Read new_tumbuka_bible Nehemiya 1 Bible Online

Nehemiya 1 - new_tumbuka_bible bible

Nehemiya 1

¹Mazgu gha Nehemiya mwana wa Hakaliya ndi agha: Mu mwezi wa Kisilevu mu chirimika cha 20 cha kuwusa kwa Karonga Aritaserese, ine nkhaŵa mu nyumba ya ufumu mu msumba wa Susa.

²Ndipo Hanani, yumoza wa ŵabali ŵane, wakiza pamoza na ŵanthu ŵanyakhe kufuma mu charu cha Yuda. Nkhaŵafumba za msumba wa Yerusalemu na za ŵaYuda awo ŵakakharapo ŵeneawo kuti ŵakayorekera ku umikori chara.

³Iwo ŵakandizgora ŵakati, “Ŵanthu awo ŵakakharapo mu charu, ŵeneawo kuti ŵakayorekera ku umikori chara, ŵali mu suzgo yikuru chomene ndipo ŵakukhozga soni chomene. Linga la Yerusalemu liri kubwanganduka, ndipo vipata vyakhe vili kuphya na moto.

⁴Para nkhapulika mazgu agha, nkhakhara pasi na kulira. Nkhatengera kwa mazuŵa ghanandi, ndipo nkhaziŵizga kurya na kuromba panthazi pa Chiuta wa kuchanya.”

⁵Pakuromba nkhati, “Mwe FUMU, Chiuta wa kuchanya, Chiuta mukuru na wakofya, mwaŵeneimwe mukusunga mapangano ghinu na kurongora kugomezgeka kwinu ku awo ŵakupulikira marango ghinu.

⁶Tegherezgani kwa ine ndipo julani maso ghinu kuti mulaŵiske kwa ine, na kupulika malurombo gha nda muteŵeti winu. Nkhuromba panthazi pinu muhanya na usiku chifukwa cha ŵateŵeti ŵinu awo ndi ŵanthu ŵinu ŵaIsraele ŵeneawo ŵali kumunangirani. Ndipo ine pamoza na mbumba yane tose tamunangirani.

⁷Tili kumuchitirani vinthu viheni vinandi chomene ndipo tilije kusunga marango ghinu panji nesi malangulo ghinu, nanga ndi maweruzgo ghinu gheneagho mukapereka kwa muteŵeti winu Mozesi.

⁸“Kumbukani mazgu agho mukamulayizga muteŵeti winu Mozesi kuti, ‘Usange mwaŵa ŵambula kugomezgeka ndamkumbininiskirani mukati mu ŵamitundu.

⁹Kweni usange muti muwererenge kwa ine na kusunga marango ghane na kughachita, nangauli ŵanji ŵabalalikana mu charu chose cha pasi, nditi ndiŵawungane kufumira mu charu chose cha pasi na kwiza nawo ku malo agho ndili kughasankha kuŵa chikhazi chakusoperako zina lane.’

¹⁰“ŴaIsraele ndi ŵateŵeti ŵinu ndiposo ŵanthu ŵinu awo muli kuŵawombola na nkhongono yinu yikuru ndiposo na woko linu lankhongono.

¹¹Mwe Fumu, nkhumuŵeyani, tegherezgani khutu linu ku lurombo lwa muteŵeti winu na ku malurombo gha ŵateŵeti ŵinu awo ŵakutemwa kuchindika zina linu. Mundovwire nda muteŵeti winu muhanya uno kuti vinthu vindiŵire makora ndipo karonga uyu kuti waŵe na chiwuravi kwa ine.” Pakuti ine ndanguŵa wakuyegha nkhombo ya karonga.