Read new_tumbuka_bible 2 Midauko 35 Bible Online

2 Midauko 35 - new_tumbuka_bible bible

2 Midauko 35

¹Karonga Yosiya wakachita chiphikiro cha Paska mu Yerusalemu cha kuchindikira FUMU. Mwana-mberere wa sembe ya Paska wakakomeka pa zuŵa la 14 la mwezi wakudanga.

²Ŵakimika ŵasofi pa nchito zawo ndipo wakaŵachiska kuti ŵateŵetenge mu Nyumba ya FUMU.

³Iyo wakati ku ŵaLevi awo ŵakasambizganga ŵaIsraele wose ndipo ŵeneawo ŵakaŵa ŵakupatulika kwa FUMU, “Bokosi la Phangano la FUMU leneilo ndakupatulika, muliŵike mu Nyumba ya Chiuta iyo Solomoni karonga wa Israele, mwana wa Davide, wakazenga. Mureke kuliyeghaso pa viŵegha vyinu. Ntheura sono muteŵeterenge FUMU, Chiuta winu na ŵanthu ŵakhe ŵaIsraele.

⁴Muŵe mu vigaŵa kwakuyana na mbumba zinu nga ndi umo wakalembera Davide karonga wa charu cha Israele, ndiposo na mwana wakhe Solomoni.

⁵Mwimilirenge mu malo ghakupatulika kwakuyana na vigaŵa vya mbumba zinu za ŵaLevi, kwimilira ŵanthu waka ŵa mu charu awo mbabali ŵinu. Mu mbumba yiliyose ya ŵaLevi yiŵe na chigaŵa chakhe na chakhe.

⁶Mukomenge mwana-mberere wa sembe ya Paska ndipo mujitozge. Ndipo muŵanozgere ŵabali ŵinu ŵana-mberere mwakuti ŵachite kwakuyana na mazgu gha FUMU agho yikayowoyera mwa Mozesi.”

⁷Yosiya wakapereka ku ŵanthu wose awo ŵakaŵapo pa zuŵa la chiphikiro ŵana-mberere na mbuzi zakukwana 30,000 ndipo wakaperekaso nkhambako 3,000 kuti ziŵe sembe ya pa chiphikiro cha Paska. Viŵeto vyose ivi vikafuma mu chiŵaya chakhe pera.

⁸Nduna zakhe nazo zikapereka mwa wanangwa ku ŵanthu, ŵasofi na ku ŵaLevi kuti viŵe vya pa chiphikiro chira. Musofi mukuru Hilikiya, musofi Zakariya na musofi Yehiyele awo ŵakaŵa ŵarongozgi ŵa Nyumba ya Chiuta ŵakapereka ku ŵasofi ŵana-mberere na twana twa mbuzi twakukwana 2,600 ndipo nkhambako zakukwana 300 kuti viŵe sembe ya Paska.

⁹Ndipo ŵarongozgi ŵa ŵaLevi awo ŵakaŵa Konaniya pamoza na ŵabali ŵakhe Shemaya, Netanele, Hashabiya, Yeyiyele, Yozabadi nawo ŵakapereka vyawanangwa vya pa chiphikiro chira vyakukwana 5,000 ŵana-mberere na twana twa mbuzi na nkhambako 500 kuti ziŵe sembe ya Paska.

¹⁰Para nyengo ya chiphikiro cha Paska yikakwana, ŵasofi ŵakakhara mu malo ghawo ndipo ŵaLevi nawo ŵakakhara mu vigaŵa vyawo nga ndi umo karonga wakalangulira.

¹¹Twana mberere twa chiphikiro cha Paska tukakomeka ndipo ŵasofi ŵakamijira ndopa izo ŵakapoka pa jochero, apo ŵaLevi ndiwo ŵakafuŵanga ŵana-mberere.

¹²Ŵakawuskako ivyo vikaŵa vya sembe yakocha kuti wavipereke kwakuyana na mbumba za ŵanthu umo zili kugaŵikira na kupereka kwa FUMU umo kuli kulangulikira mu Dango la Mozesi. Ŵakachita ntheura pera na nkhambako.

¹³ŴaLevi ŵakocha mwana-mberere kuŵa sembe ya Paska pa moto nga ndi umo kuli kulembekera. Ndipo nyama yinyakhe yakupatulika ŵakayiphika mu viŵiya, mu masefuliya na mu majonjo ndipo maluŵiro ŵakapereka ku ŵanthu ŵanyakhe wose kuti ŵarye.

