Read new_tumbuka_bible Nehemiya 2 Bible Online

Nehemiya 2 - new_tumbuka_bible bible

Nehemiya 2

¹Kukati kwajumphapo nyengo mu mwezi wa Nisani mu chirimika cha 20 cha kuwusa kwa Karonga Aritaserese, para ŵateŵeti ŵakiza na vinyo, ine nkhatora vinyo yura na kupereka kwa karonga. Ndipo nkhaŵa kuti ndindarongorepo chisko cha chitima panthazi pa karonga.

²Sono karonga wakandifumba wakati, “Kasi nchifukwa uli chisko chako chili na chitima apo kuti warwara chara?” Ichi kuti nchitima chinyakhe chara kweni cha mu mtima. Penepapo nkhatenthema chomene.

³Nkhazgora kwa karonga nkhati, “Karonga muŵe na umoyo utali. Kasi chisko chane chingareka uli kuŵa na chitima apo msumba uko madindi gha ŵasekuru ghali, uli kubwanganduka ndipo vipata vyakhe vili kuphya na moto?”

⁴Penepapo karonga wakandizgora wakati, “Kasi icho ukukhumba nchinthu uli?” Ndipo ine nkharomba kwa Chiuta wa kuchanya.

⁵Nkhazgora karonga nkhati, “Usange chingamukondweskani imwe karonga ndipo usange ine nda muteŵeti winu ndili wakutemweka panthazi pinu, nkhuromba kuti munditume ku charu cha Yuda, ku msumba uko madindi gha ŵasekuru ghali, mwakuti nkhauzengeso.”

⁶Penepapo karonga, uku wakhara pamoza na fumukazi wakati kwa ine, “Kasi ulendo wako ngwa mazuŵa ghalinga? Ndipo wamkuwera pauli?” Ntheura chikakondweska karonga kundituma ine, ndipo nkhapima nyengo.

⁷Ine nkhati kwa karonga, “Usange chingamukondweskani imwe karonga, mundipe makarata kuti nkhapereke ku nduna za vigaŵa izo zili ku sirya kwa mronga wa Yufurate mwakuti zikandizomerezgenge kuporotamo mu vyaru vyawo ndisuke nkhafike mu charu cha Yuda.

⁸Mundipeso karata yinyakhe kuti nkhapereke kwa Asafu uyo wakusunga nkhorongo ya karonga mwakuti wakandipeko makuni, kuti nkhachitire michiko ya vipata vya linga la Nyumba ya Chiuta, na vya linga la msumba ndiposo vya nyumba iyo ndamkukharamo.” Karonga wakandipa vyose ivyo nkharomba pakuti woko la uchizi la Chiuta wane likaŵa pa ine.

⁹Ntheura nkhanyamuka ulendo wane, ine pamoza na ŵarongozgi ŵa ŵasilikari na ŵasilikari ŵakukwera pa mahachi awo karonga wakandituma nawo. Nkhenda kapereka makarata agho wakandipa ku ŵarara ŵa vigaŵa vya ku sirya kwa mronga wa Yufurate.

¹⁰Kweni para Sanibalati, wa ku Horoni na muteŵeti Tobiya wa fuko la Amoni ŵakapulika ichi, ŵakakweŵeka chomene mu mitima kuti munthu yunji wiza kuti waŵachitire viweme ŵaIsraele.

¹¹Ntheura nkhiza ku msumba wa Yerusalemu ndipo nkhakhara mazuŵa ghatatu.

¹²Penepapo na usiku nkhawuka, ine pamoza na ŵanthu ŵachoko waka. Kuti nkhaphalirapo munthu nanga njumoza chara icho Chiuta wane wakakhuŵirizga mu mtima wane kuti ndiwuchitire msumba wa Yerusalemu. Chinyama icho tikayeghepo chikaŵa icho nkhakwerapo pera.

¹³Na usiku nkhafumira kuwaro pakwendera pa Chipata cha ku Dambo. Nkhajumpha mbwiwi izo zikathyika na zina lakuti Kambwe[1] na ku Chipata chakuya ku chizara. Nkhendera viliŵa vya msumba wa Yerusalemu ivyo vikabwanganduka ndiposo na vipata vyakhe ivyo vikocheka na moto.

¹⁴Nkharutilira mpaka nkhaya kafika ku chipata icho chikuya ku mbwiwi za maji na ku chiziŵa cha karonga. Kweni pa kaŵavye malo ghakuti chinyama chane chendepo.

¹⁵Ntheura na usiku nkharuta kukwerera ku nthowa ya mu dambo uku nkhwendera viliŵa vya msumba. Pamanyuma nkhazgoka pakwendera nthowa yakuya ku Chipata cha ku Dambo, ndipo nkhawerera.

¹⁶Ŵarongozgi kuti ŵakamanya chara uko nkharuta nanga nkhumanya icho nkhachita. Nkhaŵa kuti ndiŵamanyiske ŵaYuda, ŵasofi, nduna, ŵarongozgi panji ŵanthu ŵanyakhe awo ŵakenera kuchita mlimo.

¹⁷Ntheura nkhayowoya kwa iwo nkhati, “Mukuwona suzgo iyo tilimo, umo msumba wa Yerusalemu uliri mu mahami ndiposo na umo vipata vyakhe vili kochekera na moto. Tiyeni sono tizengeso viliŵa vya msumba wa Yerusalemu mwakuti tireke kukhozgeka soni.”

¹⁸Nkhaŵaphaliraso na umo kutemwa kwa Chiuta wane kukaŵira pa ine ndiposo na icho karonga wakayowoya kwa ine. Ŵanthu ŵara ŵakandizgora ŵakati, “Tiyeni tiyambeko kuzenga.” Penepapo ŵakajipereka kuti ŵachite mlimo uweme uwu.

¹⁹Kweni para Sanibalati wa ku Horoni, muteŵeti Tobiya wa fuko la Amoni, ndiposo na Geshemu wa charu cha Arabu ŵakapulika, ŵakatiseka na kutiyuyura. Iwo ŵakati, “Nchinthu uli icho mukuchita? Kasi mukumugarukira karonga?”

²⁰Ntheura nkhaŵazgora ndipo nkhati kwa iwo, “Chiuta wa kuchanya wati wachitire uweme ndipo ise ta ŵateŵeti ŵakhe titi tiyambe kuzenga. Kweni imwe mulije phande panji mazaza nanga nchikumbusko muno mu Yerusalemu.”