Read new_tumbuka_bible Nehemiya 12 Bible Online

Nehemiya 12 - new_tumbuka_bible bible

Nehemiya 12

¹Ŵasofi na ŵaLevi awo ŵakawera na Zerubabele mwana wa Shatiyele ndiposo na Yeshuwa kufuma ku umikori ndi aŵa: Seraya, Yeremiya, Ezira,

²Amariya, Maluki, Hatushi,

³Shekaniya, Rehumu, Meremoti,

⁴Ido, Ginetoyi, Abiya,

⁵Miyamini, Maadiya, Biliga,

⁶Shemaya, Yoyaribu, Yedaya,

⁷Salu, Amoki, Hilikiya na Yedaya. Ŵeneaŵa ndiwo ŵakaŵa ŵarongozgi ŵa ŵasofi na ŵabali ŵawo mu mazuŵa gha Yeshuwa.

⁸ŴaLevi ŵakaŵa aŵa: Yeshuwa, Binuyi, Kadimiyele, Sherebiya, Yuda ndiposo na Mataniya mweneuyo wakaŵa murongozgi wa zisumu za kuwonga pamoza na ŵanyakhe.

⁹Ŵabali ŵawo, Bakibukiya na Uni ŵakimilira kuthyana waka na iwo pakupokerana sumu pa nyengo ya visopo.

¹⁰Yeshuwa wakababa Yoyakimu, Yoyakimu wakababa Eliyashibu, Eliyashibu wakababa Yoyada,

¹¹Yoyada wakababa Yonatani ndipo Yonatani wakababa Yaduwa.

¹²Mu mazuŵa gha musofi mukuru Yoyakimu, ŵasofi awo ŵakaŵa ŵarongozgi mu mbumba zawo ŵakaŵa aŵa: Wa mbumba ya Seraya wakaŵa Meraya. Wa mbumba ya Yeremiya wakaŵa Hananiya.

¹³Wa mbumba ya Ezira wakaŵa Meshulamu. Wa mbumba ya Amariya wakaŵa Yehohanani.

¹⁴Wa mbumba ya Maluki wakaŵa Yonatani. Wa mbumba ya Shebaniya wakaŵa Yosefe.

¹⁵Wa mbumba ya Harimu wakaŵa Adina. Wa mbumba ya Merayoti wakaŵa Helikayi.

¹⁶Wa mbumba ya Ido wakaŵa Zakariya. Wa mbumba ya Ginetoni wakaŵa Meshulamu.

¹⁷Wa mbumba ya Abiya wakaŵa Zikiri. Wa mbumba ya Miniyamini na ya Mowadiya wakaŵa Pilitayi.

¹⁸Wa mbumba ya Biliga wakaŵa Shamuwa. Wa mbumba ya Shemaya wakaŵa Yehonatani.

¹⁹Wa mbumba ya Yoyaribu wakawa Matenayi. Wa mbumba ya Yedaya wakaŵa Uzi.

²⁰Wa mbumba ya Salayi wakaŵa Kalayi. Wa mbumba ya Amoki wakaŵa Ebere.

²¹Wa mbumba ya Hilikiya wakaŵa Hashabiya. Wa mbumba ya Yedaya wakaŵa Netanele.

²²Ŵarongozgi ŵa mbumba za ŵaLevi mu mazuŵa gha ŵasofi ŵakuru Eliyashibu, Yoyada, Yohanani na Yaduwa ndiposo na mbumba za ŵasofi zikalembeka mu Buku la Midauko mpaka pa nyengo iyo Karonga Dariyusi wakawusiranga charu cha Peresiya.

²³Ŵarongozgi ŵa mbumba za ŵaLevi ŵakalembeka mu Buku la Midauko kwiza kafika mu mazuŵa gha Yohanani mwana wa Eliyashibu.

²⁴Ndipo ŵarongozgi ŵa ŵaLevi ŵakaŵa aŵa: Hashabiya, Sherebiya, Yeshuwa mwana wa Kadimiyele ndipo na ŵanyawo awo ŵakimilira kuthyana waka na iwo uku ŵakurumba na kuwonga Chiuta, kuti ŵakoŵeranenge pa kwimba, kwakuyana na dango la Karonga Davide munthu wa Chiuta.

²⁵Mataniya, Bakibukiya, Obadiya, Meshulamu, Talimoni na Akubu ndiwo ŵakaŵa ŵalinda ŵa vipinda vyakusungiramo vyuma pa vipata.

²⁶Ŵanthu aŵa ŵakateŵetanga mu mazuŵa gha Yoyakimu mwana wa Yeshuwa muzukuru wa Yozadaki ndiposo mu mazuŵa gha Nehemiya nduna wa chigaŵa na mu mazuŵa gha musofi Ezira, mulembi wa marango.

²⁷Pa nyengo ya kupatulira linga ilo likazingirira msumba wa Yerusalemu, ŵaLevi ŵakapenjeka kufuma kosekose uko wakakharanga ndipo wakati wasangike wakiza nawo ku Yerusalemu kuti ŵachite chikondwerero cha mlimo wakupatuliska linga pakwimba sumu za kuwonga pakwimbira ng'oma, ŵakalimba na ŵabango.

²⁸Wupu wa ŵakwimba sumu nawo ukiza pamoza kufumira mu vigaŵa ivyo vikazingirizga Yerusalemu ndipo na mu vikaya vyakuzingirizga ŵaNetofati.

²⁹Wupu unyakhe wa ŵakwimba ukafuma ku Beti Giligala na mu chigaŵa cha Geba na cha Azimaveti, pakuti ukazenga vikaya vyawo kuzingirizga msumba wa Yerusalemu.

