama izo ŵakiza nazo mu Nyumba ya Chiuta, musofi Hilikiya wakasanga Buku la Marango gha FUMU gheneagho ghakaperekeka kwa Mozesi.

¹⁵Hilikiya wakati kwa Shafani uyo wakaŵa mulembi, “Ndalisanga Buku la Marango mu Nyumba ya FUMU.” Penepapo wakalipereka kwa Shafani,

¹⁶mweneuyo wakiza nalo kwa karonga ndipo wakati kwa iyo, “Vyose ivyo mukalangula ŵateŵeti ŵinu kuti ŵachitenge, ŵakuchita.

¹⁷Ndarama zose izo zikaŵa mu vipinda vyakusungiramo vyuma mu Nyumba ya FUMU, ŵatora ndipo ŵazipereka ku ŵalaŵiliri ŵa nchito na ŵateŵeti.”

¹⁸Penepapo mulembi Shafani wakamuphalira karonga wakati, “Musofi Hilikiya wandipa buku.” Ndipo Shafani wakaŵazga buku lira panthazi pa karonga.

¹⁹Para karonga wakapulika mazgu gha mu Buku la Marango, wakaparura vyakuvwara vyakhe kurongora chitima.

²⁰Penepapo karonga wakalangula musofi Hilikiya, Ahikamu mwana wa Shafani, Abidoni mwana Mika, mulembi Shafani na Asaya muteŵeti wa karonga kuti,

²¹“Rutani mukafumbe kwa FUMU mu malo mwa ine na ŵanthu wose awo ŵakharako ŵa mu charu cha Israele na cha Yuda pa vya mazgu gha Buku la Marango ilo lasangika. Pakuti ukari wa FUMU uwo waŵa pa ise, ngukuru chifukwa ŵasekuru ŵithu ŵakasungilira chara mazgu gha FUMU. Iwo kuti ŵakachita kwakuyana na vyose ivyo vili kulembeka mu buku ili chara.”

²²Ntheura Hilikiya pamoza na ŵanthu awo karonga wakaŵatuma, ŵakaruta kuti ŵakayowoye na Hulida nchimi yanakazi yeneiyo yikakharanga mu Yerusalemu ku chigaŵa cha chiŵiri cha msumba. Mufumu wakhe Shalumu mwana wa Tokati, muzukuru wa Hasira ndiyo wakaŵa msungi wa vyakuvwara vya mu Nyumba ya Chiuta.

²³Nchimi yanakazi yira yikaŵazgora ŵanthu ŵara yikati, “FUMU, Chiuta wa Israele wakuti: Munthu uyo wamutumani kwa ine mukamuphalire kuti,

²⁴‘FUMU yikuti ine nditi ndilange Yerusalemu pamoza na ŵanthu ŵakhe wose na nthembo izo zili kulembeka mu buku ilo languŵazgika panthazi pa karonga wa charu cha Yuda.’ ”

²⁵ŴaYuda ŵali kundijowola ine ndipo ŵakupereka vyakununkhira ku ŵachiuta ŵanyakhe. Pa chifukwa ichi ŵandikwiyiska chomene pa vyose ivyo ŵakuchita. Ntheura ukari wane kuti uti ugowoke pa ŵanthu aŵa chara ndipo kuti uti utunengepo chara.

²⁶Kweni karonga wa charu cha Yuda mweneuyo wangumutuma kwiza kafumba kwa FUMU, mukamuphalire kuti, “Kwakuyana na mazgu agho muli kughapulika, FUMU, Chiuta wa Israele wakuti,

²⁷‘Chifukwa chakuti warapa ndipo wajiyuyura panthazi pa Chiuta, wati wapulike mazgu ghakususka Yerusalemu pamoza na ŵanthu ŵakhe ndiposo chifukwa chakuti waparura vyakuvwara vyako na kulira panthazi pa ine. Ine nane ndapulika. Ntheura ndimo yikayowoyera FUMU.

²⁸Ntheura chinthu chiheni icho ndatenge ndize nacho pa charu ichi na ŵanthu ŵakhe, kuti uchiwonenge chara mpaka iwe uzakafwe ndipo wizamkusungika mu dindi pamoza na ŵawusokuru ŵako.’ ” Penepapo ŵanthu ŵara ŵakayegha uthenga ura kuya kawupereka kwa Karonga Yosiya.

²⁹Penepapo Karonga Yosiya wakachema ŵararaŵarara wose ŵa charu cha Yuda na ŵa mu Yerusalemu kuti ŵawungane pamoza.

³⁰Ndipo karonga wakaruta ku Nyumba ya FUMU pamoza na ŵanthu wose ŵa charu cha Yuda na awo ŵakakharanga mu Yerusalemu, ŵasofi ndiposo na ŵaLevi na ŵanthu wose ŵakavu na ŵasambazi wuwo. Penepapo karonga wakaŵazga mazgu ghose gha mu Buku la Phangano leneilo likasangika mu Nyumba ya FUMU uku ŵanthu ŵakupulika.

³¹Karonga wakimilira pafupi na mzati ndipo wakachita phangano panthazi pa FUMU kuti, na mtima wakhe wose ndipo na umoyo wakhe wose wati wendenge mu nthowa za FUMU pakusunga mazgu ghakhe, marango ghakhe, vilayizgo vyakhe ndiposo na malangulo ghakhe na kuchita vyose ivyo vili kulembeka mu Buku la phangano.

³²Ntheura ŵanthu wose ŵa mu Yerusalemu na ŵa mu charu cha Benjamini, Yosiya wakaŵachiska kuti ŵachite phangano na FUMU na kulisunga. Ndipo nadi ŵanthu ŵa mu Yerusalemu ŵakachita phangano kwakuyana na mazgu gha phangano la Chiuta wa ŵawiskewokuru.

³³Yosiya wakafumyamo maukazuzi ghose mu vigaŵa vya mu charu chose icho chikaŵa cha ŵaIsraele na kuŵaphalira wose awo ŵakakharanga mwenemumo kuti ŵateŵeterenge FUMU, Chiuta wawo. Mu mazuŵa ghose gha umoyo wakhe, ŵanthu kuti wakareka kuteŵetera FUMU, Chiuta wa ŵawiskewokuru chara.