Read new_tumbuka_bible Nehemiya 13 Bible Online

Nehemiya 13 - new_tumbuka_bible bible

Nehemiya 13

¹Pa zuŵa lenelira, Dango la Mozesi likaŵazgika uku ŵanthu ŵakupulika. Kukasangika kuti kuli kulembeka kuti muAmoni panji muMowabu wareke kuzomerezgeka kuŵamo mu ungano wa Chiuta kwa muyirayira.

²Pakuti ŵeneaŵa kuti ŵakaŵapokerera ŵaIsraele na kuŵapa chakurya na maji chara. Mu malo mwakhe ŵakamulemba nchito Balaamu kuti waŵatembe ŵaIsraele. Ndipouli Chiuta withu wakazgora nthembo yira kuŵa chitumbiko.

³Para ŵaIsraele ŵakapulika marango ŵakaŵawuskamo mukati mu ŵaIsraele wose awo ŵakaŵa ŵalendo.

⁴Pambere ichi chindachitike, musofi Eliyashibu wakasoreka kuŵa wakusungilira vipinda vya kusungilira vyuma vya mu Nyumba ya Chiuta withu, ndipo wakaŵa wakapulikananga na Tobiya.

⁵Wakamunozgera Tobiya chipinda chikuru icho pakudanga ŵakasungirangamo tirigu wa sembe, vyakununkhira, viteŵetero vya mu Nyumba ya Chiuta, chakhumi cha tirigu, vinyo na mafuta, vyeneivyo vikalangurika kuti viperekekenge ku ŵaLevi, ŵimbi ŵa zisumu na ku ŵalinda ŵa vipata ndiposo na ivyo vikaŵa vyakupereka ku ŵasofi.

⁶Apo ivi vikachitikanga, ine kuti nkhaŵa mu Yerusalemu chara pakuti mu chirimika cha 32 cha kuwusa kwa Karonga Aritaserese wa charu cha Babuloni, nkharuta kwa iyo kuti nkhakumane nayo. Ndipo ghakati gharutapo mazuŵa nkhamuŵeyerera, karonga kuti wandizomerezge,

⁷kuwerera ku Yerusalemu. Penepapo ndipo nkhasanga uheni uwo musofi Eliyashibu wakachita pakupereka chipinda chikuru mu Nyumba ya Chiuta kwa Tobiya.

⁸Ichi chikandikwiyiska chomene ndipo nkhaponya kuwaro vinthu vyose vya Tobiya ivyo vikaŵa mu chipinda chira.

⁹Penepapo nkhalangula kuti ŵatozgemo mu vipinda vira ndipo nkhawezgeramo viteŵetero vya mu Nyumba ya Chiuta pamoza na vyawanangwa vya tirigu na vyakununkhira.

¹⁰Ndipo nkhasangaso kuti phande la ŵaLevi kuti likaperekekanga chara ku ŵaLevi. Ntheura ŵaLevi na ŵimbi ŵa zisumu awo ŵakateŵetanga ku Nyumba ya Chiuta ŵakawerera ku minda yawo na yawo.

¹¹Penepapo nkhaŵasuska ŵarongozgi na kuŵafumba kuti, “Nchifukwa uli mwayireka ntheura Nyumba ya Chiuta?” Ntheura nkhaŵachema ŵaLevi na ŵimbi ŵa zisumu ŵara kuti ŵize mu Nyumba ya Chiuta kuti ŵarutizge milimo yawo.

¹²Ntheura ŵanthu wose ŵa charu cha Yuda ŵakayambaso kwiza na vyawanangwa vya khumi cha vya kufumira ku vuna, vinyo na mafuta ku vipinda vyakusungiramo vyuma.

¹³Ndipo nkhimika musofi Shelemiya, mulembi Zadoki na Pedaya yumoza wa ŵaLevi kuŵa wakusungilira vipinda vyakusungiramo vyuma. Nkhimikaso Hanani mwana wa Zakuru, mwana wa Mataniya kuŵa movwiri wawo, pakuti ŵanthu wose awo ŵakaŵa ŵakugomezgeka ndipo mlimo wa awo ukaŵa wakugaŵira ŵabali ŵawo vya kupereka.

¹⁴Mundikumbuke, mwe Chiuta wane chifukwa cha cheneichi ndipo mureke kusisita milimo yane ya kugomezgeka iyo ndachitira Nyumba ya Chiuta wane mu uteŵeti wakhe wa visopo.

¹⁵Mu mazuŵa gheneagho nkhawona ŵanthu ŵanji mu charu cha Yuda kuti ŵakuponda mpheska pa zuŵa la Sabata. Ŵanyakhe ŵakizanga na mizigho ya tirigu na kuyithwikiska pa zimbunda. Ŵanyakhe ŵakizanga na vinyo la mpheska, vikuyu na ŵa katundu ŵamitundu na kwizanga nayo ku Yerusalemu pa zuŵa la Sabata. Penepapo nkhaŵachenjezga kuti ŵareke kuguliska vyakurya pa zuŵa la sabata.

