Read new_tumbuka_bible Ezira 3 Bible Online

Ezira 3 - new_tumbuka_bible bible

Ezira 3

¹Yikati yajumphapo myezi yinkhonde na yiŵiri ndipo ŵaIsraele nawo ŵakhazikika mu mizi yawo, ŵanthu wose ŵakawungana mu Yerusalemu.

²Ntheura Yeshuwa mwana wa Yozadaki na ŵasofi ŵanyakhe pamoza na Zerubabele mwana wa Shatiyele na ŵabali ŵakhe, ŵakamba kuzenga jochero la Chiuta wa Israele mwakuti waperekerepo sembe zakocha kwakuyana na umo kuli kulembekera mu Dango la Mozesi, munthu wa Chiuta.

³Ŵanthu ŵara ŵakopanga[1] ŵanthu awo ŵakakharanga mu charu chira, ndipouli ŵakazenga jochero pa lufura lwa kale ndipo ŵakapereka sembe zakocha kwa FUMU pa lenelira ku mulenje na ku mise wuwo.

⁴Ŵakachita chiphikiro cha misasa nga ndi umo kuli kulembekera mu marango ndipo ŵakapereka sembe zakocha kwakuyana na unandi wa sembe izo zikakhumbikwanga zuŵa na zuŵa.

⁵Pamanyuma pa ichi ŵakarutilira kupereka sembe zakocha, za kuthwasa kwa mwezi, ndiposo na sembe zose zakocha pa viphikiro vyakwimikika vya FUMU. Munthu yose wakapereka mu wanangwa sembe yose kwa FUMU.

⁶Ntheura iwo ŵakamba kupereka sembe zakocha kwa FUMU, kufuma pa zuŵa lakudanga la mwezi wa chinkhonde na chiŵiri nangauli lufura lwa Nyumba ya Chiuta lukaŵa luchari lundakhazikike.

⁷Ntheura ŵanthu ŵakapereka ndarama ku nkhwantha pakuzengera mawe na ku ŵakupara mathabwa. Ŵakaperekaso chakurya, vyakumwa na mafuta ku ŵanthu ŵa ku Sidoni na ku Ture kuti ŵaŵayegherenge makuni gha milanje kufumira ku nkhorongo ya Lebanoni kwiza nagho ku nyanja pa dowoko la Yopa, kwakuyana na chizomerezgo icho Kirusi, karonga wa charu cha Peresiya wakaŵapira.

⁸Mu mwezi wa chiŵiri wa chirimika cha chiŵiri, ŵakati ŵafika ku Nyumba ya FUMU mu Yerusalemu, Zerubabele mwana wa Shatiyele na Yeshuwa mwana Yozadaki, na ŵabali ŵawo ŵanyawo wose, ŵasofi, ŵaLevi, na wose awo ŵakawerako kufuma ku umikori kwiza ku Yerusalemu, wakamba mlimo wakuzenga Nyumba ya Chiuta. Ŵakimika ŵaLevi ŵakwamba ŵa virimika 20 na ŵakujumphirapo, kuti ŵalaŵilirenge mlimo wakuzenga.

⁹Ntheura Yeshuwa wakamba kulaŵirira mlimo wakuzenga Nyumba ya Chiuta, iyo pamoza na ŵana ŵakhe na ŵabali ŵakhe, Kadimiyele na ŵana ŵakhe, ŵana ŵa Yuda. Iwo ŵakovwirika na ŵana ŵa Henadadi, na ŵaLevi na ŵana ŵawo na ŵabali ŵawo.

¹⁰Para ŵazengi ŵakaŵika lufura lwa Nyumba ya Chiuta, ŵasofi ŵakiza na zimbata zawo uku ŵavwara malaya ghawo gha usofi. Ndipo ŵaLevi na ŵaAsafu uku ŵali na fyoliro, ŵakiza na kwamba kurumba FUMU nga ndi umo Davide, karonga wa Israele wakaŵarongozgera.

¹¹Iwo ŵakimbanga pakukoŵerana uko ŵakurumba na kuwonga FUMU pakuyowoya kuti, “FUMU njiweme, chisungusungu chakhe pa ŵaIsraele, chikukhalirira kwa muyirayira.” Ŵanthu wose ŵakachemerezga na mazgu ghakuru pakurumba FUMU chifukwa lufura lwa Nyumba ya Chiuta lukakhazikika.

¹²Ŵasofi ŵanandi, ŵaLevi na ŵararaŵarara ŵa zimbumba awo ŵakaŵa ŵachekuru, ŵeneawo ŵakawona Nyumba ya Chiuta ya pakudanga, ŵakalira chomene ŵakati ŵawona lufura lwa Nyumba ya Chiuta lukukhazikika, apo ŵanyakhe ŵanandi ŵakachemerezga na chimwemwe chikuru.

¹³Ŵanthu kuti ŵakamanya kupambaniska mazgu gha kulira na gha chimwemwe chara chifukwa chiwawa chikaŵa chikuru chomene ndipo kukapulikikwanga na kutali.