Read new_tumbuka_bible 2 Midauko 6 Bible Online

2 Midauko 6 - new_tumbuka_bible bible

2 Midauko 6

¹Penepapo Solomoni wakaromba wakati, “Imwe FUMU, mwayowoya kuti mukharenge mu mdima ukuru wa bii.

²Ine ndamuzengerani nyumba ya kuzirwa, malo agho muti mukharengemo kwa muyirayira.”

³Apo wumba wose wa ŵaIsraele ukaŵa uchali kwimilira penepara, Karonga Solomoni wakazgokera kwa iwo na kuŵatumbika.

⁴Ndipo iyo wakati, “Yirumbike FUMU, Chiuta wa ŵaIsraele mweneuyo na nkhongono zakhe wafiska icho wakapangana ku ŵadada Davide kuti,

⁵‘Kufuma pa zuŵa ilo nkhafumiskira ŵanthu ŵane mu charu cha Eguputo, nkhasorapo msumba mu fuko lirilose la Israele chara kuti ndimo ŵandizengere nyumba yakuchindikira zina lane ndiposo nkhasorapo munthu waliyose chara kuti waŵe karonga wa ŵanthu ŵane ŵaIsraele.

⁶Kweni nkhasora msumba wa Yerusalemu kuti ndimo zina lane lichindikikirengemo ndipo nkhasora Davide kuti ndiyo waŵe wakuwusa ŵanthu ŵane, ŵaIsraele.’

⁷“Ŵadada Davide ŵakachighanaghananga mu mtima wawo kuti ŵazenge nyumba yakuchindikira zina la FUMU, Chiuta wa Israele.

⁸FUMU yikati kwa Davide, ŵadada, ‘Pakuti ichi ukachighanaghananga mu mtima wako kuti undizengere nyumba yakuchindikira zina lane, ukachita makora.

⁹Ndipouli kuti ndiwe uti undizengere nyumba chara, kweni mwana wako mwanarume uyo uti ubabenge iwe wamwene. Iyo ndiyo wizamkuzenga nyumba yakuchindikira zina lane.’

¹⁰“Sono FUMU yafiska phangano lakhe ilo yikachita. Ine ndahalira ufumu wa Davide, ŵadada, ndipo sono nkhukhara pa chizumbe cha ufumu wa ŵaIsraele nga ndi umo FUMU yikayowoyera. Ine ndazenga nyumba yakuchindikira zina la FUMU, Chiuta wa Israele.

¹¹Ndipo mu nyumba yeneiyi ndaŵikamo Bokosi la Phangano, umo muli marango gha phangano la FUMU mu leneilo yikapangana na ŵaIsraele.”

¹²Penepapo Solomoni wakimilira panthazi pa jochero la FUMU pa maso pa mpingo wose wa Israele ndipo wakawuska mawoko ghakhe.

¹³Solomoni wakapanga cha kwimilirapo cha mkuŵa. Utali wakhe chikaŵa mamita ghaŵiri ndipo mu ufupi chikaŵaso mamita ghaŵiri na masentimita 20 ndipo mu kukwera chikaŵa mita yimoza na masentimita 30. Chakwimapo chira wakachiŵika pakatikati pa baraza la kuwaro. Wakimapo ndipo penepapo wakajikama panthazi pa mpingo wose wa Israele na kuwuska mawoko ghakhe muchanya,

¹⁴na kuromba kuti, “Imwe, Mwe FUMU, Chiuta wa Israele, kulije Chiuta munyakhe kuchanya na pa charu cha pasi wakuyana na imwe. Imwe mukusunga phangano linu na kurongora chisungusungu chinu pa ŵateŵeti ŵinu awo ŵakwenda panthazi pinu na mtima wawo wose.

¹⁵Imwe mwafiska icho mukapangana kwa Davide ŵadada muteŵeti winu. Inya imwe ndimwe mukayowoya ndipo na nkhongono yinu mwafiska nga ndi umo kuliri muhanya uno.

