Read new_tumbuka_bible Ezira 8 Bible Online

Ezira 8 - new_tumbuka_bible bible

Ezira 8

¹Mazina gha ŵarongozgi ŵa mbumba awo ŵali kulembeka mu ndondomeko, ŵeneawo ŵakiza pamoza nane kufuma mu charu cha Babuloni pa nyengo ya kuwusa kwa Karonga Aritaserese ndi agha:

²Gerishomu, wa mbumba ya Finehasi, Daniyele, wa mbumba ya Itamara, Hatushi, wa mbumba ya Davide,

³wa mbumba ya Shekaniya, wa fuko la Davide, Zakariya, wa mbumba ya Paroshi. Iyo wakalembeka pamoza na ŵanthu ŵanyakhe ŵakukwana 150.

⁴Eliyehoyenayi mwana wa Zerahiya wa mbumba ya Pahati Mowabu. Pamoza nayo pakaŵa ŵanthu ŵanyakhe 200.

⁵Shekaniya mwana wa Yahaziyele wa mbumba ya Zatu. Pamoza nayo pakaŵa ŵanthu ŵanyakhe 300.

⁶Ebedi mwana wa Yonatani wa mbumba ya Adini. Pamoza nayo pakaŵa ŵanthu ŵanyakhe 50.

⁷Yeshaya mwana wa Ataliya wa mbumba ya Elamu. Pamoza nayo pakaŵa ŵanthu ŵanyakhe 70.

⁸Zebadiya mwana wa Mikayele wa mbumba ya Shefatiya. Pamoza nayo pakaŵa ŵanthu ŵanyakhe 80.

⁹Obadiya mwana wa Yehiyele wa mbumba ya Yowabu. Pamoza nayo pakaŵa ŵanthu ŵanyakhe 218.

¹⁰Shelomiti mwana wa Yosifiya wa mbumba ya Bani. Pamoza nayo pakaŵa ŵanthu ŵanyakhe 160.

¹¹Zakariya mwana wa Bebayi wa mbumba ya Bebayi. Pamoza nayo pakaŵa ŵanthu ŵanyakhe 28.

¹²Yohanani mwana wa Hakatani wa mbumba ya Azigadi. Pamoza nayo pakaŵa ŵanthu ŵanyakhe 110.

¹³Elifeleti, Yeuyele na Shemaya ŵa mbumba ya Adonikamu. Iwo ŵakiza pamanyuma. Pamoza nawo pakaŵa ŵanthu 60.

¹⁴Utayi na Zakuru wa mbumba ya Bigivayi. Pamoza nawo pakaŵa ŵanthu ŵanyakhe 70.

¹⁵Nkhaŵawunganya ŵanthu pa mronga uwo ukukafika mpaka ku chikaya cha Ahava ndipo tikakhara mu misasa pa malo ghara mazuŵa ghatatu. Para nkhawona ŵanthu na ŵasofi, nkhasanga kuti ŵa fuko la Levi palije.

¹⁶Ntheura nkhatuma ŵanthu kuti ŵakacheme Eliyezere, Ariyele, Shemaya, Elinatani, Yaribu, Elinatani, Natani, Zakariya na Meshulamu ŵarongozgi ŵakumanyikwa. Nkhachemeso Yoyaribu na Elinatani ŵeneawo ŵakaŵa ŵanthu ŵakusambira.

¹⁷Nkhaŵatuma ŵanthu ŵara kwa Ido, mukuru wa malo ghara agho ghakachemeka Kasifiya. Nkhaŵaphalira mazgu ghakuti ŵakayowoye kwa Ido pamoza na ŵanyakhe awo ŵakaŵa ŵateŵeti ŵa Nyumba ya Chiuta pa Kasifiya, mwakuti ŵatitumireko ŵateŵeti mu Nyumba ya Chiuta withu.

¹⁸Pakuti woko la uchizi la Chiuta withu likaŵa pa ise, ŵakiza nayo Sherebiya munthu wa vinjeru wa mphapu ya Mali, wa fuko la Levi, muIsraele mwenecho pamoza na ŵana ŵakhe na ŵana ŵanyakhe 18.

¹⁹Ŵakizaso na Hashabiya pamoza na Yeshaya wa mphapu ya Merari pamoza na ŵana ŵanyakhe ndiposo na ŵana ŵakukwana 20.

²⁰Ŵakatiziraso na ŵateŵeti 220 ŵa mu Nyumba ya Chiuta awo Davide na nduna zakhe ŵakimika kuti ŵateŵeterenge ŵaLevi. Mazina ghawo ghose gha kalembeka.

