Read new_tumbuka_bible 2 Midauko 9 Bible Online

2 Midauko 9 - new_tumbuka_bible bible

2 Midauko 9

¹Para fumukazi ya charu cha Sheba yikapulika za lumbiri lwa Solomoni, yikiza ku Yerusalemu kuti yizakamuyezge pakumufumba mafumbo ghanonono. Yikiza na wumba ukuru wa ŵanthu na ngamila izo zikayegha vyakununkhira, golide munandi ndiposo na mawe ghakuzirwa. Para yikafika kwa Solomoni, yikamuphalira vyose ivyo vikaŵa mu mtima wakhe.

²Solomoni wakazgora mafumbo ghakhe ghose, ndipo pakaŵavye na chimoza icho chikamutonda kuti wandulire fumukazi.

³Para fumukazi ya ku Sheba yikawona vinjeru vya Solomoni na nyumba ya ufumu iyo wakazenga,

⁴vyakurya ivyo vikaŵa pa thebulu lakhe, kakhaliro ka nduna zakhe, kimiliro ka awo ŵakamuteŵeteranga na vyakuvwara vyawo, ŵateŵeti ŵakhe ŵakuperekera vyakumwa, ndiposo na sembe zakocha izo wakaperekanga ku Nyumba ya FUMU, yikathika lusoko.

⁵Fumukazi yira yikati kwa karonga, “Ivyo nkhapulikanga mu charu chane vya milimo yinu na vinjeru vyinu ndi vya unenesko.

⁶Ine nkhavigomezga chara mpaka ndiza ndekha kuti ndiwone na maso ghane. Nadi nanga ndi hafu wa ukuru wa vinjeru vyinu kuti ŵakandiphalirapo chara. Vinjeru vyinu vikuruska ivyo nkhapulikanga.

⁷Ŵakutumbikika mbanthu ŵinu! Ŵakutumbikika mbateŵeti ŵinu awo nyengo zose ŵakwimilira panthazi pinu na kupulika vinjeru vyinu.

⁸Yirumbike FUMU, Chiuta winu, mweneuyo wakucha namwe ndipo wamuŵikani pa chizumbe cha ufumu wakhe kuŵa karonga kuti muwuse mu malo mwa FUMU, Chiuta winu. Chifukwa chakuti Chiuta wakuŵatemwa ŵaIsraele na khumbo lakhe kuŵakhozga kwa muyirayira, wamwimikani imwe kuŵa karonga wawo kuti muŵawusenge na kuŵeruzga mu urunji.”

⁹Penepapo fumukazi yira yikapereka kwa Karonga Solomoni, makilogiramu 4,000 gha golide, vyakununkhira vinandi chomene ndiposo na mawe ghakuzirwa. Kukaŵavye vyakununkhira vinyakhe vyakuyana na ivyo fumukazi ya ku Sheba yikapereka kwa iyo.

¹⁰(Ndiposo ŵateŵeti ŵa Karonga Huramu na ŵa Karonga Solomoni ŵakiza na golide kufumira ku charu cha Ofiri. Ŵakizaso na makuni gha muŵanga na mawe ghakuzirwa.

¹¹Na makuni gha muŵanga ghara, karonga wakapanga mizati ya Nyumba ya FUMU na ya nyumba ya ufumu. Wakapangaso mabango na viding'indi vya ŵimbi ŵa zisumu. Makuni gha mtundu uwu kuti ghakawonekamo na kale mu charu cha Yuda chara.)

¹²Karonga Solomoni wakayipa fumukazi ya ku Sheba vyose ivyo yikakhumba na kuromba. Wakayipa vinandi kuruska ivyo yikiza navyo kwa karonga. Pamanyuma fumukazi yira yikawerera ku charu cha kwakhe pamoza na ŵateŵeti ŵakhe.

¹³Chirimika chilichose Karonga Solomoni wakapokeranga golide wa uzitu wakukwana makilogiramu 23,000.

¹⁴Golide munyakhe Solomoni wakapokeranga kufuma ku msonkho wa pa malonda gha katundu wa chilendo, msonkho kufuma ku awo ŵakaguliska ndiposo na ku ŵakaronga wose ŵa mu charu cha Arabiya. Nduna za mu charu cha Israele nazo zikizanga na msonkho golide na siliva kwa Solomoni.