¹⁶Ntheura Mwe FUMU, Chiuta wa Israele fiskani sono kwa muteŵeti winu Davide ŵadada icho mukapangana nayo para mukati, ‘Kuti wamkusoŵa munthu wakukhara pa chizumbe cha ufumu wa Israele panthazi pa ine chara, usange ŵana ŵako ŵakujisungilira pa vyose ivyo ŵakuchita pakwenda panthazi pa ine kwakuyana na marango ghane nga ndi umo iwe ukachitira.

¹⁷Ntheura sono, imwe, Mwe FUMU, Chiuta wa Israele, zomerezgani kuti mazgu ghinu agho mukayowoya kwa muteŵeti winu Davide ghafiskike.’

¹⁸“Kweni kasi nadi Chiuta wangakhara na ŵanthu pa charu cha pasi? Wonani nanga kungaŵa kuchanya nesi kuchanya nkhanira kuti nako kungamukwanani chara. Kasi Nyumba ya Chiuta iyo ndazenga yingamukwanani uli?

¹⁹Ndipouli mupulike lurombo lwa nda muteŵeti winu, ndiposo na kuŵeyerera kwane, Mwe FUMU, Chiuta wane. Mupulike kulira na kuromba uko nda muteŵeti winu nkhuromba panthazi pinu.

²⁰Nkhuromba kuti muhanya na usiku, maso ghinu ghaŵenge ghakujurika kulaŵiska pa nyumba iyi yeneiyo ndi malo agho mukayowoya kuti muti muchitiske kuti zina linu lichindikirengemo. Mupulike lurombo lwa nda muteŵeti winu para nkhuromba kurazga ku nyumba iyi.

²¹Pulikani kuŵeyerera kwa nda muteŵeti winu na kwa ŵanthu ŵinu ŵaIsraele para ŵakuromba kurazga ku malo agha. Mupulike kuchanya uko ku malo uku mukukhara, ndipo para mwapulika, gowokani.

²²“Usange munthu wanangira muzengezgani wakhe ndipo waphalirika kuti warape ndipo wakwiza na kurapa panthazi pa jochero linu mu nyumba iyi,

²³mupulike uko kuchanya ndipo muchite na kweruzga pakati pa ŵateŵeti ŵinu. Uyo wasangika kuti wananga mweruzge kuti ngwakwananga ndipo walangike chifukwa cha kwananga kwakhe. Kweni uyo wandanange, mumweruzge kuti ngwambula mrandu ndipo mumupe njombe yakuyana na urunji wakhe.

²⁴“Para ŵanthu ŵinu ŵaIsraele ŵathereskeka na ŵarwani ŵawo chifukwa chakuti ŵamunangirani imwe, ndipo para ŵakuwerera kwa imwe na kuzomera kwananga kwawo na kuchindika zina linu ndipo ŵakuromba na kuŵeyerera panthazi pinu mu nyumba iyi,

²⁵imwe muŵapulike kuchanya uko. Ndipo mugowokere zakwananga za ŵanthu ŵinu ŵaIsraele. Pamanyuma muŵawezgereso ku charu icho mukaŵapa iwo na ŵawiskewokuru.

²⁶“Para vura yakarara pa chifukwa chakuti ŵanthu ŵinu ŵamunangirani, ndipo usange ŵakwiza na kuromba kurazga ku nyumba iyi na kuzomera zakwananga zawo kwa imwe na kuchindika zina linu ndipo ŵakuwerera pakureka zakwananga zawo para mwaŵalanga chifukwa cha kwananga kwawo,

²⁷imwe muŵapulike uko kuchanya ndipo mugowokere zakwananga za ŵateŵeti ŵinu ŵaIsraele. Muŵasambizge nthowa yiweme yeneiyo ŵakwenera kwendamo ndipo muŵape vura pa charu chinu icho muli kuŵapa ŵanthu ŵinu nga nchiharo chawo.

