Read new_tumbuka_bible Nehemiya 6 Bible Online

Nehemiya 6 - new_tumbuka_bible bible

Nehemiya 6

¹Sanibalati, Tobiya na Geshemu muArabu ndiposo na ŵarwani ŵithu ŵanyakhe ŵakapulika kuti ndazenga linga na kuti kulije kukharapo mwanya nanga ngumoza, nanga uli pa nyengo iyi nkhaŵa kuti ndindaŵikemo vijaro mu vipata,

²Sanibalati na Geshemu ŵakatuma mazgu agha kwa ine, “Wize kuti tikumane pa chikaya chimoza icho chili mu Chidika cha Ono.” Kweni iyi yikaŵa nthowa yawo yakuti wandichitire chiŵembu.

³Ntheura ine nkhatuma ŵanthu kuti ŵarute na mazgu agha, “Ine ndili na nchito yikuru, ndipo ndingizako chara. Pali chifukwa uli kuti ndireke mlimo wane na kwiza uko kwa imwe.”

⁴Ŵanthu ŵara ŵakanditumira mazgu kwakuyana na kanayi, ndipo ine nane nkhaŵazgora mazgu gheneghara pera.

⁵Pamanyuma Sanibalati wakatuma muteŵeti wakhe kwa ine, kachinkhonde na mazgu gheneagha pera mu karata wakujurika mu woko lakhe.

⁶Karata yira yikalembeka ntheura: “Kwapulikikwa mukati mu ŵamitundu, ndipo Geshemu nayo wandiphalira kuti iwe na ŵaYuda mukukhumba kugaruka. Ichi ndicho chifukwa mukuzengera linga ndipo iwe ukukhumba kuŵa karonga wawo. Umo ndimo tikupulikira.

⁷Ndiposo mu Yerusalemu ŵimika nchimi kuti ziŵaphalirenge ŵanthu kuti, ‘Muli karonga mu charu cha Yuda.’ Ntheura ichi chamkupulikikwa kwa karonga. Sono zanga kuti tidumbiskane pa ichi.”

⁸Penepapo ine nkhamuwezgera mazgu agha, “Palije na chimoza cha ivyo wayowoya cheneicho chili kuchitika kuno. Iwe ndiwe ukuviyata waka kufuma mu maghanoghano ghako.”

⁹Wose ŵakayezganga kutofya ndipo ŵakaghanaghananga kuti viti vitiremere ndipo mlimo kuti umarenge chara. Ntheura nkharomba nkhati, “Mwe Chiuta, ndikhwimiskani.”

¹⁰Zuŵa limoza nkharuta ku nyumba ya Shemaya mwana wa Delayila, muzukuru wa Mehetabele uyo wakajijalira mu nyumba yakhe. Iyo wakati kwa ine, “Iwe na ine tiye tikumane mu Nyumba ya Chiuta ndikabisame mukati ndipo ndikajare vijaro chifukwa ŵanthu ŵakukhumba kwiza kuti ŵizakakukome. Usiku weneuwo ŵakwiza kuti ŵizakakukome.”

¹¹Kweni ine nkhamuzgora kuti, “Kasi munthu wakuŵa nga ndine wangachimbira? Ndipo kasi munthu wakuŵa nga ndine wangaponoska umoyo wakhe pakubisama mu Nyumba ya Chiuta? Ine kuti ndinganjiramo chara.”

¹²Nkhati ndalanguruka pa mazgu ghakhe gheneagha nkhamanya kuti ndi Chiuta chara uyo wakamutuma, kweni wakayowoya ichi pakususkana na ine pakuti Sanibalati na Tobiya ŵakamupa chimbundi.

¹³Ŵakamupa chimbundi mwakuti wandofye ndipo ndichite nga ndi umo wakayowoyera pakunjira mu kwananga ndipo pamanyuma ŵandipe lumbiri luheni na kundisunjizga.

¹⁴Penepapo nkharomba nkhati, “Mwe Chiuta wane, mukumbuke Sanibalati na Tobiya chifukwa cha ivyo ŵandichitira ine. Mukumbukeso na Nowadiya na nchimi zinyakhe izo zikayezga kundofya.”

¹⁵Ntheura linga likamara kuzengeka pa zuŵa la 25 la mwezi wa Elulu pakati pajumphapo mazuŵa 52.

¹⁶Para ŵarwani ŵithu wose ŵakapulika kuti linga lamara kuzengeka, ŵamitundu wose awo ŵakatizingirizga ŵakopa chomene ndipo ŵakathika lusoko chifukwa ŵakamanya kuti mlimo wose wachitika na wovwiri wa Chiuta withu.

¹⁷Ndiposo mu mazuŵa gheneghara ŵarongozgi ŵa mu charu cha Yuda ŵakatumanga makarata ghanandi kwa Tobiya ndipo mazgoro gha makarata kufuma mwa Tobiya ghakizanga kwa iwo.

¹⁸Ŵakachitanga ntheura chifukwa ŵaYuda ŵanandi wakachita chirapo pakuzomerezgana nayo pakuti wakaŵa mukweni wa muYuda munyawo Shekaniya mwana wa Ara, ndiposo mwana wakhe Yehohanani wakatora mwana wa Meshulamu muzukuru wa Berekiya kuŵa muwoli wakhe.

¹⁹Ndipo chinyakheso chikaŵa chakuti ŵanthu ŵakandiphaliranga za mlimo yakhe yiweme ndiposo ŵakamuphalirangaso mazgu ghane. Ntheura Tobiya wakalembanga makarata ghakundofya ine.