Read new_tumbuka_bible Nehemiya 4 Bible Online

Nehemiya 4 - new_tumbuka_bible bible

Nehemiya 4

¹Para Sanibalati wakapulika kuti tikuzengaso linga, iyo wakaphya mtima na kukwiya chomene ndipo ŵakaŵaseka ŵaYuda mwakuŵahoya.

²Wakayowoya ichi panthazi pa ŵanyakhe na pa ŵa ŵasilikari ŵa ku Samariya. Iyo wakati, “Kasi ŵaYuda wakutomboroka aŵa ŵakuchitachi? Kasi ŵakumanya kuwezgerapo vinthu umo vikaŵira? Kasi ŵati ŵaperekenge sembe? Kasi ŵamarenge kuzenga zuŵa limoza? Kasi ŵamkutoraso mulu gha mawe agho ghakaphya kuti ŵazengereso linga?”

³Sono Tobiya, muAmoni wakaŵa penepapo, ndipo wakati, “Linga ilo ŵakuzenga nanga wangaŵa kambwe, usange wangakwerapo liti libwangandukire pasi!”

⁴Penepapo nkharomba kwa Chiuta nkhati, “Mwe Chiuta withu tipulikani, pakuti tikuyuyurika. Wezgerani chisunjizgo chawo pa iwo ŵenecho. Muŵapereke ku charu chinyakhe. Ŵaŵe nga ŵakupokeka mwakuti ŵakaŵe ŵazga.

⁵Mureke kugowokera zakwananga zawo nanga nkhuruwa uheni wawo weneuwo ŵachita pakumutukani panthazi pa ŵazengi ŵinu.”

⁶Ntheura tikazenga linga na kukumana lose mpaka chigaŵa cha hafu mu kukwera kwakhe chifukwa ŵanthu ŵakaŵikapo mtima pa mlimo.

⁷Kweni para Sanibalati, Tobiya, ŵaArabu, ŵaAmoni ndiposo na ŵaAshidodi ŵakati ŵakapulika kuti ŵaYuda ŵakurutilira kunozgaso viliŵa vyakugumuka vya linga la Yerusalemu ndiposo kuti umo mukagumuka mwayamba kujarika, ŵakakaripa chomene.

⁸Wose pamoza ŵakapangana kuti ŵachitire chiŵembu ŵa mu Yerusalemu pakurwa nawo nkhondo ndipo ŵanjizgemo utimbanizgi mukati mwawo.

⁹Ntheura ise tikaromba kwa Chiuta withu na kuŵika ŵalinda muhanya na usiku kuti wativilirenge.

¹⁰Ndipo ŵaYuda ŵakati, “Nkhongono za ŵanthu awo ŵakuyegha katundu zamara, ndipo chizara chichali chinandi. Ntheura kuti tingarutilira kuzengaso linga chara.”

¹¹Ndipo ŵarwani ŵithu ŵakati, “Kuti ŵati ŵamanyenge chara nanga nkhutiwona tisuke tifike mukati mwawo ndipo titi tiŵakome na kurekeska mlimo wawo.”

¹²Para ŵaYuda awo ŵakakharanga mukati mwawo ŵakiza kwa ise kutiphalira kwakuyana na kakhumi kuti, “Kufumira kose uko ŵarwani ŵithu ŵakukhara, ŵati wizenge kuti ŵizakarwe nase.”

¹³Ntheura nkhaŵaŵika ŵanji ŵa ŵanthu ŵithu kusika kuseri kwa linga, na mu malo gha pakweru, kwakuyana na mbumba zawo uku ŵali na malupanga, mikondo na mauta.

¹⁴Nkhati ndawona kuti ŵanthu ŵakutenthema, nkhawuka na kuti kwa nduna, ŵarongozgi na ku ŵanthu wose, “Mureke kopa. Kumbukani kuti FUMU njikuru na yakofya. Mukwenera kurwera ŵabali ŵinu, ŵana ŵinu ŵanarume na ŵanakazi, ŵawoli ŵinu na vikaya vyinu.”

¹⁵Ŵarwani ŵithu ŵakapulika kuti chiŵembu chawo tachimanya, ndipo ŵapanikizga kuti Chiuta watimbanizga icho ŵakakhumbanga kuchita kwa ise. Ntheura tikawerera ku chiliŵa munthu yose pa mlimo wakhe.

¹⁶Kufumira pa zuŵa lenelira mpaka nyengo yose ya kunthazi hafu wa ŵanthu ŵane ŵakazenganga ndipo hafu wa ŵanyakhe wakaŵa na mikondo, zinguru, mauta na vyakuvwara vya visulo. Ŵarongozgi ŵakaŵakhuŵirizganga ŵaYuda wose,

¹⁷awo ŵakazenganga chiliŵa. Awo ŵakayeghanga katundu, ŵakachitanga milimo na woko limoza ndipo woko linyakhe likorera chakurwera.

¹⁸Muzengi waliyose wakakakirira lupanga lwakhe mu chiuno chakhe uku wakuzenga. Uyo wakalizganga mbata, wakakharanga na ine.

¹⁹Penepapo nkhati ku nduna, ŵarongozgi na ku ŵanthu wose, “Mlimo uwu ngukuru na usani ndipo takhara patalipatali yumoza na munyakhe pakuzenga linga.

²⁰Kose uko mwamkupulika kulira kwa mbata, muwunganenge nase kweneuko. Chiuta withu ndiyo watirwerenge.”

²¹Ntheura tikarutilira kuzenga chiliŵa apo hafu wa ŵanthu ŵithu ŵakakorera mikondo kwamba ku matandakucha mpaka na usiku apo nyenyezi zikayamba kuŵala.

²²Ndipo pa nyengo yeneyira nkhaŵaphaliraso ŵanthu kuti, “Munthu yose na muteŵeti wakhe ŵagonenge mu Yerusalemu na usiku mwakuti ŵatilindenge ndipo ŵachitenge mlimo na muhanya.”

²³Ntheura nanga ndine, panji ŵanyane, ŵateŵeti ŵane, na ŵanthu awo ŵakandivikiriranga, pakaŵavye na yumoza wakuvura malaya ghakhe na usiku pakugona nanga ndi apo wakagezanga. Waliyose wakaŵanga na mahomwa ghakhe nyengo yose.