²⁸“Para kwaŵa njara mu charu, panji kwanjira chilengo cha nthenda yiliyose mu charu panji chinata, na kapuchi mu mbewu, zombe panji vibungu mu mbewu ndipo usange ŵarwani ŵawo ŵaŵajarizga mu misumba yawo yiliyose, nanga kunganjira nthenda yakofya yiliyose panji urwani wa mtundu uli,

²⁹ndipo para yumoza wa ŵanthu ŵinu ŵaIsraele ŵangaromba panji kuŵeyerera kose uko ndipo yose uyo wamkumanya suzgo la mu mtima wakhe ndipo pakuromba wakunyoroskera mawoko ghakhe ku nyumba iyi,

³⁰imwe mupulike kuchanya uko mukukhara ndipo mugowoke. Mumuchitire waliyose kwakuyana na vyose ivyo wakuchita chifukwa imwe mukumanya mtima wakhe ndipo imwe mwekha mukumanya mitima ya ŵanthu wose.

³¹Ntheura ŵanthu ŵati ŵamopani imwe na kwenda mu nthowa zinu mazuŵa ghose gha umoyo wawo mu charu icho mukaŵapa ŵasekuru ŵithu.

³²“Nanga ndi mulendo mweneuyo kuti njumoza wa ŵaIsraele chara, kweni wiza kufuma ku charu cha kutali kwiza kachindika zina linu likuru na woko linu lankhongono na lakutambazuka, para iyo wakwiza na kuromba pakurazga ku nyumba iyi,

³³mumupulike kuchanya uko mukukhara. Mumuchitire mulendo uyo kwakuyana na vyose ivyo wakuromba kwa imwe. Ŵanthu wose ŵa mu charu cha pasi ŵati ŵamumanyani na kuchindika zina linu nga ndi umo ŵanthu ŵinu ŵaIsraele ŵakuchitira. Ntheura wati wamanye kuti nyumba iyi ndazengera kuchindikira zina linu.

³⁴“Usange ŵanthu ŵinu ŵafuma kuya karwa nkhondo na ŵarwani ŵawo kulikose uko mungaŵatuma ndipo para ŵakuromba kwa imwe uku ŵakurazga ku msumba uwu uwo imwe muli kuwusankha na ku nyumba iyi ndamuzengerani,

³⁵muŵapulike uko kuchanya lurombo na kuŵeyerera kwawo ndipo mukhozge icho ŵakuromba.

³⁶“Para ŵanthu ŵinu ŵamunangirani imwe pakuti palije na yumoza uyo wakureka kwananga ndipo imwe mwakwiya chifukwa cha kwananga kwawo, mwaŵapereka ku ŵarwani ŵawo ŵeneawo waŵayorera ku umikori ku charu cha kutali panji cha pafupi,

³⁷sono uku ŵachali mu charu icho ŵayorekerako umikori ndipo ŵajinyumwa mu mitima yawo na kurapa ndipo ŵakuŵeya kwa imwe mu charu chenechira pakuyowoya kuti, ‘Tananga, tachita chinthu chiheni na chakubendera,’

³⁸ndipo usange ŵakuwerera kwa imwe na mtima wawo wose na umoyo wawo wose mu charu cha umikori wawo uko ŵatorekera, ndipo kwenekura ŵakuromba kurazga ku charu ichi icho mukapereka ku ŵasekuru ŵawo na ku msumba uwo imwe muli kuwusankha ndiposo na ku nyumba iyi iyo ndayizenga kuchindikira zina linu,

³⁹ntheura mupulike lurombo na kuŵeyerera kwawo kuchanya mukukhara uko, ndipo mukhozge icho ŵakuromba. Muŵagowokere ŵanthu ŵinu awo ŵamunangirani.

⁴⁰“Ntheura sono imwe Chiuta wane, nkhumuŵeyani mulaŵiskenge na kutegherezga ku malurombo agho ghakuperekeka kwa imwe mu nyumba iyi.

⁴¹Ntheura sono wukani Mwe FUMU Chiuta, ndipo mwize ku malo ghinu ghakupumuliramo, imwe na Bokosi la Phangano ilo ndi nkhongono zinu. Ŵasofi ŵinu, Mwe FUMU Chiuta, ŵatumbikani na chiponosko ndipo ŵanthu ŵinu wose ŵakupatulika ŵasekerere mu uweme winu!

⁴²Mwe FUMU Chiuta, mungamukananga chara wakuphakazgika winu. Kumbukani chisungusungu chinu icho mukapangana kwa muteŵeti winu Davide.”