Read new_tumbuka_bible Ezira 7 Bible Online

Ezira 7 - new_tumbuka_bible bible

Ezira 7

¹Sono pamanyuma pa vinthu vyeneivi, pa nyengo ya kuwusa kwa Aritaserese, karonga wa charu cha Peresiya, kukaŵa munthu yunji zina lakhe Ezira. Iyo wakaŵa mwana wa Seraya, mwana wa Azariya, mwana wa Hilikiya,

²mwana wa Shalumu, mwana wa Zadoki, mwana wa Ahitubu,

³mwana wa Amariya, mwana wa Azariya, mwana wa Merayoti,

⁴mwana wa Zerahiya, mwana wa Uzi, mwana wa Buki,

⁵mwana wa Abishuwa, mwana wa Finehasi, mwana wa Eleyazara, mwana wa musofi mukuru Aroni.

⁶Ezira uyu wakiza mu Yerusalemu kufuma ku Babuloni. Iyo wakaŵa mulembi, nkhwantha mu Dango la Mozesi leneilo FUMU, Chiuta wa Israele wakapereka. Karonga wakamupa vyose ivyo iyo wakaromba, pakuti woko la FUMU Chiuta wakhe likaŵa pa iyo.

⁷Ezira wakiza ku Yerusalemu pamoza na ŵaIsraele ŵanji, ŵasofi, ŵaLevi, ŵimbi ŵa zisumu, ŵalinda ŵa pa vipata na ŵateŵeti ŵa Nyumba ya Chiuta mu chirimika cha chinkhonde na chiŵiri cha kuwusa kwa Karonga Aritaserese.

⁸Ezira wakafika mu Yerusalemu mu mwezi wa chinkhonde mu chirimika cha chinkhonde na chiŵiri cha kuwusa kwa karonga.

⁹Ezira wakamba ulendo wakhe kufuma ku charu cha Babuloni pa zuŵa lakudanga la mwezi wakudanga ndipo wakafika ku Yerusalemu pa zuŵa lakudanga la mwezi wa chinkhonde pakuti woko la uchizi la Chiuta wakhe likaŵa pa iyo.

¹⁰Pakuti Ezira wakajipereka kuŵazga marango gha FUMU na kughachita. Wakaghasambizganga vilayizgo na maweruzgo ghose mu charu cha Israele.

¹¹Agha ndi mazgu agho ghakalembeka mu karata iyo Karonga Aritaserese wakapereka kwa musofi Ezira, ndiposo mulembi uyo wakaŵa nkhwantha mu marango gha FUMU na vilayizgo vyakhe ku ŵaIsraele.

¹²Pakulemba wakati: “Kufuma kwa Aritaserese, karonga wa ŵakaronga. “Kwa musofi Ezira, mulembi wa marango gha Chiuta wa kuchanya. “Nkhukutauzga.

¹³“Sono nkhulangula kuti muIsraele waliyose mu charu cha ufumu wane, manyi ndi musofi panji muLevi uyo wakukhumba kuruta ku Yerusalemu pamoza namwe, wangaruta.

¹⁴Iwe watumika na karonga pamoza na nduna zakhe zinkhonde na ziŵiri kuya kawona umo vinthu viliri mu charu cha Yuda na mu msumba wa Yerusalemu kwakuyana na marango gha Chiuta wako agho uli nagho.

¹⁵Uyegheso vyawanangwa vya siliva na vya golide ivyo karonga na nduna zakhe ŵapereka kwa Chiuta wa Israele uyo chikhazi chakhe chili mu Yerusalemu.

¹⁶Uyegheso siliva na golide yose uyo uti umusange mu chigaŵa chose cha Babuloni pamoza na vyakupereka ivyo ŵaIsraele na ŵasofi ŵakapangana kupereka mu wanangwa kuti wazengere Nyumba ya Chiuta wawo mu Yerusalemu.

¹⁷“Ntheura na ndarama zeneizi ukagule nkhambako, mberere zanarume, ŵana-mberere pamoza na ufu wa sembe na vyakumwa vyakhe ndipo ukavipereke kuŵa sembe pa jochero la Nyumba ya Chiuta winu mu Yerusalemu.

¹⁸“Siliva na golide uyo wamkukharapo, ungamanya kuchitira kanthu kose ako iwe na ŵabali ŵako mwawona kuti nkhakwenerera kwakuyana na khumbo la Chiuta winu.

¹⁹Viteŵetero ivyo vili kuperekeka ku mlimo wa Nyumba ya Chiuta wako ukavipereka panthazi pa Chiuta ku Yerusalemu.

²⁰Ndipo chilichose icho ncha kukhumbikwa mu Nyumba ya Chiuta wako icho ukuchiwona kuti nchakwenerera, ungamanya kuya kagula na ndarama za kufumira mu thumba la vyuma vya karonga.

²¹“Sono ine Karonga Aritaserese nkhulangula ŵasungi-chuma wose ŵa chigaŵa cha ku sirya kwa mronga wa Yufurate kuti: chose icho Ezira musofi wa Chiuta, na mulembi wa marango gha Chiuta wa kuchanya wati wakhumbenge kwa imwe, mumupe luŵiro.

²²Manyi wakhumbenge makilogiramu gha siliva 3,400, tirigu wakukwana makilogiramu 10,000, vinyo wakukwana malita 2,000, mafuta gha olive ghakukwana malita 2,000 ndipo na muchere unandi waka, mumupe.

²³Chose icho chalangurika na Chiuta wa kuchanya, chichitike mwaluŵiro pa Nyumba ya Chiuta mzire ukari wa Chiuta wize pa ufumu wa karonga na pa ŵana ŵakhe.

²⁴Tikumumanyiskaniso kuti nchakuzomerezgeka chara kupoka msonkho wa pa katundu wakupangika mu charu, msonkho wa munthu, na msonkho wa katundu wakufumira kuwaro kwa charu kufuma ku ŵasofi, ŵaLevi, ŵimbi ŵa zisumu, ŵalinda ŵa pa vipata, ŵateŵeti ŵa mu Nyumba ya Chiuta nga ndi ŵateŵeti ŵanyakhe ŵa mu Nyumba ya Chiuta.

²⁵“Iwe Ezira, kwakuyana na vinjeru vya Chiuta wako ivyo uli navyo, wimike nduna na ŵeruzgi kuti ŵeruzgenge mirandu yose ya ŵanthu ŵa ku sirya kwa mronga wa Yufurate. Ŵanthu aŵa ŵaŵe ŵakumanya marango gha Chiuta wako, ndipo waliyose uyo wakughamanya chara marango agha, umusambizge.

²⁶Munthu yose uyo wati wapulikirenge chara marango gha Chiuta wako, panji marango gha karonga, weruzgike luŵiro. Wakwenera kulangika na chilango cha nyifwa panji kuchimbizgika mu charu, panji kumupoka katundu panji kumuŵika mu gadi.”

²⁷Warumbike FUMU, Chiuta wa ŵasekuru ŵithu uyo waŵikamo chinthu ichi mu mtima wa karonga kuti watozge Nyumba ya Chiuta mu Yerusalemu.

²⁸Iyo warutizga chisungusungu chakhe kwa ine panthazi pa karonga na nduna zakhe ndiposo ŵarongozgi ŵakhe ŵankhongono. Nkhankhwima mtima pakuti woko la FUMU, Chiuta wane likaŵa pa ine ndipo nkhaŵawunganya pamoza ŵakuruŵakuru ŵa charu cha Israele kuti ŵarute nane.