Read new_tumbuka_bible 2 Midauko 7 Bible Online

2 Midauko 7 - new_tumbuka_bible bible

2 Midauko 7

¹Para Solomoni wakati wamara kuromba, moto ukiza kufuma kuchanya ukamyangura sembe yakocha mburuma pamoza na sembe zakukoma ndipo uchindami wa FUMU ukazura mu Nyumba ya Chiuta.

²Ŵasofi ŵakatondeka na kunjiramo mu Nyumba ya Chiuta chifukwa cha uchindami wa FUMU uwo ukazura mwenemumo.

³Para ŵaIsraele wose ŵakawona moto ukwiza kufuma kuchanya ndiposo na uchindami wa FUMU pachanya pa Nyumba ya Chiuta, ŵakasindamira pasi visko pa mawe ghakwalikika ndipo wakayilambira FUMU na kupereka viwongo kwa iyo pakuyowoya kuti, “FUMU njiweme pakuti chisungusungu chakhe chikukhalirira kwa muyirayira.”

⁴Penepapo Karonga Solomoni na ŵanthu wose ŵakapereka sembe panthazi pa FUMU.

⁵Karonga Solomoni wakapereka sembe za ng'ombe zakukwana 22,000 ndipo na za mberere na mbuzi zakukwana 120,000. Ntheura karonga na ŵanthu wose ŵakayipatula Nyumba ya Chiuta.

⁶Ŵasofi ŵakimilira mu malo ghawo. ŴaLevi nawo ŵakatora vyakwimbira sumu ivyo Karonga Davide wakapanga kuŵa vyakwimbira FUMU na kuyiwongera pakuyowoya kuti, “Chisungusungu chakhe chikukhalirira kwa muyirayira.” Kuthyana na ŵaLevi pakaŵa ŵasofi awo ŵakalizganga zimbata. ŴaIsraele wose ŵakimilira waka.

⁷Solomoni wakapatula chipinda cha pakatikati icho chikaŵa panthazi pa Nyumba ya FUMU. Mu chipinda cheneicho ndimo wakaperekeranga sembe yakocha na mafuta gha sembe za wenenawene, chifukwa pa jochero la mkuŵa ilo Solomoni wakapanga, pakaŵavye malo ghakuŵikapo sembe yakocha, ya ufu ndiposo na ya mafuta.

⁸Ntheura Solomoni wakachita chiphikiro pa nyengo yeneyira pa mazuŵa ghankhonde na ghaŵiri pamoza na ŵaIsraele wose. Ŵanthu ŵanandi ŵakiza mwakuti ŵakamba pa chipata cha msumba wa Hamati na kuya kafika ku kamronga ka ku charu cha Eguputo.

⁹Ndipo pa zuŵa la chinkhonde na chitatu ŵakaŵa na ungano wakupatulika chomene, pakuti wakalipatula jochero mazuŵa ghankhonde na ghaŵiri ndiposo na kuŵa na chiphikiro pa mazuŵa ghankhonde na ghaŵiri.

¹⁰Pa zuŵa la 23 la mwezi wa chinkhonde na chiŵiri, Solomoni wakaŵawezga ŵanthu kuti ŵarute ku vikaya vyawo. Iwo ŵakawera na chimwemwe ndiposo na kukondwa kukuru mu mitima yawo chifukwa cha vinthu viweme ivyo FUMU yikachitira Davide na Solomoni ndiposo na ŵanthu ŵakhe ŵaIsraele.

¹¹Ntheura Solomoni wakati wakamarizga kuzenga Nyumba ya FUMU na nyumba yakhe ya ufumu. Wakamarizga makora ghene vyose ivyo wakanozgera kuchita mu Nyumba ya FUMU, na mu nyumba yakhe.

¹²FUMU yikamuwonekera Solomoni na usiku ndipo yikati kwa iyo, “Ndapulika lurombo lwako ndipo ndajisankhira malo ghano kuŵa nyumba yane yakuperekera sembe kwa ine.

¹³Para ndamkujara mtambo kuchanya kuti vura yireke kurokwa pa charu, panji para ndalangula zombe kurya vya mu charu, panji para ndamkutuma chilengo cha nthenda yakofya kuti yimare ŵanthu,

¹⁴usange ŵanthu ŵane awo ŵakuchemeka na zina lane ŵangajiyuyura na kuromba, ŵandilambire ine ndipo ŵawereko ku nthowa zawo ziheni, ine nditi ndiŵapulike kuno kuchanya ndipo nditi ndiŵagowokere zakwananga zawo na kuchizga charu chawo.

¹⁵Ndipo maso ghane ghaŵenge gha kujurika kulaŵiska pa iwo ndipo makutu ghane nagho ghati ghaŵenge gha kutegherezga ku lurombo lose ulo luti luchitikenge mu nyumba iyi.

¹⁶Pakuti sono ndayisankha na kuyipatula Nyumba iyi mwakuti zina lane lichindikirengemo kwa muyirayira. Maso ghane na mtima wane viti viŵenge pa nyumba yeneiyi kwa muyirayira.

¹⁷Ndipo iwe Solomoni, usange uti wendenge panthazi pa ine nga ndi umo wakachitira Davide ŵawuso na kuchita vyose ivyo nkhukulangula, kusungilira marango ghane na vilayizgo vyane,

¹⁸apo ndipo nditi ndikhozge chizumbe cha ufumu wako nga ndi umo nkhapanganirana na Davide ŵawuso apo nkhati kwa iyo, ‘Kuti wamkusoŵa munthu wakuwusa charu cha Israele chara.’

¹⁹Kweni usange ukuzgokera kunyakhe pakureka kupulikira marango ghane na vilayizgo vyane agho ndili kwimika ndipo ukughareka kuti uteŵetere ŵachiuta ŵanyakhe na kuŵasopa.

²⁰Penepapo ine nditi ndiŵawuskemo ŵaIsraele mu charu icho nkhaŵapa. Ndipo nyumba yeneiyo ndayipatula kuŵa yakuchindikira zina lane nditi ndiyikane. Ndizamkuyizgora nyumba iyi kuŵa chinthu chakuyowoyerapo chinthanguni na chimuhoyere ku mitundu yose.

²¹“Ndipo nyumba iyi nangauli njakuchindikika chomene, yizamubwanganduka. Ŵanthu wose awo ŵizamkujumphapo wizamkuzizwa na kuzukuma na kuyowoya kuti, ‘Kasi nchifukwa uli FUMU yachita chinthu cha ntheura pa charu ichi na pa nyumba iyi?’

²²Ntheura ŵanthu ŵizamkuzgora kuti, ‘Nchifukwa chakuti wayireka FUMU, Chiuta wa wiskewokuru mweneuyo wakaŵafumiska mu charu cha Eguputo ndipo sono ŵaskepererana na ŵachiuta ŵanyakhe, ŵakuŵasopa na kuŵateŵetera. Ichi ndicho chifukwa FUMU yakhizgira pa iwo uheni wose uwu.’ ”