Read new_tumbuka_bible 2 Midauko 4 Bible Online

2 Midauko 4 - new_tumbuka_bible bible

2 Midauko 4

¹Karonga Solomoni wakapanga jochero la mkuŵa ilo mu utali likaŵa mamita ghankhonde na ghanayi. Mu usani likaŵa la mamita ghankhonde na ghanayi ndipo mu kukwera likaŵa mamita ghanayi na masentimita 50.

²Wakawumba chiŵiya chikuru cha mkuŵa cha maji ndipo kufuma pa kaŵende kunjira pasi chikaŵa mamita ghaŵiri na masentimita 20 ndipo kudumula pakati chikaŵa mamita ghanayi pachanya masentimita 50. Kuzingirira chiŵiya chose chikakwananga mamita 13 na masentimita 20.

³Mu mphepete mwa chiŵiya chira wakazongamo tuvithuzithuzi twa nkhambako twakuŵa kuzingirira mzere ura wa mamita 13 na masentimita 20. Tunkhambako tura tukaŵa mu mizere yiŵiri ndipo wakatuzongera pamoza na chiŵiya chira.

⁴Chiŵiya chira chikakhazikika pa nkhambako za mkuŵa 12. Nkhambako zitatu zikarazga ku mpoto, zitatu zikarazga ku mafumiro gha dazi, zitatu zikarazga ku mwera, ndipo zitatu zikarazga ku manjiliro gha dazi. Chiŵiya chikakhazikika pa nkhambako zira ndipo malundi gha kumanyuma ghakarazga mukati.

⁵Ukomi wa chiŵiya chira ukaŵa masentimita ghankhonde na ghatatu ndipo mu kaŵende chikaŵa waka ndendende nga ndi mlomo wa nkhombo ndipo chikaŵa nga ndi luŵa. Chiŵiya chira chikasunganga maji ghakukwana malita 60,000.

⁶Wakapangaso mabeseni khumi ghakugezeramo. Ghankhonde wakaghaŵika ku dera la ku mwera ndipo ghankhonde ghanyakhe ghakaghaŵika ku dera ku mpoto kwa Nyumba ya Chiuta. Mabeseni agha ndimo wakasukirangamo ivyo vikaŵanga sembe yakocha ndipo chiziŵa chira ndimo ŵasofi ŵakagezerangamo mawoko.

⁷Ndipo Solomoni wakapanga vya kuŵikapo nyali khumi vya golide nga ndi umo kukalembekera, ndipo wakaviŵika mu Nyumba ya Chiuta. Vinkhonde wakaviŵika ku dera la ku mwera, ndipo vinkhonde ku dera la ku mpoto.

⁸Wakapangaso matebulu khumi ndipo nagho wakaghaŵika mu Nyumba ya Chiuta. Ghankhonde wakaghaŵika ku dera la ku mwera ndipo ghankhonde ku dera la ku mpoto. Wakapangaso mabakule 100 gha golide.

⁹Wakazenga baraza la kukumaniranamo ŵasofi ndiposo na baraza linyakhe likuru lakukumaniranamo ŵanthu ŵanyakhe wose. Wakapangaso vijaro vya ku mabaraza vyeneivyo wakaviphaka na mkuŵa.

¹⁰Chiŵiya chikuru chira cha kugezeramo ŵasofi, wakachiŵika pa chingodya cha Nyumba ya Chiuta ku dera la ku mwera kwa mafumiro gha dazi.

¹¹Huramu wakawumbaso tuviŵiya, mafosholo na mabakule ghakumijira maji. Ntheura wakamarizga mlimo uwo wakachitiranga Karonga Solomoni mu Nyumba ya Chiuta.

¹²Huramu wakapanga vinthu ivi: mizati yiŵiri, mabakule, na mitu yiŵiri pachanya pa mizati yira. Wakapanga maunyoro ghaŵiri ghakuruka nga ndi ukonde ghakutoweska mabakule ghara pachanya pa mizati yira.

¹³Wakapangaso vithuzithuzi vya magalagadeya 400 vyakuŵika pa vyakuruka nga ndi ukonde viŵiri vira. Pa chakuruka chilichose pakaŵa mizere yiŵiri ya magalagadeya, kutoweska mabakule ghaŵiri gha mitu iyo yikaŵa pachanya pa mizati.

¹⁴Wakapangaso vyakwimapo ndiposo na mabeseni pachanya pa vyakwimapo vira.

¹⁵Wakawumba chiŵiya chikuru cha maji pamoza na nkhambako 12 zakukhozga chiŵiya chira.

¹⁶Wakawumbaso miphika, mafosholo, maforoko gha nyama ndiposo na viteŵetero vinyakhe vya mlimo weneuwu. Huramu wakapanga vyose ivi kupangira Karonga Solomoni kuŵa vya mu Nyumba ya FUMU ndipo vikaŵa vya mkuŵa wakutuwulika.

¹⁷Karonga wakapanga vyose ivi mu chikombole cha dongo mu mronga wa Yorodani pakati pa msumba wa Sukoti na wa Zereda.

¹⁸Vinthu vyose ivyo Karonga Solomoni wakapanga vikaŵa vinandi chomene mwakuti uzitu wa mkuŵa ukaŵa wambula mapimiko.

¹⁹Karonga Solomoni wakapanga vyose ivyo vikaŵa mu Nyumba ya Chiuta nga ndi ivi: jochero la golide, matebulu ghakuŵikapo vingwa vya Uŵapo wa Chiuta,

²⁰vyakuŵikapo nyali pamoza na nyali za golide mwenecho mwakuti zigolerenge mukati panthazi pa malo ghakupatulika nkhanira nga ndi umo kukalembekera,

²¹vithuzithuzi vya maluŵa, nyali na zimbano, vya golide mwenecho,

²²vyakuzimyira nyali, tuviŵiya, ŵadira ŵakusunkhiskiramo vyakununkhira ndiposo na majonjo. Vijaro vya pa miryango na vya mukati vyakuyira ku Malo Ghakupatulika Nkhanira, na vijaro vya mu Nyumba ya Chiuta. Vyose ivi vikaŵa vya golide mwenecho.