Read new_tumbuka_bible 2 Midauko 36 Bible Online

2 Midauko 36 - new_tumbuka_bible bible

2 Midauko 36

¹Penepapo ŵaYuda ŵakatora Yehowahazi mwana wa Yosiya kuti wambe kuwusa mu Yerusalemu mu malo mwa ŵawiske.

²Yowahazi wakaŵa na virimika 23 para wakambanga kuwusa ndipo wakaŵa karonga mu Yerusalemu pa myezi yitatu pera.

³Neko, karonga wa charu cha Eguputo, wakamuwuskapo Yehowahazi kuti wareke kuwusa mu Yerusalemu ndipo wakaŵika msonkho pa charu cha Yuda kuti walipirenge makilogiramu gha kukwana 3,400 gha siliva na makilogiramu 34 gha golide.

⁴Ndipo Neko, karonga wa charu cha Eguputo wakamwimika Eliyakimu munung'una wakhe kuŵa karonga wa charu cha Yuda na mu Yerusalemu, ndipo wakasintha zina la Eliyakimu kuti waŵe Yehoyiyakimu. Ntheura wakamutora Yowahazi na kuruta nayo ku Eguputo.

⁵Yehoyiyakimu wakaŵa na virimika 25 para wakambanga kuwusa charu cha Yuda ndipo wakaŵa karonga mu Yerusalemu pa virimika 11. Yehoyiyakimu wakachita viheni panthazi pa FUMU, Chiuta wakhe.

⁶Nebukadinezara karonga wa charu cha Babuloni wakiza na nkhondo mu charu cha Yuda ndipo wakati wamuthereska Yehoyiyakimu wakamukaka na unyoro wa mkuŵa na kuruta nayo ku charu cha Babuloni.

⁷Nebukadinezara wakatoraso viteŵetero mu Nyumba ya FUMU na kuruta navyo ku charu cha Babuloni ndipo wakaviŵika mu nyumba yakhe ya ufumu.

⁸Milimo yinyakhe ya kuwusa kwa Yehoyiyakimu, maukazuzi agho wakachita na viheni vyose ivyo wakasuskika navyo, vili kulembeka mu Buku la ŵakaronga wa charu cha Israele na cha Yuda. Ndipo mwana wakhe Yehoyiyakini ndiyo wakamba kuwusa mu malo ghakhe.

⁹Yehoyiyakini wakaŵa na virimika 18[5] para wakambanga kuwusa ndipo wakaŵa karonga mu Yerusalemu pa myezi yitatu na mazuŵa khumi. Yehoyiyakini wakachita ivyo vikaŵa viheni panthazi pa FUMU.

¹⁰Mu nyengo ya chifuku, Karonga Nebukadinezara wakatuma ŵasilikari kuti wakamutore Yehoyiyakini na kwiza nayo ku charu cha Babuloni, pamoza na viteŵetero vyakuzirwa vya mu Nyumba ya FUMU. Ndipo wakamwimika Zedekiya mwana munyakhe na wiske ŵa Yehoyiyakini kuti ndiyo wawuse charu cha Yuda na mu Yerusalemu.

¹¹Zedekiya wakaŵa na virimika 21 para wakambanga kuwusa charu cha Yuda ndipo wakaŵa karonga mu Yerusalemu pa virimika 11.

¹²Zedekiya wakachita ivyo vikaŵa viheni panthazi pa FUMU, Chiuta wakhe ndipo kuti wakajiyuyura chara kurongora kurapa para nchimi Yeremiya wamuchenya na mazgu gha Chiuta.

¹³Zedekiya wakamugarukira Nebukadinezara karonga wa charu cha Babuloni uyo wakaphalira kuti warape mu zina la Chiuta kuti wati wapulikirenge Chiuta. Iyo wakakana na kunonofya mtima wakhe kuti wawerere kwa FUMU, Chiuta wa Israele.

¹⁴Kusazgirapo pa kwananga kwa Zedekiya, ŵasofi ŵarara wose na ŵarongozgi ŵa ŵanthu nawo ŵakanangiranangira panthazi pa FUMU pakuchita vya ukazuzi vyose vya ŵamitundu. Ŵakakazuzgaso nanga ndi Nyumba ya Chiuta iyo FUMU yikayipatula mu Yerusalemu.

¹⁵FUMU, Chiuta wa ŵawiskewokuru wakarutilira kuŵatumira nchimi kuti ziŵasuske chifukwa FUMU yikaŵa na chiwuravi pa ŵanthu ŵakhe ndiposo na Nyumba yakhe iyo yikaŵa chikhazi chakhe.

¹⁶Kweni ŵanthu ŵakazihoya nchimi za Chiuta na kuyuyura mazgu ghakhe. Ŵakaziseka mwakuti ukari wa FUMU ukakhilira pa ŵanthu ŵakhe mpaka pakaŵavye nthowa yinyakhe yakuŵathaskira.

¹⁷Ntheura FUMU yikatuma karonga wa charu cha Babuloni kuti wize na nkhondo mweneuyo wakakoma ŵanyamata na ŵasungwana ŵawo na lupanga mu Nyumba ya Chiuta ndipo pakaŵavye uyo wakaponapo manyi munyamata panji msungwana ŵararaŵarara panji ŵachekuru. Chiuta wakapereka wose mu mawoko gha Nebukadinezara.

¹⁸Ndipo viteŵetero vyose vya mu Nyumba ya FUMU vikuru na vichoko, vyuma vya mu Nyumba ya FUMU, vyuma vya mu nyumba ya ufumu na vya nduna zakhe wakatora na kwiza navyo ku charu cha Babuloni.

¹⁹Nebukadinezara wakocha na moto Nyumba ya Chiuta na kubwangandulira pasi linga la Yerusalemu. Wakochaso nyumba za ufumu zose na kunanga viteŵetero vyose vya mtengo wapatali.

²⁰Ŵanthu awo ŵakaponapo pa nkhondo wakaruta nawo ku charu cha Babuloni ndipo wakaŵa ŵamikori ŵakhe ndiposo na ku ŵana ŵakhe mpaka ufumu wa charu cha Peresiya ukamba kuwusa.

²¹Ntheura ghakafiskika mazgu gheneagho FUMU yikayowoyera mwa Yeremiya kuti, “Charu chamkukhara mapopa pa virimika 70 kufiska maSabata ghakupumulira chisuke chikondwere na chipumulo chakhe.”

²²Mu chirimika chakudanga cha kuwusa kwa Kirusi, karonga wa charu cha Peresiya, FUMU yikafiska ivyo yikayowoya kwa nchimi Yeremiya. FUMU yikakhuŵirizga mtima wa Kirusi kuti watume mazgu mu charu chakhe chose na kulemba languro.

²³Mu karata yira, Kirusi wakalemba kuti, “Kirusi wa charu cha Peresiya wakuti, FUMU, Chiuta wa kuchanya wapereka maufumu ghose gha mu charu cha pasi kwa ine, ndipo wandimika ine kuti ndiyizenge Nyumba yakhe mu Yerusalemu mu charu cha Yuda. Ntheura sono imwe mose, imwe muli ŵanthu ŵa Chiuta, murutenge ku Yerusalemu. FUMU, Chiuta winu waŵe namwe.”