Read new_tumbuka_bible Nehemiya 8 Bible Online

Nehemiya 8 - new_tumbuka_bible bible

Nehemiya 8

¹ŴaIsraele wose wakawungana nga ndi munthu yumoza pa luwugha lwa Chipata chakuya ku Maji. Wakamuphalira mulembi Ezira kuti wize na Buku la Marango gha Mozesi ilo FUMU yikapereka ku ŵaIsraele.

²Ntheura pa zuŵa lakudanga la mwezi wa chinkhonde na chiŵiri mulembi Ezira wakiza nalo buku panthazi pa mpingo wa ŵanarume na ŵanakazi ndiposo na ŵana wose awo ŵakamanya kupulikiska.

³Ezira wakaŵaŵazgira ŵanthu Buku la Marango lira kwamba na macherochero mpaka na muhanya pakati uku warazgira ku luwugha pafupi na Chipata cha Maji panthazi pa mpingo wa ŵanarume na ŵanakazi ndiposo na ŵana awo ŵakamanya kupulikiska. Ndipo ŵanthu wose ŵakategherezga chomene ku mazgu gha mu Buku la Marango.

⁴Ndipo mulembi Ezira wakimilira pa chigongwe cha makuni icho wakachizenga chifukwa cha mlimo weneuwu. Pafupi na iyo ku woko la maryero kukakhara Matitiya, Shema, Anaya, Uriya, Hilikiya na Maaseya. Ndipo ku woko lakhe la mazere kukakhara Pedaya, Mishayele, Malikiya, Hashumu, Hashibadana, Zakariya na Meshulamu.

⁵Ezira wakajula Buku la Marango ghara, ndipo ŵanthu ŵakamuwona makora pakuti wakimilira pachanya pa chigongwe. Apo wakajulanga ŵanthu wose wakimilira.

⁶Penepapo Ezira wakarumba FUMU, Chiuta mukuru. Ndipo ŵanthu wose ŵakawuskira mawoko ghawo muchanya na kuzgora kuti, “Ameni, Ameni” Penepapo ŵakasindamira pasi na kuyilambira FUMU.

⁷Penepapo ŵaLevi awo ŵakaŵa ŵa Yeshuwa, Bani, Sherebiya, Yamini, Akubu, Shabetayi, Hodiya, Maaseya, Kelita, Azariya, Yozabadi, Hanani na Pelaya ŵakovwiranga kuŵapatawulira ŵanthu marango, uku ŵanthu ŵimilira mu malo ghawo.

⁸ŴaLevi ŵara ŵakaŵazganga Buku la Marango gha Chiuta na kughatanthaura[4] ku ŵanthu pakuŵaphalira ching'anamulo chakhe mwakuti ŵanthu ŵakapulikiskanga icho chikalembeka.

⁹Nehemiya mweneuyo wakaŵa nduna yikuru mu charu cha Yuda, Ezira uyo wakaŵa musofi ndiposo na mulembi wa marango, pamoza na ŵaLevi awo ŵakatanthauliranga ŵanthu mazgu gha mu marango wakati ku ŵanthu wose, “Zuŵa ili ndakupatulika kwa FUMU, Chiuta winu. Mungaliranga nanga nkhutengera.” Pakuti ŵanthu wose ŵakatengeranga para ŵakapulika mazgu gha marango.

¹⁰Nehemiya wayowoyera wakati, “Rutaninge mukarye vya mafuta na kumwa vinyo lakunowa. Ndipo mukaŵapeko awo ŵandanozge kalikose pakuti zuŵa ili ndakupatulika kwa Fumu yithu. Mureke kuŵa na chitima pakuti chimwemwe icho FUMU yikupereka ndiyo nkhongono yinu.”

¹¹Ntheura ŵaLevi wakachetamiska ŵanthu wose pakuŵaphalira ŵanthu kuti chetamani pakuti zuŵa ili ndakupatulika. Mureke kuŵa na chitima.

¹²Penepapo ŵanthu wose ŵakaruta kuya karya na kumwa ndipo wakaŵapako ŵanthu awo kuti wakanozgera na kanthu kalikose chara. Ntheura ŵakasekerera chomene chifukwa wakaghapulikiska mazgu agho gha kaŵazgika kwa iwo.

¹³Pa zuŵa la chiŵiri la mwezi awo ŵakaŵa ŵararaŵarara pa mbumba za wiskewokuru wose ŵakiza pamoza na ŵasofi na ŵaLevi kwa mulembi Ezira mwakuti ŵasambire mazgu gha mu Buku la Marango.

¹⁴Ndipo mu Buku la Marango wakasanga kuti muli kulembeka na umo Fumu yikalangulira kwizira kwa Mozesi kuti ŵaIsraele wakwenera kukhara mu misasa pa chiphikiro cha mwezi wa chinkhonde na chiŵiri.

¹⁵Ŵakasangaso kuti ŵakwenera kuphara na kuthuwuska ichi mu mizi yawo yose na mu msumba wa Yerusalemu kuti, “Rutani ku mapiri mukateme minthavi ya makuni gha maolive, makuni gha olive gha mu thondo, khuni la kachere, mikama, na minthavi ya makuni ghose agho ghali na mahamba kuti ndiyo wazengere nyumba za misasa nga ndi umo kuli kulembekera.”

¹⁶Ntheura ŵanthu ŵakaruta kuya katora minthavi ya makuni ndipo ŵakazenga misasa yawo munthu yose pa msasa wakhe na wakhe pachanya pa nyumba yakhe na yakhe, mu mabaraza ghawo na mu mabaraza gha Nyumba ya Chiuta ndiposo na pa luwugha lwa chisanisani pafupi na Chipata cha ku Maji na lwa ku Chipata cha Efurayimu.

¹⁷Ndipo ŵanthu wose awo ŵakawera ku umikori ŵakazenga misasa na kukharamo. Pakuti kufuma mu mazuŵa gha Yeshuwa mwana wa Nuni mpaka pa zuŵa lenelira ŵaIsraele ŵakaŵa ŵachitepo chiphikiro cha ntheura. Ntheura pakaŵa chikondwerero chikuru.

¹⁸Kufumira pa zuŵa lakudanga mpaka pa zuŵa la umaliro, zuŵa na zuŵa Ezira wakaŵaŵazgiranga ŵanthu mazgu gha mu Buku la Marango gha Chiuta. Wakachita chiphikiro mazuŵa ghankhonde na ghaŵiri. Ndipo pa zuŵa la chinkhonde na chitatu pakaŵa ungano ukuru wakujipatula kwakuyana na marango gha buku lira.