Read new_tumbuka_bible Ezira 1 Bible Online

Ezira 1 - new_tumbuka_bible bible

Ezira 1

¹Mu chirimika chakudanga cha kuwusa kwa Kirusi, karonga wa charu cha Peresiya, FUMU yikafiska ivyo yikayowoya kwa nchimi Yeremiya. FUMU yikakhuŵirizga mtima wa Kirusi kuti watume mazgu mu charu chakhe chose na kulemba languro lakuti:

²“Kirusi, karonga wa ku Peresiya wakuti, ‘FUMU, Chiuta wa kuchanya wandipa maufumu ghose gha mu charu, ndipo wandimika kuti ndiyizengere nyumba mu Yerusalemu, mu charu cha Yuda.

³Chiuta waŵe na imwe mose, imwe muli ŵanthu ŵakhe, mwaŵeneimwe mukuruta ku Yerusalemu mu charu cha Yuda kukazenga Nyumba ya FUMU, Chiuta wa Israele. Iyo ndi Chiuta uyo wali mu Yerusalemu.

⁴Wose awo ŵakharako, manyi ŵangaŵa nkhu, wovwire awo ŵakuwera, pakuŵapa ŵazengezgani ŵawo wovwiri wa ndarama za siliva panji za golide, katundu wa mu nyumba, na viŵeto pa dera pa vyawanangwa vya Nyumba ya Chiuta mu Yerusalemu.’ ”

⁵Ntheura ŵararaŵarara ŵa mbumba ŵawiskewo mu fuko la Yuda na Benjamini, ndiposo na ŵasofi na ŵaLevi, pamoza na wose awo mitima yawo yikakhuŵirizgika na Chiuta, ŵakanozgekera kuruta kuti ŵakazengeso Nyumba ya FUMU mu Yerusalemu.

⁶Ndipo ŵazengezgani ŵawo wose ŵakovwira na viteŵetero vya siliva, golide, katundu wa mu nyumba, viŵeto na vinyakhe vya mtengo wa patali pa dera pa vyose vyawanangwa vya mu Nyumba ya Chiuta.

⁷Karonga Kirusi wakaperekaso viteŵetero vya mu Nyumba ya FUMU ivyo Nebukadinezara wakatora ku Yerusalemu vyeneivyo wakaviŵika mu nyumba ya chiuta wakhe.

⁸Kirusi karonga wa ku Peresiya wakavipereka vinthu ivi kwizira mwa Mitiredati, msungi-chuma uyo wakavipendera panthazi pa Sheshibazara, nduna ya charu cha Yuda.

⁹Unandi wa vinthu vira ukaŵa mwa ntheura: mabeseni gha golide ghakaŵa 30, mabeseni gha siliva ghakaŵa 1,000, vimayi 29,

¹⁰ŵadira ŵa golide 30, ŵadira ŵa siliva 410, viteŵetero vinyakhe vya mitundumitundu 1,000.

¹¹Viteŵetero vyose pamoza vya golide na vya siliva vikaŵa 5,400. Sheshibazara wakiza navyo vyose para ŵamikori ŵakaweranga kufuma ku Babuloni kuruta ku Yerusalemu.