¹⁵Karonga Solomoni wakafura nguru zikuru zakukwana 200 za golide. Mu nguru yiliyose mukanjiranga golide wakukwana makilogiramu ghankhonde na ghaŵiri.

¹⁶Karonga Solomoni wakafuraso nguru zichokozichoko zakukwana 300 za golide ndipo mu nguru yiliyose mukanjiranga golide wakukwana makilogiramu ghatatu. Ndipo Solomoni wakaziŵika nguru zira mu nyumba gha mu nkhorongo ya mu Lebanoni.

¹⁷Karonga wakapangaso chizumbe cha ufumu cha minyanga ya zovu ndipo wakachiphaka na golide mwenecho.

¹⁸Chizumbe chira chikaŵa na makwerero ghankhonde na limoza na chakuŵikapo malundi cha golide icho chikabamphikana na chizumbe chira. Chizumbe chikaŵaso na vya kweghamira uku na uku vyakuŵikapo mawoko ndiposo vithuzithuzi viŵiri vya nkharamu pa vya kweghamira mawoko vira.

¹⁹Pakaŵaso vithuzithuzi vya nkharamu 12 pa makwerero ghankhonde na limoza, chithuzithuzi cha nkharamu yimoza chikaŵa ku umaliro wa kwerero lirilose. Kukaŵavye na ufumu uliwose uwo ukaŵa na chizumbe cha ufumu cha ntheura.

²⁰Vyakumweramo vyose vya Karonga Solomoni vikaŵa vya golide pera ndiposo viteŵetero vyose vya mu nyumba ya ufumu ya mu nkhorongo ya ku Lebanoni vikaŵa vya golide mwenecho. Mu nyengo ya Solomoni siliva kuti wakapimikanga nga nkhanthu kakuzirwa chara.

²¹Pakuti karonga wakaŵa na ngaraŵa izo zikarutanga ku charu cha Tarishishi na ŵateŵeti ŵa Karonga Huramu kamoza mu virimika vitatu vilivyose. Ngaraŵa zira zikizanga na golide, siliva, minyanga ya zovu, ŵapusi na viyuni vya visukupiko vitali ivyo vikujitukumura.

²²Pa chifukwa ichi Karonga Solomoni wakaruska ŵakaronga wose ŵa mu charu cha pasi mu usambazi na mu mahara.

²³Ndipo ŵakaronga wose ŵa mu charu ŵakakhumbanga kwiza kwa Karonga Solomoni kwizakapulika mahara agho Chiuta wakamupa.

²⁴Chirimika na chirimika, waliyose uyo wakizanga kwa Solomoni wakamuyegheranga chawanangwa nga ndi viteŵetero vya siliva, golide, vyakuvwara vya nkhondo, vyakununkhira, mahachi na mbunda.

²⁵Solomoni wakaŵa na viŵaya 4,000 vyakusungiramo mahachi na magareta yakhe ndipo na ŵanthu 12,000 ŵakugara pa mahachi ghara. Ŵeneawo ŵakaŵika ŵanyakhe ku misumba ya ŵasilikari ndipo ŵanyakhe ŵakaŵa pamoza na karonga mu Yerusalemu.

²⁶Solomoni wakawusa ŵakaronga wose kufuma ku mronga wa Yufurate mpaka ku charu cha ŵaFilisiti ndiposo na ku mphaka ya charu cha Eguputo.

²⁷Mu nyengo ya kuwusa kwa Karonga Solomoni, siliva wakaŵa munandi chomene mu Yerusalemu nga ndi mawe, ndipo makuni gha milanje nagho ghakazara nga ndi makuni gha vikuyu mu vidika.

²⁸Mahachi gha Karonga Solomoni ghakaŵachemeskanga ku charu cha Eguputo na ku vyaru vinyakhe.

²⁹Milimo yinyakhe ya Solomoni kufuma pa kwamba mpaka ku umaliro yili kulembeka mu Mudauko wa nchimi Natani mu kuchima kwa nchimi Ahiya wa ku Shilo ndiposo na mu mboniwoni ya nchimi Ido iyo yikuphara vya Yerobowamu mwana wa Nebati.

³⁰Solomoni wakawusa ŵaIsraele wose mu Yerusalemu pa virimika 40.

³¹Penepapo Solomoni wakafwa ndipo wakasungika mu msumba wa Yerusalemu pamoza na wiske Davide. Ntheura mwana wakhe Rehobowamu ndiyo wakamba kuwusa mu malo mwakhe.