²¹Kwenekura pa mronga wa Ahava nkhapharazga ku ŵanthu kuti tiziŵizge kurya mwakuti tijiyuyure panthazi pa Chiuta withu, ku muromba kuti watendeske makora, ise, ŵana ŵithu pamoza na katundu withu yose.

²²Pakuti nkhaŵa na soni kuromba kwa karonga kuti watipe mpingo wa ŵasilikari na mahachi kuti ghativikirirenge ku ŵarwani ŵithu mu nthowa chifukwa tikamuphalira karonga kuti, “Nkhongono ya Chiuta withu yili pa wose awo ŵakupenja iyo, kweni ukari wakhe ukwimikana na wose awo ŵakumukana.”

²³Ntheura tikaziŵizga vyakurya ndipo tikamuŵeyerera Chiuta withu kuti watendeske makora ndipo wakapulika kuŵeya kwithu.

²⁴Ntheura nkhapatulapo ŵasofi ŵararaŵarara 12 aŵa: Sherebiya na Hashabiya ndiposo na ŵabali ŵawo khumi.

²⁵Penepapo nkhapima uzitu wa siliva na wa golide na wa viteŵetero ivyo karonga, nduna zakhe, ŵarongozgi ŵakhe na ŵaIsraele wose awo wakaŵapo ŵakapereka ku Nyumba ya Chiuta withu.

²⁶Nkhavipima vyose na kuŵapa mu mawoko ghawo: siliva wa matani 25, viteŵetero vya siliva vya makilogiramu 70 golide wa makilogiramu 3,400,

²⁷ŵadira ŵa golide 20 gha makilogiramu 8 na hafu, na viteŵetero viŵiri vya mkuŵa wakuŵala, wakuzirwa nga ndi golide.

²⁸Ndipo nkhati kwa iwo, “Imwe muli ŵakupatulika kwa FUMU, ndipo viteŵetero ivi navyo nvyakupatulika. Siliva na golide uyu ndi vyakuperekeka mu wanangwa kwa FUMU, Chiuta wa ŵasekuru ŵinu.

²⁹Ntheura muviŵike na kuvisungilira makora mpaka nyengo iyo vyamkupimikira mu vipinda vya Nyumba ya FUMU mu Yerusalemu panthazi pa ŵasofi ŵararaŵarara, ŵaLevi ndiposo na ŵararaŵarara mu ŵawiskewokuru ŵaIsraele ku Yerusalemu.”

³⁰Penepapo ŵasofi na ŵaLevi ŵakapokera siliva, golide na viteŵetero vyakupatulika vira ivyo vikapimika kuti vitorekere ku Nyumba ya Chiuta mu Yerusalemu.

³¹Pa zuŵa la 12 la mwezi wakudanga, tikawuka ulendo withu kufuma pa mronga wa Ahava kuruta ku Yerusalemu. Ndipo Chiuta withu wakaŵa nase, wakatithaska ku ŵarwani ŵithu na ku vigeŵenga ivyo vikatikhazga mu nthowa.

³²Tikafika mu Yerusalemu ndipo tikapumulapo mazuŵa ghatatu.

³³Ntheura pa zuŵa la chinayi tikaruta ku Nyumba ya Chiuta ndipo tikapima siliva, golide na viteŵetero panthazi pa musofi Meremoti mwana wa Uriya. Pamoza nayo pakaŵa Eleyazara mwana wa musofi Finehasi na ŵaLevi ŵaŵiri, Yozabadi mwana wa Yeshuwa na Nowadiya mwana wa Binuyi.

³⁴Vyose vikapendeka na kupimika uzitu wakhe ndipo chilichose chikalembeka nyengo yeneyira.

³⁵Pa nyengo yeneyira awo ŵakawera kufuma umikori ŵakapereka sembe yakocha kwa Chiuta ŵaIsraele. Nkhambako izo zikaperekekera ŵaIsraele wose zikaŵa 12. Mberere zanarume zikaŵa 96. Ŵana-mberere ŵakaŵa 77. Ndipo ŵakaperekaso ŵapepe 12 kuŵa sembe ya zakwananga zawo. Sembe yose yikaperekeka kwa FUMU nga ndi sembe yakocha.

³⁶Ŵakaperekaso karata iyo karonga wakaŵapa kuti ŵakapereke ku ŵimiliri ŵa karonga na nduna za chigaŵa izo zikakharanga ku sirya kwa mronga wa Yufurate ŵenawo pamanyuma ŵakapereka wovwiri ku ŵaYuda na pa mlimo wa pa Nyumba ya Chiuta.