Read new_tumbuka_bible 2 Midauko 5 Bible Online

2 Midauko 5 - new_tumbuka_bible bible

2 Midauko 5

¹Para Karonga Solomoni wakamarizga mlimo wose wa Nyumba ya FUMU, wakaŵikamo vinthu vyose ivyo wiske Davide wakavipatula nga ndi siliva, golide na viteŵetero vyose. Vyose ivi wakasunga mu vipinda vyakusungiramo vyuma vya Nyumba ya Chiuta.

²Penepapo Solomoni wakachema ŵararaŵarara wose ŵa ŵaIsraele, ŵarongozgi wose ŵa mafuko na ŵakuruŵakuru ŵa mbumba za Israele kuti ŵawungane mu msumba wa Yerusalemu. Iyo wakaŵaphalira kuti ŵarute kuya katora Bokosi la Phangano la FUMU kufuma mu Ziyoni msumba wa Davide.

³Ntheura ŵaIsraele wose ŵakawungana panthazi pa karonga pa nyengo ya chiphikiro mu mwezi chinkhonde na chiŵiri.

⁴Ŵarara wose ŵaIsraele ŵakati ŵakawungana pamoza, ŵaLevi ndiwo wakaruta kuya kayegha Bokosi la Phangano lira.

⁵Ŵasofi na ŵaLevi ŵara ŵakiza nalo Bokosi la Phangano lira pamoza na Chihema Chakukumaniranamo ndiposo na viteŵetero vyose vyakupatulika ivyo vikaŵa mu Chihema. Ntheura ŵakiza na Bokosi la Phangano lira.

⁶Karonga Solomoni na mpingo wose wa ŵaIsraele awo ŵakawungana penepara, ŵakaŵa panthazi pa Bokosi la Phangano. Iwo ŵakaperekanga sembe za mberere, za mbuzi na za ng'ombe zinandi chomene zambula mapendeko.

⁷Ntheura ŵasofi ŵakiza na Bokosi la Phangano la FUMU pa malo ghakhe na kulinjizga mukati mu Malo Ghakupatulika Nkhanira gha Nyumba ya Chiuta na kuliŵika kusi kwa mapapindo gha ŵakerubi.

⁸Ŵakerubi ŵakatandaula mapapindo ghawo pachanya pa Bokosi la Phangano. Ntheura ŵakabenekerera Bokosi lira pamoza na michiko yakhe.

⁹Michiko yira kufuma ku Bokosi la FUMU, yikaŵa yitali chomene mwakuti ku songo kwakhe yikawonekanga para ŵanthu ŵali mu malo ghakupatulika panthazi pa malo gha Malo Ghakupatulika Nkhanira. Kweni kuti yikawonekanga chara para ŵakaŵa kuwaro. Michiko iyi yichali mwenemumo na sono wuwo.

¹⁰Mukati mwa Bokosi la Phangano, mukaŵavye kanthu kanyakhe, kweni mukaŵa mawe ghapapati ghaŵiri gha marango. Mawe agha Mozesi wakatora pa Phiri la Sinayi para FUMU yikachitira phangano na ŵaIsraele ŵakati ŵafuma mu charu cha Eguputo.

¹¹Penepapo ŵasofi ŵakafumako ku Malo Ghakupatulika. Ŵasofi wose awo ŵakaŵa mwenemura, ŵakajipatula kwambula kughanaghanako vigaŵa vya uteŵeti wawo.

¹²ŴaLevi wose awo ŵakimbanga sumu, Asafu, Hemani na Yedutuni, ŵana ŵawo na ŵabali ŵawo ŵakimilira ku dera la ku mafumiro gha dazi kwa jochero uku ŵavwara vya bafuta muweme. Iwo ŵakimbanga na ŵabango, viding'indi na fyoliro. Ndipo ŵasofi 120 ŵakimbanga zimbata.

¹³Mlimo wa ŵakulizga zimbata na ŵakwimba sumu ukaŵa wakuti ŵapulikikwenge mu kimbiro kawo nga ndi munthu yumoza pakuchindika na kuwonga FUMU. Ndipo para ŵakakwezga mazgu gha sumu yawo uku ŵakulizga zimbata, ŵabango na vyakulizgira vinyakhe pakuyichindika FUMU, wakatenge: “FUMU njiweme pakuti chisungusungu chakhe chikukhalirira muyirayira.” Penepapo Nyumba ya Chiuta yikazura na uchindami wa FUMU uwo ukawoneka nga ndi bingu.

¹⁴Ntheura ŵasofi ŵakatondeka na kuteŵeta wuwo chifukwa cha bingu lira pakuti uchindami wa FUMU ukazura mu Nyumba ya Chiuta.