Read new_tumbuka_bible Nehemiya 3 Bible Online

Nehemiya 3 - new_tumbuka_bible bible

Nehemiya 3

¹Penepapo musofi mukuru Eliyashibu pamoza na ŵasofi ŵanyakhe ŵakambako mlimo ndipo ŵakazenga Chipata cha Mberere. Wakachipatula ndipo ŵakaŵikapo vijaro vyakhe. Chiliŵa icho wakachipatula ŵakachizenga mpaka wakaya kafika ku Chigongwe cha 100 na kuya kafika ku chigongwe cha Hananele.

²Ndipo ŵanthu ŵa msumba wa Yeriko ŵakazenga chiliŵa icho chikabatikana na icho ŵakazenga ŵasofi. Zakuru mwana wa Imiri wakazenga chiliŵa cha kubatikana na Eliyashibu na ŵanthu ŵa msumba wa Yeriko.

³Ŵa mbumba ya Hasenaya ŵakazenga Chipata cha Somba. Wakaŵikapo michiko yakhe, vijaro vyakhe, vyakukhozgera vyakhe na mphingirizgo zakhe.

⁴Meremoti mwana wa Uriya, muzukuru wa Hakozi wakanozga malo agho ghakagumuka. Meshulamu mwana wa Berekiya, muzukuru wa Meshezabele wakanozga malo gha pafupi na Meremoti. Ndipo Zadoki mwana wa Baana nayo wakanozga malo agho ghakagumuka.

⁵Malo ghakugumuka gha pafupi na agha, awo ŵakanozga ŵakaŵa ŵanthu ŵa ku Tekowa. Kweni ŵarongozgi ŵawo kuti ŵakateŵetako chara mlimo uwo ŵasekuru ŵawo ŵakapereka.

⁶Chipata cha Yeshana chikanozgeka na Yoyada mwana wa Paseya na Meshulamu mwana wa Besodeya. Ŵakaŵika michiko, vijaro vyakhe, vyakukhozgera vyakhe na mphingirizgo zakhe.

⁷Pafupi na ŵeneaŵa awo ŵakanozga pakugumuka ŵakaŵa ŵanthu ŵa ku Gibeyoni na ŵa ku Mizipa awo ŵakaŵa Melatiya na Yadoni wa ku Meronoti. Ŵeneaŵa ŵakaŵa pasi pa mazaza gha nduna ya chigaŵa ku sirya kwa mronga wa Yufurate.

⁸Pafupi na ŵeneawo uyo wakanozga pakugumuka wakaŵa Uziyele mwana wa Harihaya yumoza wa ŵafuzi ŵa golide. Pafupi nayo uyo wakanozga pakugumuka wakaŵa Hananiya yumoza wa awo ŵakapanganga mafuta yakununkhira. Wose aŵa ŵakanozga viliŵa vya Yerusalemu mpaka ŵakaya kafika ku Chiliŵa Chisani.

⁹Pafupi na iwo uyo wakanozga apo pakagumuka wakaŵa Refaya mwana wa Huru mweneuyo wakawusanga hafu wa msumba wa Yerusalemu.

¹⁰Pafupi na ŵeneaŵa, Yedaya mwana wa Harumafu wakanozga apo pakagumuka pafupi waka na nyumba yakhe. Hatushi mwana wa Hashabineya wakanozga pakugumuka pafupi na Yedaya.

¹¹Malikiya mwana wa Harimu na Hashubu mwana wa Pahati Mowabu ŵakanozga apo pakagumuka ndiposo na Chigongwe cha Mauvuni.

¹²Shalumu mwana wa Haloheshi mweneuyo wakawusanga hafu wa msumba wa Yerusalemu wakanozga apo pakagumuka pakuvwirika na ŵadumbu ŵakhe.

¹³Chipata cha ku Dambo chikanozgeka na Hanuni pamoza na ŵenecharu ŵa ku Zanowa. Ŵakalizengaso ndipo ŵakaŵikapo vijaro, vyakukhozgera na mphingirizgo. Ŵakanozgaso apo pakagumuka pa mtunda wakukwana mamita 450 mpaka ŵakaya kafika ku Chipata cha ku Chizara.

¹⁴Chipata cha ku Chizara chikanozgeka na Malikiya mwana wa Rekabu uyo wakawusanga boma la Beti Hakeremu, wakachizengaso na kuŵikapo vijaro, vyakukhozgera na mphingirizgo.

¹⁵Chipata cha ku Mbwiwi za maji chikanozgeka na Shalumu mwana wa Kolihoze uyo wakawusanga msumba wa Mizipa. Wakachizengeso ndipo wakaŵikapo mtenje pachanya pakhe ndiposo wakaŵikapo vijaro, vyakukhozgera na mphingirizgo. Pamanyuma wakanozgaso Chiziŵa cha Silowamu[2] icho chikaŵa pafupi na munda wa karonga mpaka na ku makwerero yakukhilira ku Msumba wa Davide.