¹⁶Ŵanthu ŵa msumba wa Ture awo ŵakakharanga mu msumba wa Yerusalemu nawoso ŵakizanga na somba pamoza na mitundu yose ya malonda. Iwo ŵakaviguliskanga pa zuŵa la Sabata ku ŵaYuda na ŵa mu msumba wa Yerusalemu.

¹⁷Penepapo nkhaŵasuska ŵarongozgi ŵa mu charu cha Yuda na kuŵafumba kuti, “Kasi nchifukwa uli mukuchita chinthu chiheni ichi na kunanga zuŵa la Sabata?

¹⁸Asi ŵawiskemwekuru nawo ŵakachita ntheura pera ndipo Chiuta withu wakakhizgira uheni wawo wose ura pa ise na pa msumba uwu. Sono imwe mukumukaripiskaso Chiuta kuti wakaripe chomene chifukwa ŵaIsraele pakunanga zuŵa la Sabata.”

¹⁹Para kukambanga kufipa, pa vipata vya msumba wa Yerusalemu pambere zuŵa la Sabata lindambe nkhalangula kuti vijaro vya pa vipata vijarikenge ndipo vireke kujurika mpaka zuŵa la Sabata limare. Ndipo nkhimika ŵanji ŵateŵeti ŵane kuti ŵakharenge pa vipata mwakuti paŵavye katundu wakunjira mukati pa zuŵa la Sabata.

²⁰Ntheura awo ŵakakhumba kugula na awo ŵakaguliskanga malonda gha mitundumitundu wakagona kuwaro kwa msumba wa Yerusalemu zuŵa limoza panji ghaŵiri.

²¹Kweni nkhaŵachenjezga nkhati kwa iwo, “Kasi mukugonerachi pafupi na linga?” Usange muchitengeso ntheura nditi ndimanye chakuchita namwe. Kufuma nyengo yeneyira mpaka na kunthazi, kuti ŵakizakoso pa zuŵa la Sabata chara.

²²Ntheura nkhaŵalangula ŵaLevi kuti ŵajitozge ndipo ŵize na kulinda vipata kuti walipatule zuŵa la Sabata. Pa cheneichi nacho mundikumbuke, Mwe Chiuta wane, ndipo muŵe na lusungu na ine kwakuyana na chisungusungu chinu chikuru.

²³Mu mazuŵa gheneghara nkhawonaso ŵaYuda ŵanyakhe awo ŵakatora ŵanakazi kufuma mu msumba wa Ashidodi na ŵa mu charu cha Amoni na cha Mowabu.

²⁴Hafu wa ŵana ŵawo ŵakayowoyanga chiyowoyero cha ŵanthu ŵa ku Ashidodi panji chiyowoyero cha mitundu yinyakhe. Kweni ŵakamanyanga chara kuyowoya chiyowoyero cha ŵaYuda.

²⁵Ntheura nkhaŵachenya na kuŵatemba, ndipo ŵanyakhe nkhaŵatimba na kukunyura masisi ghawo. Nkhaŵarapiska mu zina la Chiuta pakuyowoya kuti, “Mureke kupereka ŵana ŵinu ŵanakazi kuti ŵatorane na ŵana ŵawo ŵanarume, panji ŵana ŵinu ŵanarume ŵareke kutorana na ŵana ŵawo ŵanakazi, nesi imwe mureke kutorako ŵanakazi ŵawo.

²⁶Asi zikaŵa zinthengwa zakuŵa nga ndi izi izo Solomoni karonga wa charu cha Israele zikamunangiska. Mukati mu vyaru vyose mukaŵavye karonga wakatemweka na Chiuta ndipo Chiuta wakamwimika kuŵa karonga pa ŵaIsraele wose. Ndipouli ŵakaŵa ŵanakazi ŵa chilendo awo ŵakamunangiska.

²⁷Kasi tipulikire imwe na kuchita uheni ukuru uwu na kuŵa wambula kugomezgeka kwa Chiuta withu pakutora ŵanakazi ŵa chilendo.”

²⁸Ndipo yumoza wa ŵana ŵa Yehoyada, mwana wa musofi mukuru Eliyashibu, wakaŵa mukweni wa Sanibalati wa ku msumba wa Horoni. Ntheura nkhamuphalira kuti wafumeko kwa ine.

²⁹Mwe Chiuta wane, muŵakumbuke chifukwa wakakazuzga usofi wawo na kuswa phangano la usofi ilo mukapangana na la ŵaLevi.

³⁰Ntheura ndimo nkhaŵatozgera ŵasofi na ŵaLevi ku chinthu chose cha chilendo, ndipo nkhanozgera milimo ya ŵasofi na ŵaLevi, waliyose mlimo wakhe na wakhe.

³¹Nkhanozgera kaperekero ka nkhuni za sembe ndiposo na vipambi vyakudanga pa nyengo zakwimikika. Mwe Chiuta wane, mundikumbuke pa vyose ivi ndipo muŵe nane na lusungu.