³⁰ŴaLevi na ŵasofi ŵakajitozga, ndipo ŵakatozgaso ŵanthu, vipata na linga.

³¹Penepapo ine nkhakwera na ŵarongozgi ŵa charu cha Yuda pachanya pa linga na kwimika mawupu ghaŵiri ghakuru ghakwimba zisumu ŵeneawo ŵakawonganga uku ŵakwenda mukundonda. Wupu umoza ukenda ku dera la maryero pa linga pachanya kurazga ku Chipata cha ku Chizara.

³²Ndipo uyo wakaŵarondezga pamanyuma wakaŵa Hoshaya na hafu wa ŵarongozgi ŵa Yuda

³³awo ŵakaŵa pamoza na Azariya, Ezira, Meshulamu,

³⁴Yuda, Benjamini, Shemaya, Yeremiya.

³⁵Ŵasofi ŵanji awo ŵakalizganga zimbata ŵakaŵa aŵa: Zakariya mwana wa Yonatani, mwana wa Shemaya, mwana wa Mataniya, mwana wa Mikaya, mwana wa Zakuru, muzukuru wa Asafu.

³⁶Ŵanyakhe ŵakaŵa aŵa: Shemaya, Azarele, Milalayi, Gilalayi, Maayi, Netanele, Yuda na Hanani ŵeneawo ŵakaŵa na vyakwimbira sumu vya Davide, munthu wa Chiuta. Ndipo mulembi Ezira ndiyo wakaŵadangiriranga.

³⁷Pa chipata cha Mbwiwi ya maji wakarutilira kurazga ku makwerero gha msumba wa Davide pa chikwera cha linga ndipo wakendera cha muchanya kwa Nyumba ya Davide kuya kafika ku Chipata cha ku Maji kufumira gha dazi.

³⁸Wupu wa chiŵiri wa ŵanthu ŵakwimba ukarazga ku dera la mazere. Ine nkharondezga wupu uwu pamoza na hafu wa ŵarongozgi pakwenda pachanya pa linga. Tikajumpha Chigongwe cha Mauvuni kuya kafika na ku Chiliŵa Chisani,

³⁹pachanya pa Chipata Efurayimu na kurutilira ku Chipata cha Kale na Chipata cha Somba, na pa Chigongwe cha Hananele na Chigongwe cha 100 kuya kafika ku Chipata cha Mberere. Ndipo pa Chipata cha Ŵalinda, wupu wa ŵanthu aŵa ukimilira.

⁴⁰Ntheura wupu wa chiŵiri gha ŵanthu awo ŵakawonganga Chiuta, ukimilira mu Nyumba ya Chiuta. Ine nane nkhimilira pa malo ghane pamoza na hafu wa ŵarongozgi.

⁴¹Ndipo ŵasofi aŵa nawo ŵakimilira penepara uku ŵakulizga mbata zawo: Eliyakimu, Maaseya, Miniyamini, Mikaya, Eliyoyenayi Zakariya na Hananiya.

⁴²Pakaŵaso ŵasofi aŵa: Maaseya, Shemaya, Eleyazara, Uzi, Yehohanani, Malikiya, Elamu na Ezere. Ŵimbi ŵa zisumu ŵakimbanga chomene ndipo Yezirahaya ndiyo wakaŵa murongozgi wawo.

⁴³Ndipo pa zuŵa lira ŵanthu ŵakapereka sembe zinandi chomene ndipo ŵakasekerera chifukwa Chiuta ndiyo wakachitiska kuti ŵasekerere ntheura. Ŵanakazi na ŵana nawo ŵakasekerera ndipo chimwemwe cha ŵanthu ŵa mu Yerusalemu chikapulikikwa kutali chomene.

⁴⁴Pa zuŵa lenelira ŵanthu ŵanji ŵakasoreka kuŵa ŵakulaŵirira vipinda vyakusungiramo vyuma umo vyakupereka vya ŵanthu vikasungikanga. Vyakupereka ivi vikaŵa vuna yakudanga kucha na chakhumi, vyeneivyo ŵakenera kuwunganya kufuma mu minda yose ya mu vikaya kwakuyana na Dango la Mozesi kuti viŵenge vya ŵasofi na ŵaLevi. Pakuti ŵaYuda ŵakondwera na uteŵeti wa ŵasofi na ŵaLevi.

⁴⁵Ŵeneaŵa ŵakachitanga ivyo Chiuta wawo wakalangula pakuŵatozga ŵanthu na vinthu vinyakhe. Ŵimbi ŵa zisumu na ŵalinda ŵa pa vipata vya Nyumba ya Chiuta, nawo ŵakateŵetanga mlimo wawo kwakuyana na marango gha Davide na mwana wakhe Solomoni.

⁴⁶Pakuti kufuma papo kale mu mazuŵa gha Davide na Asafu, wakaŵangako ŵarongozgi ŵa ŵakwimba zisumu na ŵarongozgi ŵa zisumu za kurumba na za kuwonga Chiuta.

⁴⁷Mu mazuŵa gha Zerubabele na mu mazuŵa gha Nehemiya ŵanthu ŵa mu charu chose cha Israele ŵakaperekanga zuŵa na zuŵa phande ku ŵimbi ŵa zisumu na ku ŵalinda ŵa pa vipata. Ndipo ŵanthu ŵakaviŵikanga pa dera ivyo vikaŵa vya ŵaLevi, ndipo ŵaLevi nawo ŵakaŵikanga pa dera ivyo vikaŵa vya ŵasofi ŵa mbumba ya Aroni.