¹⁶Kujumpha iyo, Nehemiya mwana wa Azibuku uyo wakawusanga hafu wa msumba wa Betizuru wakanozga apo pakagumuka kuya kafika pa malo apo pakuthyana na madindi gha Davide, ndiposo na kuya kafika ku chiziŵa chakujima na nyumba ya vinkhara.

¹⁷Pafupi na Nehemiya, apo pakagumuka pakunozgeka na ŵaLevi pasi pa Rehumu mwana wa Bani. Ndiposo wakarondezgapo wakaŵa Hashabiya mweneuyo wakawusanga hafu wa boma la Keyila ndipo wakanozga pakugumuka umo mukaŵa mu boma lakhe.

¹⁸Pafupi na iyo apo pakagumuka pakanozgeka na ŵabali ŵawo ndipo Bavayi mwana wa Henadadi ndiyo wakaŵa murongozgi wawo. Bavayi wakawusanga hafu wa boma la Keyila.

¹⁹Pafupi na iyo, Ezere mwana wa Yeshuwa uyo wakawusanga msumba wa Mizipa wakanozga pakugumuka panyakhe apo pakathyana na chikwera cha ku nyumba yakusungamo mahomwa gha nkhondo pa chingodya cha linga.

²⁰Pafupi na iyo, Baruki mwana wa Zabayi mwakujipereka wakanozga apo pakagumuka kufuma pa chingodya kuya kafika pa muryango wa mbumba ya Eliyashibu, musofi mukuru.

²¹Pafupi na iyo, Meremoti mwana wa Uriya, muzukuru wa Hakozi wakanozga malo ghanyakhe ghakugumuka kufuma pa muryango wa nyumba ya Eliyashibu, musofi mukuru kuya kafika ku umaliro wa nyumba.

²²Awo ŵakanozga pa malo ghakugumuka pamanyuma pa Meremoti wakaŵa ŵasofi awo ŵakakharanga mu chidika.

²³Pafupi na iwo, Benjamini na Hashubu ŵakanozga pakugumuka apo pakathyana na nyumba yawo. Azariya mwana wa Maaseya, muzukuru wa Ananiya wakanozga apo pakagumuka pafupi na nyumba yakhe.

²⁴Pafupi na iyo, Binuyi mwana wa Henadadi wakanozga pamalo ghanji apo pakagumuka gha chigaŵa chinyakhe, kufuma pa nyumba ya Azariya kuya kafika apo linga likambiranga chingodya.

²⁵Palala mwana wa Uzayi wakanozga apo pakagumuka pakuthyana na chingodya na chigongwe chitali cha baraza la ŵalinda. Pafupi na iyo, uyo wakanozga apo pakagumuka wakaŵa Pedaya mwana wa Paroshi.

²⁶Ndipo ŵateŵeti ŵa Nyumba ya Chiuta awo ŵakakharanga musi mwa msumba wa Ofele ŵakanozga apo pakagumuka kuthyana na Chipata cha ku Maji ku mafumiro gha dazi na chigongwe chitali.

²⁷Pafupi na iwo, ŵanthu ŵa ku Tekowa ŵakanozga malo ghanyakhe agho ghakagumuka kuthyana na chigongwe chitali mpaka ŵakaya kafika ku chiliŵa cha msumba wa Ofele.

²⁸Pachanya pa Chipata cha Mahachi, ŵasofi ndiwo ŵakanozga apo pakagumuka, waliyose kuthyana na nyumba yakhe.

²⁹Pafupi na iwo, Zadoki mwana wa Imere wakanozga malo ghakugumuka kuthyana na nyumba yakhe. Shemaya mwana wa Shekaniya uyo wakalindanga chipata cha ku mafumiro gha dazi, wakanozga apo pakagumuka pafupi na Zadoki.

³⁰Pamanyuma pa Shemaya, Hananiya mwana wa Shelemiya na Hanuni, mwana wa chinkhonde na chimoza wa Zalafu, wakanozga apo pakagumuka. Pafupi na iyo, Meshulamu mwana wa Berekiya wakanozga apo pakagumuka kuthyana na chipinda chakhe.

³¹Pafupi na Meshulamu, Malikiya yumoza wa ŵafuzi ŵa golide wakanozga apo pakagumuka mpaka pafupi na nyumba ya ŵateŵeti ŵa Nyumba ya Chiuta na ya ŵalinda iyo yikathyana na Chipata cha Mifikadi,[3] na kuya pa chipinda cha pachanya icho chili pa chingodya.

³²Pakati pa chipinda cha pachanya icho chili pa chingodya na chipata cha mberere na mbuzi, ŵafuzi ŵa golide na ŵalinda ndiwo ŵakanozga malo agho ghakagumuka.