¹⁴Pamanyuma ŵaLevi ŵakaphika nyama ya iwo ŵekha na ya ŵasofi chifukwa ŵasofi mba mbumba ya Aroni ndipo wakatangwanikanga na kupereka sembe zakocha na za mafuta mpaka na usiku. Ntheura ŵaLevi ŵakajiphikiranga ŵekha na kuphikiranga ŵasofi ŵa mbumba ya Aroni.

¹⁵Ŵanthu ŵakwimba sumu awo ŵakaŵa ŵana ŵa Asafu ŵakaŵa mu malo ghawo nga ndi umo kuli kulembekera mu dango la Davide, la Asafu, la Hemani na Yedutuni mweneuyo wakaŵa muwoni wa karonga. Ŵalinda ŵa pa vipata vya pa Nyumba ya Chiuta kuti ŵakafumapo mu malo ghawo gha nchito chara chifukwa ŵanyawo ŵaLevi ŵakaŵaphikiranga.

¹⁶Ntheura nga ndi umo Karonga Yosiya wakalangulira vyose vya chiphikiro cha Paska la FUMU na sembe zakocha pa jochero la FUMU vikanozgeka zuŵa lira.

¹⁷ŴaIsraele awo ŵakaŵapo ŵakachita chiphikiro cha Paska nyengo yeneyira ndiposo na chiphikiro cha chingwa chambula chirungo kwa mazuŵa ghankhonde na ghaŵiri.

¹⁸Pakaŵavye chiphikiro chakuŵa nga ndi ichi icho chikachitikapo mu Israele kufuma pa nyengo ya nchimi Samuele. Pakaŵavye nanga ndi karonga na yumoza wa charu cha Israele uyo wakachitapo chiphikiro cha Paska chakuŵa nga ndi icho wakachita Yosiya pamoza na ŵasofi na ŵaLevi ndiposo na wose awo ŵakaŵapo ŵa mu charu cha Yuda na Israele ŵeneawo ŵakakharanga mu Yerusalemu.

¹⁹Chiphikiro cha Paska ichi chikachitika mu chirimika cha 18 cha kuwusa kwa Yosiya.

²⁰Pamanyuma pa ichi, Yosiya wakati wanozga Nyumba ya Chiuta, Neko karonga wa charu cha Eguputo wakiza na nkhondo mu msumba wa Karikemishi pa mronga wa Yufurate ndipo Yosiya wakaruta kuti wakarwe nkhondo na iyo.

²¹Kweni Karonga Neko wakatuma nthumi kwa Yosiya na mazgu ghakuti, “Kasi ndili kwambana nawe, iwe karonga wa charu cha Yuda? Ine ndiza kuti ndirwe nawe nkhondo muhanya uno chara, kweni uliko ufumu unyakhe uwo ndambana nawo. Chiuta wandilangula kuti ndende luŵiro. Ntheura reka kwimikana na Chiuta mweneuyo wali pamoza na ine mwakuti wareke kukukoma.”

²²Kweni Yosiya wakakhumba ndipera kuti warwe nayo nkhondo. Ntheura wakajizgora chisko chakhe na kuwoneka nga ndi munthu munyakhe na kuŵapo pa nkhondo yira. Kuti wakapulikira mazgu gha Neko agho Chiuta wakayowoya chara ndipo wakaruta kuya karwa nkhondo mu chidika cha msumba wa Megido.

²³Apo nkhondo yikaŵa mukati ŵamauta ŵa ku Eguputo ŵakamulasa Karonga Yosiya ndipo iyo wakati ku ŵateŵeti ŵakhe, “Ndifumyanipo pa gareta, pakuti ndapwetekeka chomene.”

²⁴Ntheura ŵateŵeti ŵakhe ŵakamufumyapo pa gareta lira na kumuŵika pa gareta lakhe linyakhe na kuruta nayo ku Yerusalemu kwenekuko wakati wafika wakafwa ndipo wakamusunga ku madindi gha ŵawiskekuru. Ŵanthu wose ŵa mu charu cha Yuda na ŵa mu Yerusalemu ŵakamutengerera Yosiya.

²⁵Nchimi Yeremiya wakalemba sumu yakulirira Yosiya ndipo kufuma nyengo iyo mpaka sono wose ŵimbi ŵa zisumu ŵanarume na ŵanakazi ŵakuzunura Yosiya mu mukulira kwawo. Ichi chili kuzgoka kaluso mu charu cha Israele ndipo chili kulembeka mu Buku la maliriro.

²⁶Milimo yinyakhe yakuwusa kwa Yosiya na kugomezgeka kwakhe kwa FUMU, vili nga ndi umo vili kulembekera mu marango gha FUMU,

²⁷ndipo milimo yakhe yose kufuma pakwamba mpaka ku umaliro ya Yosiya yili kulembeka mu Buku la ŵakaronga wa charu cha Israele na cha Yuda.