Read new_tumbuka_bible Nehemiya 11 Bible Online

Nehemiya 11 - new_tumbuka_bible bible

Nehemiya 11

¹Sono ŵarongozgi ŵa ŵaIsraele ŵakakharanga mu msumba wa Yerusalemu. Ndipo ŵanthu ŵanji ŵanyakhe ŵakachita mphenduzgo kuti ŵasangepo munthu yumoza mu ŵanthu khumi mwakuti ŵakakhare mu msumba wakupatulika wa Yerusalemu apo ŵanthu ŵankhonde na ŵanayi mu ŵanthu khumi ŵakakhara mu misumba na mu mizi yinyakhe.

²Ndipo ŵanthu ŵakaŵarumba wose awo ŵakajipereka kuti ŵakakhare mu Yerusalemu.

³Sono ŵaIsraele ŵanyakhe pamoza na ŵasofi, ŵaLevi, ŵateŵeti ŵa mu Nyumba ya Chiuta na ŵazukuru ŵa ŵateŵeti ŵa Solomoni wakakhara mu misumba na mizi yinyakhe ya charu cha Yuda, munthu yose mu chiharo chakhe na chakhe. Kweni ŵarongozgi ŵa chigaŵa cha Yuda wakakharanga mu Yerusalemu.

⁴Ŵanthu ŵanji awo ŵakakharanga mu Yerusalemu ŵakaŵa ŵa fuko la Yuda na la Benjamini. Ŵa fuko la Yuda ŵakaŵa aŵa: Ataya mwana wa Uziya, mwana wa Zakariya, mwana wa Amariya mwana wa Shefatiya, mwana wa Mahalalele, wa mphapu ya Perezi.

⁵Pakaŵaso Maaseya mwana wa Baruki mwana wa Kolihoze, mwana wa Hazaya mwana wa Adaya, mwana wa Yoyaribu, mwana wa Zakariya wa mphapu ya Shilo.

⁶Ŵazukuru ŵa Perezi awo ŵakakharanga mu Yerusalemu waka 468 ŵararaŵarara pera.

⁷Ŵa fuko la Benjamini awo ŵakakharanga mu Yerusalemu ŵakaŵa aŵa: Salu mwana wa Meshulamu, mwana wa Yoyedi, mwana wa Pedaya, mwana wa Kolaya, mwana wa Maaseya, mwana wa Itiyele, mwana wa Yeshaya.

⁸Ndipo na ŵabali ŵakhe Gabayi na Salayi. Wose pamoza wa mphapu ya Benjamini ŵakaŵa 928 ŵanarume pera.

⁹Yoyele mwana wa Zikiri ndiyo wakaŵa murongozgi wawo ndipo Yuda mwana wa Hasenuwa ndiyo wakaŵa murongozgi wa chiŵiri wa msumba.

¹⁰Ŵasofi aŵa ŵakakharanga mu Yerusalemu ŵakaŵa aŵa: Yedaya mwana wa Yoyaribu, Yakini.

¹¹Seraya mwana wa Hilikiya, mwana wa Meshulamu, mwana wa Zadoki, mwana wa Merayoti, mwana wa Ahitubu, uyo wakaŵa murara ku Nyumba ya Chiuta,

¹²ndiposo na ŵabali ŵawo awo ŵakateŵeteranga mu Nyumba ya Chiuta ndipo wose pamoza ŵakaŵa 822. Pakaŵaso Adaya mwana wa Yerohamu mwana wa Pelaliya, mwana wa Amizi, mwana wa Zakariya, mwana wa Pashuru mwana wa Malikiya,

¹³ndiposo na ŵabali ŵakhe awo ŵakaŵa ŵararaŵarara mu mbumba za ŵawiskewo, ndipo wose pamoza ŵakaŵa 242. Pakaŵaso Amashisayi mwana wa Azarele, mwana wa Azayi, mwana wa Meshilemoti, mwana wa Imere,

¹⁴ndiposo na ŵabali ŵawo awo ŵakaŵa vinkhara vya nkhondo. Wose pamoza ŵakaŵa 128. Murara wawo wakaŵa Zabidiyele mwana wa Hagedolimu.

¹⁵ŴaLevi awo ŵakakharanga mu Yerusalemu ŵakaŵa aŵa: Shemaya mwana wa Hashubu, mwana wa Azirikamu, mwana wa Hashabiya, mwana wa Buni.

