Read new_tumbuka_bible Ezira 5 Bible Online

Ezira 5 - new_tumbuka_bible bible

Ezira 5

¹Nchimi Hagayi na Zakariya mwana wa Ido ŵakamba kuchima ku ŵa Yuda awo ŵakakharanga mu charu cha Yuda na mu Yerusalemu mu zina la Chiuta wa Israele uyo wakaŵawusanga.

²Penepapo Zerubabele, mwana wa Shatiyele, na Yeshuwa, mwana wa Yozadaki, pakovwirika na nchimi za Chiuta zira, ŵakamba kuzengaso Nyumba ya Chiuta mu Yerusalemu.

³Pa nyengo yeneiyo Tatenayi, mukuru wa chigaŵa cha ku sirya kwa mronga wa Yufurate, Shetara Bozenayi na ŵanyawo ŵanyakhe ŵakiza ndipo ŵakafumba ŵakati, “Kasi ndi njani uyo wakamuzomerezgani kuti muzenge Nyumba ya Chiuta iyi na kuyiwezgeramo?”

⁴Ŵakaŵafumbaso kuti, “Kasi mazina gha ŵanthu awo ŵakazenganga nyumba yira ŵakaŵa njani?”

⁵Kweni Chiuta wakaŵawonanga ŵararaŵarara ŵaYuda ŵara ndipo ŵakaŵarekeska chara kuzenga Nyumba ya Chiuta, mpaka ŵakalemba karata kwa Dariyusi na kupokera zgoro lakhe.

⁶Karata iyo Tatenayi mukuru wa chigaŵa cha ku sirya kwa mronga wa Yufurate, Shetara Bozenayi na ŵanyawo ŵanyakhe awo ŵakaŵa nduna zakhe zikalembera Dariyusi ndi iyi.

⁷Karata yira yikaŵa na mazgu agha: Kwa Karonga Dariyusi. Tikumutauzgani.

⁸Tikumumanyiskani imwe karonga kuti ise tikaruta mu chigaŵa cha Yuda, ku Nyumba ya Chiuta mukuru. Nyumba iyi yikuzengeka na mawe ghakurughakuru ndipo mathabwa ghakuŵikika mu viliŵa. Mlimo ukuchitika na phamphu chomene ndipo ukwenda makora.

⁹“Tikaŵafumba ŵararaŵarara ŵara kuti, ‘Kasi ndi njani uyo wakamuzomerezgani kuti muzenge Nyumba ya Chiuta iyi na kuyiwezgeramo?’

¹⁰Tikaŵafumbaso mazina ghawo mwakuti tilembe mazina gha ŵarongozgi ŵawo kuti imwe mughamanye.”

¹¹“Zgoro lawo kwa ise likaŵa ili: “ ‘Ise ndise ŵateŵeti ŵa Chiuta wa kuchanya na pasi, ndipo tikuzengaso Nyumba ya Chiuta iyo yikazengeka kale na kale na karonga mukuru wa Israele na kuyimarizga.

¹²Kweni chifukwa chakuti ŵasekuru ŵithu ŵakakwiyiska Chiuta wa kuchanya, iyo wakaŵapereka mu mawoko gha Nebukadinezara muKaladeya, karonga wa Babuloni. Iyo ndiyo wakabwangandula Nyumba ya Chiuta ndipo ndiyo wakaŵatorera ŵanthu ku charu cha Babuloni, kuŵa ŵamikori.’ ”

¹³Kweni Karonga Kirusi wa charu cha Babuloni, mu chirimika chakudanga cha kuwusa kwakhe, wakalangula kuti Nyumba iyi ya Chiuta yizengekeso.

¹⁴Ndipo viteŵetero vya golide na vya siliva vya Nyumba ya Chiuta ivyo Nebukadinezara wakatora mu Nyumba ya Chiuta mu Yerusalemu na kwiza navyo mu nyumba ya chiuta wa ku Babuloni, Karonga Kirusi wakavitoraso na kuvipereka kwa Sheshibazara uyo wakamwimika kuŵa nduna.

¹⁵Karonga wakati kwa iyo, “Tora viteŵetero ivi, urute navyo ndipo ukaviŵike mu Nyumba ya Chiuta mu Yerusalemu. Nyumba ya Chiuta yikazengekeso pa malo ghakhe.”

¹⁶Ntheura Sheshibazara wakiza na kuŵika lufura lwa Nyumba ya Chiuta mu Yerusalemu ndipo kufuma pa nyengo yeneyira mpaka sono Nyumba ya Chiuta yichali kuzengeka ndipo yindamarizgike.

¹⁷Ndipo usange chingamuŵirani chiweme imwe karonga, zomerezgani kuti ŵanthu ŵapenjerere mu Mabuku gha Midauko gha ŵa karonga kweneuko ku Babuloni kuti ŵawone usange nadi Karonga Kirusi wakalangula kuti Nyumba ya Chiuta yizengekeso mu Yerusalemu. Ndipo pamanyuma, imwe karonga mutimanyiske na za udumuliro winu pa makani agha.