Read new_tumbuka_bible Ezira 6 Bible Online

Ezira 6 - new_tumbuka_bible bible

Ezira 6

¹Karonga Dariyusi wakalangula kuti ŵanthu ŵapenjerere mu Mabuku gha Midauko gha ŵakaronga agho ghakasungika ku Babuloni.

²Ndipo ku msumba wa Ekibatana, msumba wa ufumu, mu chigaŵa cha Mediya, chikasangika chikarata chakuzingika umo mukalembeka mazgu ghakuti: Chikumbusko:

³“Karonga Kirusi, mu chirimika chakudanga cha kuwusa kwakhe, wakapereka languro ili pa vya Nyumba ya Chiuta mu Yerusalemu: “ ‘Nyumba ya Chiuta yizengekeso kuŵa malo gha kuperekeramo sembe zakupambanapambana ndiposo na sembe zakocha. Nyumba ya Chiuta yikaŵe mamita 27 mu utali ndiposo mamita 27 mu ufupi.

⁴Nyumba yizenge na mizere yitatu ya mawe ghakurughakuru na mzere umoza wa mathabwa ndipo ndarama za mlimo uwu zifumenge ku thumba la vyuma vya karonga.

⁵Viteŵetero vya golide na siliva vya Nyumba ya Chiuta ivyo Nebukadinezara wakatora mu Nyumba ya Chiuta mu Yerusalemu kwiza navyo ku Babuloni, vikwenera kuwerera. Vyose viwerere ku Yerusalemu, chilichose pa malo ghakhe mu Nyumba ya Chiuta.’ ”

⁶“Ntheura iwe Tatenayi mukuru wa chigaŵa ku sirya kwa mronga wa Yufurate, pamoza na Shetara Bozenayi na ŵararaŵarara ŵanyinu, mufumeko uko.

⁷Mureke kutimbanizga mlimo wakuzenga Nyumba ya Chiuta. Muyireke nduna ya charu cha Yuda pamoza na ŵarara ŵa Yuda, ndiwo ŵazenge Nyumba ya Chiuta pa malo ghakhe.

⁸“Ndipo nkhalangula pa icho mukwenera kuŵachitira ŵararaŵarara ŵa ŵaYuda ŵa mwakuti Nyumba ya Chiuta iyi yizengekeso. Ndarama zakuzengera Nyumba iyi zifumire ku thumba la vyuma vya karonga ndipo zipereke zose kwambula kuchedwa. Zeneizi ndizo ndarama izo zikafuma ku msonkho wa ŵanthu ŵa ku chigaŵa cha ku sirya kwa mronga wa Yufurate mwakuti mlimo ureke kwimilira.

⁹Chose icho chikukhumbikwa kuŵa sembe yakocha kwa Chiuta wa kuchanya, manyi ndi nkhambako yichoko, mberere zanarume, ŵana-mberere na ŵapepe, tirigu, muchere, vinyo na mafuta kwakuyana na umo ŵasofi awo ŵali ku Yerusalemu ŵakakhumbira, muŵapenge zuŵa na zuŵa kwambula kutondeka.

¹⁰Vyeneivi vikwenera kuchitika mwakuti ŵaperekenge sembe za sungu liweme kwa Chiuta wa kuchanya ndiposo warombenge karonga na ŵana ŵakhe kuti waŵe na umoyo utali.

¹¹“Ndiposo ndalangula kuti usange munthu yunji wati wasinthe languro ili, muchiko wa nyumba yakhe usoroloke ndipo iyo wakwezgeke na kumupayika penepapo. Ndipo nyumba yibwangandilike na kuŵa chizara.

¹²Chiuta uyo wali kuzgora Yerusalemu kuŵa malo gha kuthuwuskirapo zina lakhe, waparanye karonga panji munthu waliyose uyo wati wasinthe languro ili panji kupankhura Nyumba iyi ya Chiuta mu Yerusalemu. Ine Dariyusi, ndine ndalangula ntheura. Munthu waliyose wakwenera kulisunga languro ili.”

¹³Ntheura kwakuyana na languro la Karonga Dariyusi ilo wakatuma, Tatenayi mukuru wa chigaŵa cha ku sirya kwa mronga wa Yufurate, na Shetara Bozenayi na ŵanyawo ŵanyakhe ŵakapulikira languro lira.

¹⁴Ntheura ŵarara ŵa ŵaYuda ŵakarutilira kuzenga ndipo vinthu vikaŵayendera makora kwizira mu uchimi wa nchimi Hagayi na Zakariya mwana wa Ido. Ndipo ŵakamara kuzenga Nyumba yira kwakuyana na umo Chiuta wa Israele wakalangulira ndiposo nga ndi umo Kirusi, Dariyusi na Aritaserese, ŵakaronga ŵa charu cha Peresiya wakalangulira.

¹⁵Ŵakamara kuzenga Nyumba ya Nyumba yira pa zuŵa la chitatu la mwezi wa Adara mu chirimika cha chinkhonde na chimoza cha kuwusa kwa Karonga Dariyusi.

¹⁶Penepapo ŵaIsraele, ŵasofi, ŵaLevi ndiposo na wose aŵa ŵakawera kufuma ku umikori ŵakaŵa na chiphikiro cha kupatuliskira Nyumba ya Chiuta na chimwemwe chikuru.

¹⁷Kuti ŵayipatule Nyumba ya Chiuta yira, ŵanthu ŵakapereka nkhambako 100, mberere zanarume 200, ŵana-mberere 400 kuŵa sembe zakocha ndiposo ŵapepe 12 kuŵa sembe ya zakwananga za ŵaIsraele wose kwakuyana na unandi wa mafuko gha Israele.

¹⁸Ndipo ŵakaŵika ŵasofi mu vigaŵa vyawo, ŵaLevi nawo mu ndondomeko yawo kuti wachitenge mlimo wa chisopo cha Chiuta mu Yerusalemu nga ndi umo kuli kulembekera mu Buku la Mozesi.

¹⁹Pa zuŵa la 14 la mwezi wakudanga, wose awo ŵakawera kufuma ku umikori ŵakachita chiphikiro cha Paska.

²⁰Ŵasofi na ŵaLevi ŵakajitozga ndipo wose ŵakaŵa ŵambula kaheni kalikose. Ntheura ŵakaŵakomera ŵana-mberere ŵa Paska wose awo ŵakawera kufuma ku umikori ndiposo na ŵasofi ŵanyawo na iwoŵene.

²¹Sembe ya Paska yira yikaryeka na ŵanthu aŵa: ŴaIsraele wose awo ŵakawera kufuma ku umikori, na wose awo ŵakajipatula ku maukazuzi gha ŵamitundu awo ŵakaŵa mu charu ndipo ŵakiza kuti ŵasope FUMU, Chiuta wa Israele.

²²Na chimwemwe chikuru, ŵakaŵa na chiphikiro cha Chingwa chambula chirungo pa mazuŵa ghankhonde na ghaŵiri, chifukwa FUMU yikaŵazuzga na chimwemwe pakuzgora mtima wa karonga wa charu cha Asiriya kuti ŵaŵatemwe ndipo na kuŵavwira pa mlimo wa kuzenga Nyumba ya Chiuta, Chiuta wa Israele.