¹⁶Shabetayi na Yozabadi ŵakaŵa ŵarara ŵa ŵaLevi awo ŵakateŵetanga kuwaro kwa Nyumba ya Chiuta.

¹⁷Mataniya mwana wa Mika, mwana wa Zabidi, mwana wa Asafu, mweneuyo wakaŵa murara wa zisumu mu Nyumba ya Chiuta, wakarongozga lurombo lwa kuwonga. Ndiposo pakaŵaso Bakibukiya uyo wakaŵa murara wa chiŵiri wa zisumu mukati mu ŵabali ŵakhe. Munyakhe wakaŵa Abida mwana wa Shamuwa, mwana wa Galala, mwana wa Yedutuni.

¹⁸ŴaLevi wose awo ŵakakharanga mu msumba wakupatulika waka 284.

¹⁹Ŵalinda ŵa pa vipata vya Nyumba ya Chiuta awo ŵakakharanga mu Yerusalemu ŵakaŵa aŵa: Akubu, Talimoni na ŵabali ŵawo ndipo wose pamoza ŵakaŵa 172.

²⁰ŴaIsraele ŵanyakhe wose pamoza na ŵasofi na ŵaLevi, ŵakakharanga mu misumba na mizi yinyakhe yose ya charu cha Yuda, waliyose pa chiharo chakhe na chakhe.

²¹Ŵateŵeti ŵa mu Nyumba ya Chiuta ŵakakharanga ku Ofele mu Yerusalemu ndipo Ziha na Gishipa ndiwo ŵakaŵa ŵarara ŵawo.

²²Murara wa ŵaLevi mu Yerusalemu wakaŵa Uzi, mwana wa Bani, mwana wa Hashabiya, mwana wa Mataniya, mwana wa Mika. Uzi wakaŵa yumoza wa mphapu ya Asafu mweneuyo wakaŵa murara wa zisumu mu mlimo wa mu Nyumba ya Chiuta.

²³Pakuti karonga wakalangula kuti ŵimbi wa zisumu mu Nyumba ya Chiuta wapokenge phande zuŵa na zuŵa pa mlimo uwu.

²⁴Petahiya mwana wa Meshezabele yumoza wa fuko la Zera mwana wa Yuda ndiyo wakaperekanga urongozgi kwa karonga pa vinthu vyose ivyo vikakhwaskanga ŵanthu.

²⁵Ŵanthu ŵanyakhe ŵa fuko la Yuda ŵakakharanga ku mizi ya Kiriyati Ariba pafupi na minda yawo, ŵanji ku mizi ya Diboni pafupi na minda yawo ndiposo ŵanji ku mizi ya Yekabizeyele pafupi na minda yawo.

²⁶Ŵakakharaso mu msumba wa Yeshuwa, wa Molada, wa Beti Peleti,

²⁷wa Hazara Shuwala, wa Beyeresheba na ku mizi yakuzingirizga.

²⁸Ŵanyakhe ŵakakharangaso mu msumba wa Zikilagi, wa Mekona na ku mizi yakuzingirizga,

²⁹wa Eni Rimoni, wa Zora, wa Yarimuti,

³⁰wa Zanowa, wa Adulamu na mu vikaya vyakhe, wa Lakishi na mu minda yakhe na mu msumba wa Azeka na mu mizi yakhe. Ntheura ŵanthu ŵa fuko la Yuda ŵakakharanga kufuma ku Beyeresheba mpaka ku Dambo la Hinomu.

³¹Ŵa fuko la Benjamini nawo ŵakakharanga kufuma ku msumba wa Geba mpaka ku msumba wa Mikimashi, wa Aya, wa Betele na mu mizi yakhe,

³²wa Anatoti, wa Nobu na wa Ananiya,

³³wa Hazoro, wa Rama na wa Gitayimu,

³⁴wa Hadidi, na wa Zeboyimu ndiposo na mu Nebalati,

³⁵wa Lodi na wa Ono ndipo na mu Dambo la ŵanthu Ŵakuŵajaŵaja.

³⁶Ŵanyakhe ŵa ŵaLevi awo ŵakakharanga mu charu cha Yuda ŵakiza kuti ŵakhare mu charu cha Benjamini.