Read new_tumbuka_bible Ezira 4 Bible Online

Ezira 4 - new_tumbuka_bible bible

Ezira 4

¹Ŵarwani ŵa ŵaYuda na ŵaBenjamini ŵakapulika kuti awo ŵakawerako ku umikori, ŵayamba kuzenga Nyumba ya FUMU, Chiuta wa Israele.

²Ŵakiza kwa Zerubabele na ku ŵararaŵarara ŵa zimbumba ndipo ŵakati kwa iwo, “Mutizomerezge, timovwirani kuzenga pakuti ise nase tikusopa Chiuta winu na kupereka sembe kwa iyo kwamba pa nyengo ya Esarihadoni, karonga wa charu cha Asiriya uyo wakiza nase kuno.”

³Kweni Zerubabele, Yeshuwa na ŵararaŵarara ŵa zimbumba pa ŵawiskewokuru ŵakati kwa iwo, “Nchambula kuzomerezgeka kuti imwe mutovwire kuzenga Nyumba ya Chiuta withu. Ise tekha titi tiyizengere FUMU, Chiuta wa Israele nga ndi umo wakatilangulira Kirusi, karonga wa charu cha Peresiya.”

⁴Ntheura ŵenecharu ŵakamba kuŵagongoweska ŵaYuda na kuŵatenthemeska kuti ŵareke kuzenga Nyumba ya Chiuta.

⁵Ŵakapereka vimbundi kwa nduna za boma la Peresiya kuti ŵagongoweske mlimo wawo wakuzenga nyengo yose yakuwusa kwa Kirusi, karonga wa Peresiya mpaka pa nyengo ya kuwusa kwa Dariyusi, karonga wa charu cha Peresiya.

⁶Apo Ahasuweru, karonga wa charu cha Peresiya wakamba kuwusa, ŵenecharu ŵara ŵakalemba karata kwa karonga uyu kumudandaulira za ŵaIsraele awo ŵakakharanga mu chigaŵa cha Yudeya na mu Yerusalemu.

⁷Mu mazuŵa gha kuwusa kwa Aritaserese, karonga wa charu cha Peresiya, Bishilamu, Mitiredati, Tabeyele pamoza na ŵanyawo ŵanyakhe nawo ŵakamulembera karata karonga uyu, kumudandaulira za ŵaYuda. Ŵakamulembera mu chiAramayiki ndipo yikang'anamulika.

⁸Rehumu, mukuru wa chigaŵa, na Shimushayi uyo wakaŵa mulembi wakhe, ndiwo ŵakalemba karata yura kwa Aritaserese kudandaulira ŵaYuda mu Yerusalemu. Karata yikalembeka ntheura:

⁹Karata uyu wakafumira kwa ine Rehumu mukuru wa chigaŵa, na mulembi Shimushayi ndiposo na ŵanyithu aŵa: ŵeruzgi, nduna, ŵakazembe na ŵarongozgi ŵa charu cha Peresiya, ŵanthu ŵa msumba ŵa Ereki, Babuloni na Susa mu charu cha Elamu.

¹⁰Ŵanthu ŵanyakhe awo Osinapara, munthu wakuchindika na wakuzirwa, wakaŵatorera kuno ndi ŵamitundu ndipo wakaŵazengeska mu msumba wa Samariya na ku malo agho ghali mu chigaŵa icho chili ku sirya kwa mronga mu Yufurate.

¹¹Karata iyo wakatuma yikaŵa iyi: “Kwa Karonga Aritaserese. “Kufuma ku ŵateŵeti winu mu chigaŵa cha ku sirya kwa mronga wa Yufurate. “Ise tose tikumutauzgani.

¹²“Tikukhumba kumumanyiskani imwe karonga, kuti ŵaYuda awo ŵakafuma uko kwiza kuno, ŵafika ku Yerusalemu, ndipo ŵayamba kuzengaso msumba ura wa chigaruka na wakuzura na ubendezi. Ŵakuzenga malinga gha msumba ndipo ŵali pafupi kumarizga lufura lwakhe.

¹³“Sono chimanyikwe ichi kwa karonga kuti usange msumba uwu wazengekaso ndipo malinga ghakhe ghamarizgika, ndiko kuti ŵanthu ŵarekenge kupereka msonkho wa pa katundu wakupangika mu charu, msonkho wa munthu, na msonkho wa katundu wakufumira kuwaro kwa charu. Ntheura msonkho wa karonga uti uchepenge.

¹⁴Sono pakuti ise tili pasi pa karonga, nchakwenerera chara kuti ise tiwone karonga wakuyuyurika. Ntheura tikutuma uthenga uwu kuti timumanyiskani imwe karonga.

¹⁵Ntheura sono penjererani mu Buku la Midauko ya ŵasekuru ŵinu, ndipo muti musange kuti msumba uwu ngwa chigaruka, na wakusuzga ku ŵakaronga na ku nduna za vigaŵa. Ukaŵa msumba wachigaruka kufuma papo kale ndipo ndicho chifukwa ukabwangandulika.

¹⁶Tikumumanyiskani imwe karonga kuti usange msumba uwu wazengeka ndipo malinga ghakhe ghamarizgika, imwe kuti muti muŵengeso na chilichose chara mu chigaŵa cha ku sirya kwa mronga wa Yufurate.”

¹⁷“Karonga wakazgora karata yira mwa ntheura: “Kwa Rehumu mukuru wa chigaŵa, Shimushayi mulembi, na ŵanyinu wose awo ŵakukhara mu msumba wa Samariya na mu chigaŵa chose cha ku sirya kwa mronga wa Yufurate, nkhumutauzgani.

¹⁸“Karata uyo mukatitumira wali kutanthaulika ndipo wali kuŵazgika panthazi pane.

¹⁹Nkhulangula kuti ŵapenjerere makora ndipo nadi kwasangika kuti ŵanthu ŵa msumba uwu, kufuma papo kale ŵaŵa ŵakuwukira ŵakaronga ndipo uchigaruka na vivulupi vyachitikanga nadi.

²⁰Yerusalemu wakaŵa na karonga ŵankhongono ndipo wakawusanga chigaŵa chose cha ku sirya kwa mronga wa Yufurate. Ŵanthu ŵakaperekanga msonkho wa pa katundu wakupangika mu charu, msonkho wa munthu, na msonkho wa katundu wakufumira kuwaro kwa charu.

²¹Ntheura muŵike languro ku ŵanthu aŵa mwakuti ŵareke mlimo wakuzengaso msumba uwo mpaka apo ndizamkuŵalangulira kuti wazenge.

²²Mungaziwulikanga chara kureka kuŵalangula kuti ŵareke kuzenga. Kasi chingaŵa chifukwa uli kuti kwananga uku kukule mpaka kupweteke karonga?”

²³Para karata wa Karonga Aritaserese wakaŵazgika panthazi pa Rehumu mukuru wa chigaŵa, mulembi Shimushayi na panthazi pa ŵanyawo, mwaluŵiro ŵakaruta ku ŵaYuda ku Yerusalemu ndipo ŵakaŵachichizga na nkhongono zose kuti ŵareke kuzenga msumba.

²⁴Ntheura mlimo wakuzenga Nyumba ya Chiuta mu Yerusalemu ukarekeka, mpaka mu chirimika cha chiŵiri cha kuwusa kwa Karonga Dariyusi wa charu cha Peresiya.