Read new_tumbuka_bible Ezira 9 Bible Online

Ezira 9 - new_tumbuka_bible bible

Ezira 9

¹Vinthu vyose ivi vikati vyachitika, ŵarongozgi ŵa ŵaIsraele ŵakiza kwa ine ndipo ŵakati, “ŴaIsraele, ŵasofi na ŵaLevi kuti ŵapatukako ku ŵenecharu na maukazuzi ghawo chara. Iwo ŵakuchita ivyo ŵaKanani, ŵaHiti, ŵaPerezi, ŵaYebusi, ŵaAmoni, ŵaMowabu, ŵaEguputo na ŵaAmori ŵakuchita.

²ŴaIsraele ŵanyakhe ŵali kutorapo ŵanji mu ŵana ŵanakazi ŵa ŵamitundu kuŵa ŵawoli ŵawo na ŵa ŵana ŵawo. Ntheura mtundu wakupatulika wasazgikana na ŵenecharu. Mu kuwura kugomezgeka uku, ŵarongozgi na ŵararaŵarara ndiwo ŵali panthazi.”

³Para nkhati ndapulika ichi, nkhaparura malaya na chakudika chane ndipo nkhakwenyura sisi ku mutu na mwembe ndipo nkhakhara pasi wakuzukuma.

⁴Nkhakhara pasi penepara wakuzukuma mpaka nyengo ya kuperekera sembe na mise. Ntheura ŵanthu ŵakamba kuwungana kuzingirizga ine, wose awo ŵakopanga ŵati ŵapulika mazgu gha Chiuta wa Israele chifukwa chakuwura kugomezgeka kwa awo ŵakawera ku umikori.

⁵Ndipo pa nyengo ya kuperekera sembe ya na mise, nkhawuka kufuma apo nkhakweŵekeranga uku malaya na chidiko chane vyaparuka. Nkhajikama na kutambazura mawoko ghane kwa FUMU, Chiuta wane.

⁶Nkharomba nkhati, “Mwe Chiuta wane, ine ndili na soni na chitima kuti ndinuskire chisko chane kwa imwe Chiuta wane, chifukwa zakwananga zithu zakura, zajumpha na mitu yithu wuwo ndipo majuvyo ghithu ghakura kuya kafika kuchanya.

⁷Kufuma mu mazuŵa gha ŵasekuru ŵithu mpaka sono, majuvyo ghithu ghaŵa ghakuru chomene. Chifukwa cha zakwananga zithu, ise na ŵakaronga ŵithu na ŵasofi ŵithu taperekeka mu mawoko gha ŵakaronga gha vyaru vira kuti tikomeke na lupanga na kutizgora ŵamikori, kutiskogha katundu na kutikhozga soni nga ndi umo kuliri muhanya uno.

⁸“Kweni sono pa kanyengo kachoko aka imwe FUMU, Chiuta withu, mwaŵa ŵa lusungu kwa ise pakutirekako ŵamoyo ndipo mwatipa chikhazi mu malo ghinu ghakupatulika. Imwe mwangweruska maso ghithu na kutipamphuska mu uzga withu.

⁹Nangauli tili ŵazga, kweni imwe Chiuta withu kuti mukutisida mu umikori withu chara kweni mwatichitira chisungusungu panthazi pa ŵakaronga ŵa charu cha Peresiya. Mwatipa umoyo uphya kuti tizengeso Nyumba yinu imwe Chiuta withu na kunozgaso mahami ghinu. Imwe ndimwe chivikiriro chithu mu charu cha Yudeya na mu Yerusalemu.

¹⁰“Ndipo sono, imwe Chiuta withu, kasi tingayowoya vichi pa ichi? Pakuti ise taghasida marango ghinu,

¹¹gheneagho mukapereka kwizira mu nchimi na ŵateŵeti ŵinu. Imwe mukati, ‘Charu icho mukuyako kuya kachihara ndi charu chakukazuzgika na maubendezi gha ŵenecharu na maukazuzi agho ŵakuchita, gheneagho ghazuzga charu chose na vya nthontho vyeneivi.

¹²Ntheura mungatezgangako ŵana ŵinu ŵanakazi ku ŵana ŵawo ŵanarume chara, nesi ŵana ŵawo ŵanakazi kuti ŵatoreke na ŵana ŵinu ŵanarume. Mureke kuzomerezgana nawo vya mutende panji nesi usambazi wawo, mwakuti muŵe ŵankhongono, na kurya viweme vya mu charu chira, na kuchirekera ŵana ŵinu kuti chiŵe chiharo chawo kwa muyirayira.’

¹³“Icho chachitika kwa ise ndi chifukwa cha machitiro ghithu ghaheni na majuvyo ghithu ghakuru. Ndipouli imwe Chiuta withu mwatilanga pachoko chomene kuruska ukuru wa kwananga kwithu, ndipo mwatizomerezga kuti tikhare ŵamoyo nga ndi umo tiliri sono.

¹⁴Kasi sono tinangirengeso marango ghinu pakutorerana na ŵanthu awo ŵakuchita maukazuzi gha ntheura? Asi mphanyi mwangutikaripira na kutimara kwambula kusidapo nanga njumoza kuŵa wamoyo.

¹⁵Mwe FUMU, Chiuta wa Israele, ndimwe ŵarunji pakuti ndise pera ŵakukharako ŵeneawo ŵaphokwa, nga ndi umo kuliri muhanya uno. Wonani tili panthazi pinu na kwananga kwithu, mwakuti pa chifukwa ichi palije na munthu yumoza uyo wangima panthazi pinu.”