Read new_tumbuka_bible Nehemiya 5 Bible Online

Nehemiya 5 - new_tumbuka_bible bible

Nehemiya 5

¹Sono ŵanarume na ŵawoli ŵawo ŵanyakhe ŵakamba kudinginyika chomene kususka ŵaYuda ŵanyawo.

²Ŵanji ŵakati, “Ise pamoza na ŵana ŵithu, tili ŵanandi. Tikukhumba chakurya kuti tirye mwakuti tiŵe na umoyo.”

³Pakaŵaso ŵanyakhe awo ŵakatenge, “Ise tikukhumba kukolezga minda yithu yakulimapo, minda ya mpheska na nyumba zithu mwakuti pa nyengo ya njara iyi tiŵe na chakurya.”

⁴Ndipo ŵanyakhe ŵakayowoyanga kuti, “Ise tabwereka ndarama kuti tipereke msonkho kwa karonga pakukolezga minda yithu yakulimapo na minda ya mpheska.

⁵Tili mtundu umoza nga mbaYuda ŵanyithu ndipo ŵana ŵithu ŵakuyana waka na ŵana ŵawo, ndipouli tikuchichizga ŵana ŵithu kuŵa ŵazga. Ŵana ŵithu ŵanakazi ŵazgoka kale ŵazga, kweni nkhongono tilije za kuŵawombolera ŵana ŵithu chifukwa minda yithu ya mpheska yili kutoreka na ŵanthu ŵanyakhe.”

⁶Para nkhapulika kulira na mazgu ghawo, nkhakwiya chomene.

⁷Nkhalanguruka pa cheneichi ndipo nkhachenya nduna na ŵarongozgi. Nkhayowoya kwa iwo nkhati, “Imwe mukusangirapo chandulo kufuma ku ŵabali ŵinu.” Ntheura nkhachema ŵanthu kuti tiŵe na ungano ukuru kuti ndiŵasuske.

⁸Ndipo nkhati kwa iwo, “Tachita chose icho tikamanya kuchita kuti tiŵawombole ŵaYuda awo ŵakaguliskika ku ŵamitundu. Kweni imwe mukuguliskaso ŵabali ŵinu kuti ise tizakaŵawomboleso.” Penepapo ŵakakhara waka chete kwambula kuyowoya kalikose.

⁹Ntheura nkhati kwa iwo, “Icho mukuchita kuti nchiweme chara. Asi mukwenera kopa Chiuta withu mwakuti tireke kusunjizgika na ŵamitundu awo mbarwani ŵithu.

¹⁰Ndipo ine na ŵabali ŵane ndiposo na ŵateŵeti ŵane tikaŵabwereka ndarama na chakurya. Ntheura sono tiyeni tireke kusangirapo chandulo pa iwo.

¹¹Muhanya uno ntheura, muŵawezgere minda yawo yakulimapo, minda yawo ya mpheska na ya maolive, nyumba zawo ndiposo na chandulo icho mwapokanga mu ndarama, mu vyakurya, mu vinyo ndiposo na mu mafuta.”

¹²Penepapo ŵakazgora ŵakati, “Titi tiwezge chilichose ndipo titi tikhumbeso kanthu kufuma kwa iwo chara. Ise tichitenge nga ndi umo mwayowoyera.” Ndipo nkhachema ŵasofi, nkhaŵarapiska kuti ŵachite nga ndi umo ŵakapanganirana.

¹³Sono ine nkhakung'untha chakuvwara chane ndipo nkhati, “Ntheura ndimo Chiuta wati wamukung'unthirenge munthu waliyose uyo wati warekenge kusunga phangano lakhe. Chiuta wamuzgore mukavu pakumupoka nyumba yakhe, katundu wakhe yose uyo wali nayo.” Penepapo ungano wose ukati, “Ameni” ndipo ŵakayichindika FUMU. Ŵanthu ŵakachita nga ndi umo wakapanganirana.

¹⁴Pa virimika 12, ine panji ŵabali ŵane kuti tili kuryapo chakurya chakwenera nduna chara. Ichi chikamba nyengo iyo ine nkhimikikira kuŵa nduna yawo ya charu cha Yuda, kufuma pa chirimika cha 20 mpaka pa chirimika cha 32 cha kuwusa kwa Karonga Aritaserese.

¹⁵Kweni nduna za charu izo zikaŵako pambere ine, zikaŵazotofya chomene ŵanthu. Zikapokanga mithulo ya vyakurya na vinyo kufuma ku ŵanthu pa dera pa ndarama za siliva zakukwana 40. Nanga mbateŵeti ŵawo nawo ŵakaŵazotofyanga ŵanthu. Kweni ine kuti nkhachitanga ntheura chara chifukwa cha kopa Chiuta.

¹⁶Mu malo mwakhe, nkhajipereka ku mlimo wakuzenga linga. Ŵateŵeti ŵane wose wakawungana kuti ŵachite nane mlimo wakuzenga linga ndipo kuti nkhapokapo charu chara.

¹⁷ŴaYuda na ŵarongozgi awo ŵakaryanga pamoza nane ŵakaŵa 150 pa dera pa ŵamitundu awo ŵakizanga kufumira ku vyaru ivyo vikatizingirizga.

¹⁸Vyakurya ivyo wakanozgeranga ine pa zuŵa limoza vikaŵa nkhambako yimoza, mberere zatutuŵa zinkhonde na yimoza, nkhuku zinandi waka ndipo pa zuŵa la khumi lirilose pakaŵangako vikumba vya kuzura na vinyo munandi. Ndipouli nanga pakaŵapo vyose vyeneivi kuti nkhakhumbanga kupoka chakurya icho chikwenera kuperekeka kwa nduna ya charu chara chifukwa chakuti ŵanthu ŵakazotofyeka chomene.

¹⁹Nkharomba nkhati, “Mwe Chiuta wane, kumbukani chiweme chose icho ndaŵachitira ŵanthu aŵa.”