Read new_tumbuka_bible 2 Midauko 8 Bible Online

2 Midauko 8 - new_tumbuka_bible bible

2 Midauko 8

¹Solomoni wakatora virimika 20 kuti wazenge Nyumba ya FUMU na nyumba yakhe ya ufumu.

²Solomoni wakazengaso misumba iyo Karonga Huramu wakamupa ndipo mwenemumo wakazengeskamo ŵaIsraele.

³Solomoni wakaruta ku msumba wa Hamati Zoba na kuwupoka.

⁴Wakazengaso msumba wa Tadimoro uwo ukaŵa mu mapopa na misumba yose yakusungiramo vyakurya iyo wakayizenga mu charu cha Hamati.

⁵Ndiposo wakazenga msumba yiŵiri ya Beti Horoni, unyakhe ukaŵa cha kunena ndipo unyakhe ukaŵa cha kusika. Misumba iyi wakayizenga kuti yiŵe na malinga gha viliŵa na vipata ndiposo na mphingirizgo.

⁶Wakazengaso msumba wa Baalati na misumba yose yakusungirangamo vyakurya, ndiposo na misumba umo wakasungirangamo magareta gha nkhondo na mahachi ghakhe. Solomoni wakazenga chilichose icho wakakhumba kuzenga mu Yerusalemu na mu charu cha Lebanoni ndiposo na mu charu chose icho wakawusanga.

⁷Pakaŵa ŵamitundu awo ŵakakharanga mu charu cha Yuda ŵeneawo ŵaIsraele ŵakaŵafumya mu charu chira chara. Iwo ŵakaŵa ŵaHiti, ŵaAmori, ŵaPerezi, ŵaHivi, ndipo na ŵaYebusi.

⁸Ŵeneaŵa ŵakaŵa ŵa mphapu ya ŵamitundu, awo ŵakakharanga mu charu chira, ŵeneawo ŵaIsraele kuti wakaŵamara chara. Aŵa ndiwo Solomoni wakaŵagwiriskanga nchito mwakuŵachichizga, ndipo ŵakugwira nchito iyi nga mbazga mpaka na sono.

⁹Kweni Solomoni kuti wakaŵazgorapo ŵaIsraele kuŵa ŵazga ŵa nchito yakhe chara. Iwo ŵakaŵa ŵasilikari, ŵarongozgi ŵakhe ŵa nkhondo, ŵakurongozga magareta ghakhe ndiposo na ŵanthu ŵakhe ŵakugara pa mahachi.

¹⁰Ŵanthu aŵa ndiwo ŵakaŵa ŵarongozgi ŵararaŵarara ŵa Karonga Solomoni ŵakukwana 250, ŵeneawo ŵakaŵa na mazaza pa ŵanthu.

¹¹Solomoni wakiza nayo mwana mwanakazi wa Faro kufuma mu Yerusalemu, msumba wa Davide, kwiza ku nyumba iyo Solomoni wakamuzengera. Pakuti Solomoni wakati, “Muwoli wane kuti wangakhara mu nyumba iyi ya Karonga Davide wa charu cha Israele chara chifukwa malo uko Bokosi la Phangano lafikako, ngakupatulika.”

¹²Penepapo Solomoni wakapereka sembe yakocha kwa FUMU pa jochero la FUMU ilo wakazenga panthazi pa khonde la Nyumba ya Chiuta.

¹³Solomoni wakapereka sembe zakocha nga ndi umo kukakhumbikiranga zuŵa na zuŵa kwakuyana na umo dango la Mozesi likayowoyera. Wakapereka sembe za maSabata, sembe za kuthwasa kwa mwezi, sembe za viphikiro vitatu pa chirimika chilichose ivyo vikaŵa: chiphikiro chaChingwa chambula chirungo, chiphikiro cha maSabata na chiphikiro cha misasa.

¹⁴Kwakuyana na malangulo gha wiske Davide, Solomoni wakimika vigaŵa vya ŵasofi vya uteŵeti wawo ndipo ŵaLevi ŵakaŵikika pa mlimo wakwimba sumu za marumbo kwa FUMU na kuteŵetera panthazi pa ŵasofi kwakuyana na mlimo wa zuŵa na zuŵa. Wakimikaso ŵalinda ŵa pa vipata na kuŵagaŵa mu vigaŵa mu vipata vinandinandi pakuti ntheura ndimo wakalangulira Davide, munthu wa Chiuta.

¹⁵Malangulo ghose agho Karonga Davide wakapereka ku ŵasofi na ŵaLevi pa mlimo wawo wose uwu na pa vyuma vyose kuti ghakarekekapo chara.

¹⁶Ntheura ndimo mlimo wa Solomoni ukendera kwamba pa zuŵa ilo wakaŵikira lufura lwa Nyumba ya FUMU mpaka apo yikamarizgikira. Ntheura Nyumba ya FUMU yikamarizgika mu vyose.

¹⁷Penepapo Solomoni wakaruta ku msumba wa Eziyoni Gebere na wa Eloti mu mphepete mwa nyanja mu charu cha Edomu.

¹⁸Ndipo Karonga Huramu wakamutumizgira ngaraŵa pakulangulika na nduna zakhe izo zikamanya kwenda pa nyanja. Ndipo ŵanthu aŵa ŵakaruta pamoza na ŵateŵeti ŵa Solomoni ku charu cha Ofiri, ndipo ŵakaya katorako golide wa makilogiramu 18,000 ndipo wakiza nayo kwa Karonga Solomoni.